ភាសាខ្មែរ 
English 
ចំណុចសំខាន់៖
- នៅក្នុងឆ្នាំ២០២២ ក្រុមហ៊ុនប្រកបអាជីវកម្មក្នុងវិស័យសំណង់កើន ២៤ក្រុមហ៊ុនបើធៀបនឹងឆ្នាំ២០២១
- នៅក្នុងឆ្នាំ២០២២ គម្រោងសាងសង់បុរីមានចំនួន ៥១០គម្រោង
- ផ្ទៃក្រឡាកម្រាលសំណង់នៅទូទាំងប្រទេសកម្ពុជា មានចំនួន ១៧៣លានម៉ែត្រការ៉េគិតចាប់ពីឆ្នាំ ២០០០ ដល់ឆ្នាំ២០២២
“បើគ្មានគម្រោងសាងសង់តើសេដ្ឋកិច្ចកម្ពុជានឹងអភិវឌ្ឍលឿនតាមវិធីណា?”
វិស័យសំណង់ កំពុងដើរតួនាទីយ៉ាងសំខាន់ក្នុងការអភិវឌ្ឍកម្ពុជា ដោយរាប់តាំងពីការបង្កើតការងារ ការទាក់ទាញវិនិយោគបរទេស និងការចូលចំណែកនៅក្នុងល្បឿននៃការអភិវឌ្ឍសេដ្ឋកិច្ច។ ទោះបីកម្ពុជា បានរងឥទ្ធិពលអាក្រក់ពីវិបត្តិកូវីដ១៩ និងកលិយុគសេដ្ឋកិច្ចប៉ុន្តែកម្ពុជានៅតែបន្តអនុម័តគម្រោងសាងសង់ នាពេលបច្ចុប្បន្ន។
ស្ថិតិបង្ហាញថា នៅក្នុងឆ្នាំ ២០២២ ក្រសួងរៀបចំដែនដីនគរូបនីយកម្ម និងសំណង់ បានផ្ដល់វិញ្ញាបនបត្រអនុញ្ញាតឱ្យក្រុមហ៊ុនចំនួន ៣៣៦ ក្រុមហ៊ុន ប្រកបអាជីវកម្មក្នុងវិស័យសំណង់ គឺមានការកើនឡើង ២៤ ក្រុមហ៊ុន បើធៀបទៅនឹងឆ្នាំ ២០២១ ដែលមាន ៣១២ ក្រុមហ៊ុន។
តួលេខនេះបញ្ជាក់ថា ទោះកម្ពុជាទទួលរងឥទ្ធិពលអាក្រក់ពីសេដ្ឋកិច្ចសកល តែគម្រោងសាងសង់នៅតែកើន ដែលចំនួនអគារខ្ពស់និងបុរីកើនដល់ជាង ៣ពាន់កន្លែងនៅក្នុងឆ្នាំ២០២២ នេះបើតាមរបាយការណ៍បូកសរុបលទ្ធផលការងារឆ្នាំ២០២២របស់ក្រសួងរៀបចំដែនដីនគរូបនីយកម្ម និងសំណង់ ដែលបានចេញកាលពីថ្ងៃទី២៧ ខែធ្នូ ឆ្នាំ២០២២។
របាយការណ៍ដដែលបង្ហាញទៀតថា ទិន្នន័យសំណង់ទូទាំងប្រទេស មានចំនួន ៣ ៨២៧គម្រោង ដែលមានផ្ទៃក្រឡាកម្រាលសំណង់សរុបចំនួន ៦ ៥៩៦ ៩៣៦ម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ២ ៦៣៤ ៩៩២ ១០០ដុល្លារ ដោយឡែក បើគិតត្រឹមដំណាច់ឆ្នាំ២០២២នេះ គម្រោងអគារខ្ពស់ៗចាប់ពី៥ជាន់ទៅ នៅក្នុងប្រទេសកម្ពុជា បានកើនដល់ ២ ៥៣៤កន្លែង ខណៈដែលគម្រោងបុរីនានាមានចំនួន ៥១០បុរី។
បច្ចុប្បន្នវិស័យសំណង់បានអភិវឌ្ឍជាបន្តបន្ទាប់។បើគិតចាប់តាំងពីឆ្នាំ២០០០ ដល់ខែវិច្ឆិកា ឆ្នាំ២០២២ ក្រសួងបានចេញលិខិតអនុញ្ញាតឱ្យសាងសង់ចំនួន ៦១ ៤១៨គម្រោង ដែលមានផ្ទៃក្រឡាកម្រាលសំណង់សរុបចំនួន ជាង១៧៣ លានម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណជាង ៦៨ ៨៣៧ លានដុល្លារ។
ក្រសួងបានលើកឡើងទៀតថា គម្រោងអគារខ្ពស់ៗ ចាប់ពី៥ជាន់ឡើង មានចំនួន ១២៨គម្រោង ស្មើនឹង ១៤២អគារ (នៅរាជធានីភ្នំពេញចំនួន៨៦គម្រោង ស្មើនឹង៩៣អគារ ខេត្តព្រះសីហនុចំនួន១៤គម្រោង ស្មើនឹង១៦អគារ និងខេត្តបន្ទាយមានជ័យចំនួន១៣គម្រោង ស្មើនឹង១៥អគារ) ក្នុងនោះ ពី៥ជាន់ទៅ៩ជាន់ មានចំនួន៩៩អគារ ពី១០ជាន់ទៅ១៩ជាន់ មានចំនួន២៤អគារពី២០ទៅ២៩ជាន់ មានចំនួន១៣អគារ និងពី៣០ ជាន់ ទៅ៣៩ជាន់ មានចំនួន៦អគារ។
ចំណែកសំណង់លំនៅឋានមានចំនួន៤ ៣២១គម្រោង មានផ្ទៃក្រឡាកម្រាលសំណង់សរុប៣ ៧០៧ ៤៥៨ម៉ែត្រការ៉េ ដែលមានតម្លៃប៉ាន់ស្មានទុនវិនិយោគជាង ១ ៤១២ លានដុល្លារ៕
