អ្នកជំនួញក្នុងវិស័យអចលនទ្រព្យ ៣ រូប ជាប់ឈ្មោះក្នុងបញ្ជីអ្នកមានជាងគេបង្អស់ទាំង៨នៅសឹង្ហបុរី

ដោយ សំ សុផាណែត

សឹង្ហបុរី៖ សារព័ត៌មាន The Straits Times របស់សឹង្ហបុរី កាលពីថ្ងៃអង្គារ៍ បានបង្ហាញឈ្មោះអ្នកមានជាងគេបង្អស់ ៨ រូបនៅសឹង្ហបុរី ដែលបានស្រង់ទិន្នន័យចេញពីកំណត់ត្រាមហាសេដ្ឋីលើពិភពលោករបស់ក្រុមហ៊ុន Bloomberg។

ក្នុងចំណោមមហាសេដ្ឋីទាំង ៨ រូប មាន៣រូប គឺជាមហាសេដ្ឋីដែលមានអាជីវកម្មស្នូលក្នុងវិស័យអចលនទ្រព្យ។ អ្នកផ្សេងទៀតមួយចំនួនក៏មានអាជីវកម្មពាក់ព័ន្ធនឹងការរីកចម្រើននៃវិស័យអចលនទ្រព្យដែរ។

ខាងក្រោមនេះគឺជាមហាសេដ្ឋីទាំង ៨រូបរបស់សឹង្ហបុរី និងអាជីវកម្មដែលធ្វើឲ្យពួកគាត់កើនទ្រព្យសម្បត្តិ

១. មហាសេដ្ឋីទី ១ គឺលោក GOH CHENG LIANG

លោក GOH ជាមហាសេដ្ឋីលំដាប់ទី ១ នៅសឹង្ហបុរី និង ជាមហាសេដ្ឋីលំដាប់ទី ១៤២ នៅលើពិភពលោក។ លោកមានអាយុ ៩២ឆ្នាំ និងមានទ្រព្យសម្បត្តិសរុបចំនួន ១០,៧ ពាន់លានដុល្លារសហរដ្ឋអាមេរិក។

លោក Goh គឺជាស្ថាបនិកក្រុមហ៊ុន Wuthelam Holdings ដែលជាក្រុមហ៊ុនផលិតថ្នាំលាប។ ក្រុមហ៊ុនលោកដែលមានទីតាំងនៅប្រទេសសឹង្ហបុរី ហើយបានដាក់ទុនរួមគ្នាជាមួយក្រុមហ៊ុនផលិតថ្នាំលាបរបស់ជប៉ុន Nippon Paint Holdings ដែលមានបុគ្គលិកជាង ២៣ ០០០នាក់ និងមានប្រតិបត្តិការនៅ ១៧ ប្រទេសរួមមានប្រទេសចិន និងឥណ្ឌាជាដើម។

២. មហាសេដ្ឋីទី ២ គឺលោក WEE CHO YAW

លោក WEE ជាមហាសេដ្ឋីលំដាប់ទី ២ នៅក្នុងប្រទេស សឹង្ហបុរី និងជាមហាសេដ្ឋីលំដាប់ទី ១៨១ នៅលើពិភពលោក។ លោកមានអាយុ ៨៩ឆ្នាំ និងមានទ្រព្យសម្បត្តិសរុបចំនួន ៩,១៤ ពាន់លានដុល្លារសហរដ្ឋអាមេរិក។

លោក Wee Cho Yaw គឺជាម្ចាស់ភាគហ៊ុនធំជាងគេនិងជាប្រធានក្រុមប្រឹក្សាភិបាលនៃធនាគារ United Overseas Bank ដែលជាធនាគារធំជាងគេលំដាប់ទីបីនៅសឹង្ហបុរីគិតតាមទ្រព្យសកម្ម។ ក្រុមហ៊ុនលោកមានសាខា និង ការិយាល័យ ៥០០ កន្លែងនៅក្នុង១៩ ប្រទេស។

