ហេដ្ឋារចនាសម្ព័ន្ធធំៗជិត១០ កំពុងសាងសង់និងសិក្សាលទ្ធភាពអភិវឌ្ឍមានតម្លៃវិនិយោគសរុប ៣០ប៊ីលានដុល្លារ

ចំណុចសំខាន់

• គម្រោងហេដ្ឋារចនាសម្ព័ន្ធធំៗកំពុងអភិវឌ្ឍ និងសិក្សាលទ្ធភាពសង់មានតម្លៃសរុប ៣០ប៊ីលានដុល្លារ
• ការអភិវឌ្ឍហេដ្ឋារចនាសម្ព័ន្ធកន្លងមកតែងផ្តល់អត្ថប្រយោជន៍ធំ៥ ដល់វិស័យអចលនទ្រព្យ
• ឥទ្ធិពលវិជ្ជមានតែងកើតមានលើសេដ្ឋកិច្ចក្នុងស្រុកតាមរយៈការបង្កើតការងារ និងជំរុញកំណើនសេដ្ឋកិច្ច

ប្រទេសកម្ពុជាបានរីកចម្រើន និងអភិវឌ្ឍសេដ្ឋកិច្ចយ៉ាងឆាប់រហ័ស ដោយមានគម្រោងហេដ្ឋារចនាសម្ព័ន្ធធំៗជាច្រើនកំពុងត្រូវបានអភិវឌ្ឍ។ គម្រោងទាំងនេះមានទឹកប្រាក់វិនិយោគបូកបញ្ចូលគ្នារហូតដល់ទៅ ៣០ ប៊ីលានដុល្លារ ហើយនឹងផ្តល់ផលវិជ្ជមានច្រើនដល់វិស័យអចលនទ្រព្យ។ ក្នុងចំណោមវិនិយោគធំៗ គម្រោងទីក្រុងរាម តម្លៃ ១៦​ប៊ីលានដុល្លារបានបើកការដ្ឋានអភិវឌ្ឍ ហើយ​រំពឹង​ថា​នឹង​បញ្ចប់​នៅ​ឆ្នាំ​២០២៨។ បន្ថែមលើនេះ មានគម្រោងជាច្រើនផ្សេងទៀត ដូចជា គម្រោងផ្លូវដែកល្បឿនលឿនមានទឹកប្រាក់ចំនួន ៤ប៊ីលានដុល្លារ តភ្ជាប់ទីក្រុងភ្នំពេញ និងប៉ោយប៉ែត គម្រោងតភ្ជាប់ផ្លូវដែកល្បឿនលឿនពីភ្នំពេញទៅបាវិត គម្រោងផ្លូវល្បឿនលឿនតម្លៃ ១,៤ប៊ីលានតភ្ជាប់រាជធានីភ្នំពេញទៅបាវិត ស្របពេលគម្រោងផ្លូវល្បឿនលឿនប្រវែង ១៩០ គីឡូម៉ែត្រដែលចំណាយទុនវិនិយោគ ២ប៊ីលានដុល្លារ បានបើកដំណើរការរួចហើយតភ្ជាប់ពីរាជធានីភ្នំពេញ និងខេត្តព្រះសីហនុ។​

លើសពីនេះ អាកាសយានដ្ឋានភ្នំពេញថ្មីតម្លៃ ១,៥ ប៊ីលានដុល្លារកំពុងសាងសង់យ៉ាងសកម្ម ហើយរំពឹងថានឹងបើកដំណើរការនៅឆ្នាំ ២០២៥ ខណៈអាកាសយានដ្ឋានសៀមរាបតម្លៃ ៨៨០លានដុល្លារគ្រោងនឹងបើកនៅដំណើរការនៅខែតុលាឆ្នាំនេះ ស្របពេលគម្រោងអាកាសយានដ្ឋានអន្តរជាតិតម្លៃ ៣០០លានដុល្លារ ផ្សេងទៀតនឹងត្រូវសាងសង់នៅលើកោះរ៉ុង។

ខាងក្រោមនេះ គឺជាផលវិជ្ជមាន៥ ដែលគម្រោងហេដ្ឋារចនាសម្ព័ន្ធធំៗផ្តល់អត្ថប្រយោជន៍ដល់វិស័យអចលនទ្រព្យ។

