អ្នកជំនាញផ្នែកធនធានមនុស្ស៖ បុគ្គលិកត្រូវត្រៀមខ្លួនដើម្បីដឹកនាំចំណែកណាមួយនៃអាជីវកម្មរបស់ក្រុមហ៊ុន

Bunthoeun Chhut 24/December/2019 18:11

ចែករំលែក

ភ្នំពេញ៖ ក្រុមហ៊ុន Zillennium Co., Ltd ដែលជាក្រុមហ៊ុនសេវាអចលនទ្រព្យធំមួយនៅកម្ពុជា បានរៀបចំវគ្គបណ្តុះបណ្តាលជំនួយស្មារតីមួយនៅថ្ងៃទី២៤ ខែធ្នូឆ្នាំ ២០១៩ ដោយផ្តោតសំខាន់លើជំនាញ «ភាពជាអ្នកដឹកនាំ និងការអភិវឌ្ឍសមត្ថភាពផ្ទាល់ខ្លួន» ដើម្បីពង្រឹងគុណភាពធនធានមនុស្ស។

វគ្គបណ្តុះបណ្តាលដែលមានអ្នកចូលរួមជាង ១០០ នាក់បានទទួលការចូលរួមចែករំលែកចំណេះដឹងពីលោកគ្រូ អួង បូរិន្ធ ជាអ្នកជំនាញផ្នែកបណ្តុះបណ្តាលធនធានមនុស្ស ដែលបានទទួលការអប់រំ Master Trainers ពីស្ថាប័ន Standard for In-Company Trainers for ASEAN countries។

លោកថ្លែងថា៖«មេតែងតែត្រូវការយើងដឹកនាំចំណែកណាមួយនៃប្រតិបត្តិការក្នុងក្រុមហ៊ុន ព្រោះមេមានការងារច្រើនហើយចំណែកខ្លះនៃអាជីវកម្ម គាត់ចេះមិនដល់បុគ្គលិកជំនាញទេ»។ លោកបន្តថា បុគ្គលិកគ្រប់រូបត្រូវបន្តអភិវឌ្ឍន៍សមត្ថភាពផ្ទាល់ខ្លួន និងត្រៀមខ្លួនដើម្បីដឹកនាំតួនាទីដែលមានទំនួលខុសត្រូវកាន់តែធំជាងមុន។ លោកបញ្ជាក់ថា៖«បើយើងធ្វើមិនបាន អ្នកដែលពិបាកចិត្តជាងគេគឺមេ។ ដើម្បីបន្ថយសម្ពាធរបស់គាត់ ដើម្បីឲ្យក្រុមយើងរីកចម្រើន និងដើម្បីខ្លួនឯករីកចម្រើន យើងត្រូវហ៊ានដឹកនាំកាងារ»។

យោងតាមលោកគ្រូ អួង បូរិន្ធ វគ្គបណ្តុះបណ្តាលនេះ ផ្តោតសំខាន់លើចំណុចគន្លឹះបីរួមមាន ការក្រើនរំឮកបុគ្គលិកនីមួយៗនូវអ្វីដែលបានធ្វើកន្លងមកនិងត្រួតពិនិត្យឡើងវិញនូវចំណុចល្អនិងចំណុចខ្វះខាតរបស់ខ្លួន។

ចំណុចគន្លឹះទីពីរសំដៅលើ «ការរីកចម្រើន» ដោយផ្តល់អាទិភាពលើការកែលម្អរចំណុចខ្វះខាតណាមួយតាមរយៈការបង្កើនចំណេះដឹង ជំនាញ និង ឥរិយាបទល្អដើម្បីបន្តការរីកចម្រើនផ្ទាល់ខ្លួន ស្របពេលចំណុចគន្លឹះទីបីសំដៅលើការពង្រឹងភាពក្លាហានដើម្បីដឹកនាំបេសកកម្ម និងតួនាទីខ្លួនឯង និងសកម្មភាពរបស់ខ្លួនឯង។

សិក្ខាកាមដែលចូលរួមក្នុងវគ្គបណ្តុះបណ្តាលនេះរួមមានបុគ្គលិករបស់ក្រុមហ៊ុន Zillennium Co., Ltd បុគ្គលិកពីក្រុមហ៊ុន V Trust Appraisal បុគ្គលិកពីខាង Century 21 Cambodia និង Century 21 Zillion Holding និងបុគ្គលិកពីស្ថាប័នផ្សេងទៀតដែលជាសម្ព័ន្ធរបស់ Zillennium Co.,Ltd ៕