៣. មហាសេដ្ឋីទី ៣ គឺលោក LI XITING

លោក LI ជាមហាសេដ្ឋីលំដាប់ទី ៣ នៅសឹង្ហបុរី និងលំដាប់ទី ១៨៩ នៅលើពិភពលោក។ លោកមានអាយុ ៦៨ឆ្នាំ និងមានទ្រព្យសម្បត្តិសរុបចំនួន ៨,៧៣ ពាន់លានដុល្លារអាមេរិក។

លោក LI គឺជាប្រធានក្រុមហ៊ុន Shenzhen Mindray ដែលជាក្រុមហ៊ុនផលិតគ្រឿងបរិក្ខារពេទ្យនៅប្រទេសចិន។ ក្រុមហ៊ុនដែលមានទីតាំងនៅក្នុងទីក្រុង Shenzhen មានប្រាក់ចំណូល ២,៦ ពាន់លានដុល្លារក្នុងឆ្នាំ ២០១៨ ។

៤. មហាសេដ្ឋីលំដាប់ទី ៤ គឺលោកស្រី SHU PING

លោកស្រី SHU ជាមហាសេដ្ឋីលំដាប់ទី ៤ នៅស៊ឹង្ហបុរី និងលំដាប់ទី ២៣០ នៅលើពិភពលោក។ លោកស្រីមានអាយុ ៤៩ឆ្នាំ និងមានទ្រព្យសម្បត្តិសរុបចំនួន ៧,៥១ ពាន់លានដុល្លារសហរដ្ឋអាមេរិក។

លោកស្រី Shu គឺជាសហស្ថាបនិក និង ជានាយកក្រុមហ៊ុន Haidilao International Holding ដែលជាក្រុមហ៊ុនភោជនីយដ្ឋានដ៏ធំបំផុតនៅចិន។ លោកស្រីបានបង្កើតក្រុមហ៊ុនជាមួយស្វាមី ដែលជាមហាសេដ្ឋីដូចគ្នាគឺ លោក Zhang Yong។ អាជីវកម្មដែលមានទីតាំងនៅក្នុង ទីក្រុងប៉េកាំង ដែលមានភោជនីយដ្ឋានច្រើនជាង ៤៦០សាខា មានប្រាក់ចំណូលចំនួន ១៧ ពាន់លានយន់ (៣,៣ ពាន់លានដុល្លារ) នៅឆ្នាំ ២០១៨ ។

លោកស្រី SHU PING និងស្វាមី លោក Zhang Yong

៥. មហាសេដ្ឋីលំដាប់ទី៥ គឺលោក ZHANG YONG

លោក ZHANG (ស្វាមីលោកស្រី SHU PING ) ជាមហាសេដ្ឋីលំដាប់ទី ៥ នៅសឹង្ហបុរី និងលំដាប់ទី ២៣២ នៅលើពិភពលោក។ លោកមានអាយុ ៤៨ឆ្នាំ និងមានទឹកប្រាក់សរុបចំនួន ៧,៤៩ ពាន់លានដុល្លារសហរដ្ឋអាមេរិក។

លោក ZHANG គឺជាសហស្ថាបនិក និង ជានាយកក្រុមហ៊ុន Haidilao International Holding ដែលជាភោជនីយដ្ឋានដ៏ធំជាងគេនៅប្រទេសចិន។ អាជីវកម្មដែលមានទីតាំងនៅក្នុង ទីក្រុងប៉េកាំង ដែលមានភោជនីយដ្ឋានច្រើនជាង ៤៦០សាខា មានប្រាក់ចំណូលចំនួន ១៧ ពាន់លានយន់ (៣,៣ ពាន់លានដុល្លារ) នៅឆ្នាំ ២០១៨ ។

6. មហាសេដ្ឋីលំដាប់ទី ៦ គឺលោកស្រី TAN KIM CHOO

លោកស្រី TAN ជាមហាសេដ្ឋីលំដាប់ទី ៦ នៅក្នុងប្រទេស សឹង្ហបុរី និងលំដាប់ទី ២៩៨ នៅលើពិភពលោក។ លោកស្រីមានទ្រព្យសម្បត្តិសរុបចំនួន ៦,៣២ ពាន់លានដុល្លារសហរដ្ឋអាមេរិក។

