ភាសាខ្មែរ 
English 
ដោយ អាន ស៊ីថាវ
ចំណុចសំខាន់៖
- ស្ថានភាពខ្ចីនិងសងនៅកម្ពុជា មានលក្ខណៈផុយស្រួយនៅឡើយ នេះបើយោងតាមការសិក្សារបស់ស្ថាប័នស្រាវជ្រាវនានា
- រាជបណ្ឌិត្យសភាកម្ពុជា ធ្លាប់រកឃើញថា ខេត្តកំពង់ស្ពឺជាខេត្តរងគ្រោះខ្លាំងដោយសារបំណុល
- អស្ថិរភាពម៉ាក្រូសេដ្ឋកិច្ច ជាកត្តានាំឥណទានមិនដំណើរការ
“ខ្នងបង្អែកនៃគ្រួសារដែលមានបំណុលពីគ្រឹះស្ថានហិរញ្ញវត្ថុនេះ មានលក្ខណៈផុយស្រួយ ជាពិសេសគ្រួសារដែលមានការអប់រំទាប”
គ្រប់គ្នាបានដឹងហើយថា ចាប់តាំងពីរាជរដ្ឋាភិបាលកម្ពុជា បានប្រកាសយកឆ្នាំ២០១៦ ជាឆ្នាំមីក្រូហិរញ្ញវត្ថុ ដោយសារតែនៅពេលនោះ កំណើនឥណទាននៅតំបន់ដាច់ស្រយាល មានល្បឿនខ្លាំង ដែលរាជរដ្ឋាភិបាលជឿជាក់ថា ការចូលរួមចំណែករបស់ឥណទានខ្នាតតូច នឹងជួយលើកស្ទួយសេដ្ឋកិច្ចនៅជនបទ។
ស្របពេលជាមួយគ្នានេះ ប្រទេសកំពុងអភិវឌ្ឍជាច្រើន យល់ឃើញថា មីក្រូហិរញ្ញវត្ថុជាប្រភពដើមទុនខ្នាតតូចមួយ ដែលអាចជួយឱ្យប្រជាពលរដ្ឋដែលមានប្រាក់ចំណូលទាប និងស្ថិតនៅទីក្រីក្រ អាចទទួលបានដើមទុន សម្រាប់ពង្រីកមុខរបរនិងការលូតលាស់សេដ្ឋកិច្ចគ្រួសាររបស់ខ្លួន។ ប៉ុន្តែទៅជាយ៉ាងណាក៏ដោយ ការផ្ដល់ឥណទាននេះ បានផ្ដល់ផលល្អផង និងអវិជ្ជមានផង ដល់ការអភិវឌ្ឍជនបទ ជាពិសេសគ្រួសារក្រីក្រ ដែលប្រើប្រាស់ឥណទានមិនត្រឹមត្រូវ ឬមិនចំគោលដៅ នាំឱ្យមានការខូចខាតឬបាត់បង់ប្រភពសង និងអាយុកាលកូនបំណុលកាន់តែច្រើននិងមានជំងឺ។
បើនិយាយអំពីតួលេខ គឺមានពលរដ្ឋប្រមាណ២លានគ្រួសារ មានជាប់ពាក់ព័ន្ធនឹងឥណទាន ដែលពួកគេបានប្រើប្រាស់ដើម្បីរកចំណូលច្រើនជាងមុន ការចាយវាយ ការប្រើប្រាស់ ភាពជាម្ចាស់នៃទ្រព្យសកម្មផ្សេងៗ និងនិយាយជារួម គឺសកម្មភាពសេដ្ឋកិច្ចនៅទីជនបទ ក៏មានច្រើនជាងមុនជាដើម។
តែយ៉ាងណាក៏ដោយ ក៏ក្នុងខេត្តខ្លះ គេរកឃើញថា មានការផ្ដល់ឥណទានច្រើនលើសពីតម្រូវការ ឬលើសពីកម្រិតប្រាក់ចំណូល របស់ពលរដ្ឋដែលជាអ្នកខ្ចីប្រាក់។ ខេត្តទាំងនោះ រួមមានខេត្តកំពង់ស្ពឺ ព្រះវិហារ ឧត្ដរមានជ័យ និងប៉ៃលិន នេះបើយោងតាមការស្រាវជ្រាវរបស់រាជបណ្ឌិត្យសភាកម្ពុជា។
ចំពោះស្ថានភាពប្រទេសកម្ពុជានៅពេលនេះ ការលូតលាស់នៃការផ្ដល់ឥណទានខ្នាតតូចនេះ ពឹងផ្អែកទាំងស្រុងលើផលិតកម្មក្នុងស្រុក ជាពិសេសវិស័យកសិកម្មដែលពឹងលើទឹកភ្លៀង អាកាសធាតុ និងពឹងផ្អែកទាំងស្រុងលើកម្លាំងពលកម្មយុវជនដែលធ្វើការនៅប្រទេសថៃជាដើម។
បើឈរលើមូលដ្ឋានទាំងនេះ មានន័យថា ខ្នងបង្អែកនៃគ្រួសារដែលជាប់បំណុលពីគ្រឹះស្ថានហិរញ្ញវត្ថុនេះ មានលក្ខណៈផុយស្រួយ ជាពិសេសគ្រួសារដែលមានការអប់រំទាប។ ហើយស្ថានភាពបំណុលធំជាងចំណូលនេះ ធ្លាប់កើតមាននៅប្រទេសថៃ និងឥណ្ឌូនេស៊ី។
ស្ថានភាពនេះ នឹងរឹតតែផុយស្រួយទៅទៀត បើល័ក្ខខ័ណ្ឌម៉ាក្រូសេដ្ឋកិច្ចមិនអំណោយផល ដូចជាឱកាសនៃការនាំចេញធ្លាក់ចុះ គ្រោះធម្មជាតិ រួមទាំងការផ្ដល់សេវារបស់រដ្ឋាភិបាលនានានៅខ្វះខាតសម្រាប់ប្រជាពលរដ្ឋទូទៅ៕
