ភ្នំពេញ៖ ក្រុមហ៊ុនទេសចរណ៍ Charming Cambodia Tours ដែលកំពុងជំរុញចលនាទេសចរជាកញ្ចប់សម្រាប់ប្រជាជន​ក្នុងស្រុក នឹងចាប់ផ្តើមដំណើរកម្សាន្តទៅខេត្តកំពតនៅថ្ងៃសៅរ៍ ទី១៣ ខែមិថុនានេះដោយផ្តោតលើការសិក្សាទេសចរណ៍អចលនទ្រព្យ។ កញ្ចាប់ទេសចរនេះនឹងមានអ្នកចូលរួមជាច្រើននាក់ ដោយ​ក្រុមហ៊ុនរៀបចំនឹងផ្តោតលើការផ្សព្វផ្សាយពីអាហារល្បីប្រចំាតំបន់ដូចជា «នំបញ្ចុកកំពត (នំបញ្ចុកទឹកញាំ)» និងផ្សព្វផ្សាយពីសក្តានុពលទេសចរណ៍ និងអចលនទ្រព្យខេត្តកំពត។ លោក ឱម ផារិន អគ្គនាយកក្រុមហ៊ុនទេសចរណ៍ Charming Cambodia Tours ធ្លាប់បានបញ្ជាក់ថាការធ្វើទេសចរជាកញ្ចប់នេះ មិនគ្រាន់តែផ្តល់ការកម្សាន្តតែមួយមុខប៉ុនណ្ណោះទេ តែក៏ជាឱកាសសម្រាប់សម្លឹងមើលការវិនិយោគលើគម្រោង​អចលនទ្រព្យផងដែរនៅតាមតំបន់សក្តានុពលទេសច​រ។​ លោកថ្លែងថា៖«តាមរយៈការទៅជាមួយកញ្ចាប់ទេសចរ បងប្អូននឹងបានព័ត៌មានលម្អិតជាងមុន ឃើញសក្តានុពលច្បាស់ជាងមុន អ៊ីចឹងបងប្អូនអាចចាប់អារម្មណ៍ទិញដីកន្លែងណាមួយឡូ ឬទិញអចលនទ្រព្យផ្សេងៗដែលអាចបានចំណេញនាពេលខាងមុខ»។

ភ្នំពេញ៖ ខេត្តកំពតកំពុងក្លាយជាគោលដៅទេសចរដ៏លេចធ្លោមួយសម្រាប់ភ្ញៀវទេសចរ​ក្នុងស្រុក និងភ្ញៀវបរទេសដែលកំពុងស្នាក់នៅកម្ពុជា ស្របពេលស្ថានភាពជំងឺ Covid-19 នៅកម្ពុជាបានថមថយ និងអាចគ្រប់គ្រងបាន។ នេះបើយោងតាមការបញ្ជាក់របស់មន្រ្តីជាន់ខ្ពស់ក្រសួងទេសចរ។ ការលើកឡើងនេះធ្វើឡើងក្នុងពិធីសន្និសីទសារព័ត៌មាននៅថ្ងៃសៅរ៍ទី ៦ មិថុនានេះស្តីពី «ការជំរុញកំណើរកម្សាន្តក្នុងស្រុកតាមរយៈកញ្ចប់ទស្សនៈកិច្ចទេសចរណ៍» ក្នុងគោលដៅផ្សព្វផ្សាយពីសក្តានុពលតំបន់ទេសចរ និងជំរុញចលនាទេសចរក្នុងស្រុកក្នុងចំណោមប្រជាពលរដ្ឋខ្មែរ និងបរទេសកំពុងរស់នៅកម្ពុជា។   សន្និសីទព័ត៌មាននេះត្រូវបានរៀបចំឡើងដោយក្រុមហ៊ុនទេសចរណ៍ Charming Cambodia Tours សហការជាមួយបណ្តាញព័ត៌មានអចលនទ្រព្យ Z1 News និង ក្រុមហ៊ុន ហ្វ័ររេស ហាម៉ូនី (Forest Harmony) ដែលជាក្រុមហ៊ុនកំពុងអភិវឌ្ឍន៍គម្រោងវីឡា​ស្នាក់នៅបែបលម្ហែកាយនៅខេត្តកំពត។