លោកស្រី TAN គឺជាម្ចាស់ភាគហ៊ុនធំជាងគេនៃស្ថាប័ន Far East Organization ដែលជាក្រុមហ៊ុនអភិវឌ្ឍន៍អចលនទ្រព្យនៅសិង្ហបុរី។ ក្រុមហ៊ុនមានប្រាក់ចំណូលចំនួន ៤,៥ ពាន់លានដុល្លារក្នុងឆ្នាំ ២០១៨ ហើយបានបញ្ចប់គម្រោងចំនួន ៧៧០ គម្រោង។ លោកស្រី TAN ជាភរិយារបស់មហាសេដ្ឋី Ng Teng Fong ដែលបានទទួលមរណៈភាពទៅហើយ។ លោកស្រីក៏ជាម្ចាស់ភាគហ៊ុនក្រុមហ៊ុនផលិតភេសជ្ជៈ Yeo Hiap Seng និង ក្រុមហ៊ុនអភិវឌ្ឍន៍អចលនទ្រព្យ Far East Orchard ផងដែរ។ លោកស្រីមានកូនប្រុសពីរនាក់ គឺលោក Philip Ng និង លោក Robert Ng ដែលជាសេដ្ឋីលំដាប់ទី ៧ និង ទី ៨។

៧. មហាសេដ្ឋីលំដាប់ទី ៧ គឺលោក PHILIP NG (កូនរបស់លោកស្រី TAN KIM CHOO)

លោក PHILIP ជាមហាសេដ្ឋីលំដាប់ទី ៧ នៅសឹង្ហបុរី និងលំដាប់ទី ៣២៧ នៅលើពិភពលោក។ លោកមានអាយុ ៦១ឆ្នាំ និងមានទឹកប្រាក់សរុបចំនួន ៥,៩៦ ពាន់លានដុល្លារសហរដ្ឋអាមេរិក។

លោក Philip គឺជានាយកប្រតិបត្តិនៃស្ថាប័ន Far East Organization ដែលជាក្រុមហ៊ុនអភិវឌ្ឍន៍អចលនទ្រព្យធំជាងគេបំផុតនៅសឹង្ហបុរី។ ក្រុមហ៊ុនមានប្រាក់ចំណូលចំនួន ៤,៥ ពាន់លានដុល្លារក្នុងឆ្នាំ ២០១៨។ លោក Philip គ្រប់គ្រងក្រុមហ៊ុន Sino Group មានមូលដ្ឋាននៅទីក្រុងហុងកុងជាមួយបងប្រុសរបស់លោកគឺលោក Robert Ng ហើយក៏មានភាគហ៊ុននៅក្នុងក្រុមហ៊ុន Tsim Sha Tsui ដែលជាក្រុមហ៊ុនអភិវឌ្ឍន៍អចលនទ្រព្យមានមូលដ្ឋាននៅហុងកុង។

៨. មហាសេដ្ឋីលំដាប់ទី ៨ គឺលោក ROBERT NG (កូនរបស់លោកស្រី TAN KIM CHOO)

លោក ROBERT ជាមហាសេដ្ឋីលំដាប់ទី ៨ នៅស៊ឹង្ហបុរី និងលំដាប់ទី ៣៣២ នៅលើពិភពលោក។ លោកមានអាយុ ៦៧ឆ្នាំ និងមានទឹកប្រាក់សរុបចំនួន ៥,៩ ពាន់លានដុល្លារសហរដ្ឋអាមេរិក។

លោក ROBERT ជាប្រធានក្រុមហ៊ុនស៊ីណូគ្រុប ដែលជាក្រុមហ៊ុន ប្រតិបត្តិការ អចលនទ្រព្យ មានមូលដ្ឋាននៅទីក្រុងហុងកុង។ Sino Group គឺជាក្រុមហ៊ុនមេរបស់ Conrad Hong Kong និង Fullerton Hotel Singapore។ បងប្អូនលោកទាំងពីនាក់ ក៏ជាអ្នក គ្រប់គ្រងស្ថាប័ន Far East Organization ដែលជាក្រុមហ៊ុនអភិវឌ្ឍន៍អចលនទ្រព្យឯកជនធំជាងគេនៅសឹង្ហបុរី ហើយក៏មានភាគហ៊ុននៅក្នុងក្រុមហ៊ុន Tsim Sha Tsui ផងដែល។