១ – បង្កើនតម្លៃអចលនទ្រព្យ៖ ការអភិវឌ្ឍហេដ្ឋារចនាសម្ព័ន្ធអាចបង្កើនតម្លៃអចលនទ្រព្យដែលមានទីតាំងនៅជិតគម្រោងហេដ្ឋារចនាសម្ព័ន្ធថ្មី។

២ – ការតភ្ជាប់កាន់តែប្រសើរ៖ ការកែលម្អហេដ្ឋារចនាសម្ព័ន្ធដូចជាបណ្តាញផ្លូវថ្នល់ អាកាសយានដ្ឋាន និងប្រព័ន្ធដឹកជញ្ជូនសាធារណៈអាចបង្កើនការតភ្ជាប់ ដែលផ្តល់ភាពងាយស្រួលសម្រាប់មនុស្សក្នុងការផ្លាស់ទី និងចូលទៅកាន់ផ្នែកផ្សេងៗនៃទីក្រុង។ នេះអាចបង្កើនតម្រូវការអចលនទ្រព្យនៅក្នុងតំបន់នោះ ជាពិសេសប្រសិនបើពីមុនវាពិបាកទៅដល់ ឬមានទំនាក់ទំនងមិនល្អ។

៣ – មានតម្លៃជួលខ្ពស់៖ ដោយសារតម្រូវការអចលនទ្រព្យក្នុងតំបន់កើនឡើង តម្លៃជួលក៏អាចកើនឡើងដែរ។ ម្ចាស់អចលនទ្រព្យអាចគិតថ្លៃជួលខ្ពស់សម្រាប់អចលនទ្រព្យនៅក្នុងតំបន់ដែលមានហេដ្ឋារចនាសម្ព័ន្ធល្អប្រសើរ ជាពិសេសប្រសិនបើតំបន់នេះកាន់តែមានប្រជាប្រិយភាពដោយសារគម្រោងហេដ្ឋារចនាសម្ព័ន្ធថ្មីនោះ។

៤ – ឱកាសអភិវឌ្ឍន៍កាន់តែច្រើន៖ គម្រោងហេដ្ឋារចនាសម្ព័ន្ធថ្មីក៏អាចបង្កើតឱកាសសម្រាប់គម្រោងអភិវឌ្ឍន៍ថ្មីៗដែរ។ អ្នកអភិវឌ្ឍន៍លំនៅឋាន ឬរីហ្សតនានានឹងសាងសង់អចលនទ្រព្យថ្មីនៅក្នុងតំបន់ដែលពីមុនមិនមានការអភិវឌ្ឍ ដែលអាចនាំឱ្យមានឱកាសវិនិយោគថ្មីសម្រាប់អ្នកវិនិយោគអចលនទ្រព្យ។

៥ – ផ្តល់ផលវិជ្ជមានដល់សេដ្ឋកិច្ច៖ ការអភិវឌ្ឍន៍ហេដ្ឋារចនាសម្ព័ន្ធអាចមានឥទ្ធិពលវិជ្ជមានលើសេដ្ឋកិច្ចក្នុងស្រុក តាមរយៈការបង្កើតការងារ និងជំរុញកំណើនសេដ្ឋកិច្ច ដែលអាចទាក់ទាញអាជីវកម្ម និងមនុស្សកាន់តែច្រើនមកកាន់តំបន់អភិវឌ្ឍទាំងនោះ។ នេះអាចបង្កើនតម្រូវការអចលនទ្រព្យ ដែលនាំឱ្យតម្លៃអចលនទ្រព្យកើនឡើង និងការជួលបានថ្លៃ។

សរុបមក ការអភិវឌ្ឍហេដ្ឋារចនាសម្ព័ន្ធនៅកម្ពុជាអាចមានឥទ្ធិពលខ្លាំងដល់ទីផ្សារអចលនទ្រព្យ។ វាអាចបង្កើតឱកាសវិនិយោគថ្មី និងបង្កើនតម្លៃនៃអចលនទ្រព្យដែលមានស្រាប់។ នៅពេលដែលប្រទេសកម្ពុជាបន្តអភិវឌ្ឍ អ្នកវិនិយោគអចលនទ្រព្យអាចទទួលបានអត្ថប្រយោជន៍ពីការវិនិយោគលើតំបន់ដែលមានគម្រោងហេដ្ឋារចនាសម្ព័ន្ធថ្មី ឬគ្រោងទុក។