បច្ចេកវិទ្យាជាការងារមានសក្ដានុពលនៃវិស័យសេដ្ឋកិច្ចឌីជីថល

ចំណុចសំខាន់៖

- ការស្រាវជ្រាវនានារកឃើញថា ប្រមាណ៦០% ជួយឱ្យយុវជនទទួលបានការងារធ្វើ បើគាត់មានជំនាញឌីជីថលជាមូលដ្ឋាន
- បច្ចុប្បន្នយុវជនប្រមាណ១២%ប៉ុណ្ណោះ មានជំនាញឌីជីថល ដែលជួយធានាដល់និរន្តរភាពការងាររបស់គេ
- យុវជនកម្ពុជាប្រមាណ៨៧%ពុំមានជំនាញឌីជីថលសមស្រប ដែលអាចឆ្លើយតបនឹងតម្រូវការរបស់វិស័យឯកជនដែលចង់បាន

ការផ្លាស់ប្តូរទៅជាសេដ្ឋកិច្ចឌីជីថល ជាវិស័យអាទិភាពខ្ពស់បំផុត សម្រាប់ប្រទេសកំពុងអភិវឌ្ឍដូចជាកម្ពុជា ដែលត្រូវរកចំណុចខ្លាំងរបស់ខ្លួន ដើម្បីបង្កើនសក្ដានុពលសេដ្ឋកិច្ចឌីជីថល។ ការសិក្សានានារកឃើញថា សេដ្ឋកិច្ចឌីជីថល មានឥទ្ធិពលវិជ្ជមានលើការបង្កើតការងារ កំណើនផលិតភាព និងការច្នៃប្រឌិត ឬការបង្កើតថ្មី ដើម្បីជំរុញល្បឿននៃការអភិវឌ្ឍ កាន់តែឆាប់រហ័ស។
ក្រៅពីនេះ ការផ្លាស់ប្ដូរសេដ្ឋកិច្ចឌីជីថល បានចូលចំណែកប្រកបដោយប្រសិទ្ធភាពខ្ពស់ ចំពោះបញ្ហាសង្គម ឬការអភិវឌ្ឍនានាដូចជា ការទទួលនិងផ្ដល់សេវាសាធារណៈប្រកបដោយតម្លាភាព ការយល់ដឹងអំពីបញ្ហាសង្គម និងការផ្ដល់ជំនួយ នៅពេលដែលប្រជាពលរដ្ឋជួបការលំបាក។
ប៉ុន្តែវិស័យបច្ចេកវិទ្យាឌីជីថលនៅកម្ពុជា មានការអភិវឌ្ឍតិចតួចប៉ុណ្ណោះនាពេលបច្ចុប្បន្ននេះ។
អគ្គនាយកក្រុមហ៊ុន Flexible Solution លោក សុង ហេង
អគ្គនាយកក្រុមហ៊ុន Flexible Solution លោក សុង ហេង លើកឡើងថា ការងារផ្នែកបច្ចេកវិទ្យាឌីជីថលមានតម្រូវការខ្ពស់នៅកម្ពុជា។ ប៉ុន្តែការផ្គត់ផ្គង់ផ្នែកនេះវិញ មានតិចតួចមិនទាន់ឆ្លើយតបនឹងតម្រូវការរបស់វិស័យឯកជនឡើយ។
លោកបន្ថែមថា តម្រូវការផ្នែកបច្ចេកវិទ្យាឌីជីថល គឺមានកំណើនខ្លាំងដោយសារកម្ពុជាបានចាប់យកវិស័យឧស្សហកម្ម៤.០ គាំទ្រដល់ការអភិវឌ្ឍសេដ្ឋកិច្ចកម្ពុជា។
យោងតាមការស្រាវជ្រាវរបស់ក្រសួងសេដ្ឋកិច្ចនិងហិរញ្ញវត្ថុកម្ពុជា សេដ្ឋកិច្ចឌីជីថលមានលក្ខណៈពិសេស៤ចំណុចដែលខុសពីសេដ្ឋកិច្ចបែបប្រពៃណី ក្នុងនោះ ១. ការមិនផ្ដោតខ្លាំងលើទីតាំងភូមិសាស្រ្ត ២. តួនាទីរបស់ថ្នាល (platform) ៣. ឥទ្ធិពលនៃបណ្ដាញ និង ៤. ការប្រើប្រាស់ទិន្នន័យធំ (big data)។
របាយការណ៍ដដែល បង្ហាញទៀតថា ការវាយតម្លៃជាលក្ខណៈអន្តរជាតិរកឃើញថា ការត្រៀមខ្លួនរបស់កម្ពុជា ក្នុងការចាប់យកវិស័យឌីជីថល ស្ថិតនៅកម្រិតទាប។ ជាក់ស្ដែង ចំពោះកត្តាជំរុញការត្រៀមខ្លួន កម្ពុជាឈរនៅលេខរៀងទី១០២ ក្នុងចំណោមប្រទេស១៤១ ឬឈរនៅលេខ៧ នៅអាស៊ាន ដែលត្រូវបានគេចាត់ទុកជាប្រទេស ដែលមានល្បឿនទាបក្នុងការត្រៀមខ្លួនផ្នែកឌីជីថល ជាពិសេសផ្នែកការអភិវឌ្ឍធនធានមនុស្ស និងការចាប់យកបច្ចេកវិទ្យា។ ការចាប់យកបច្ចេកវិទ្យាក្នុងចំណោមរដ្ឋាភិបាល និងធុរកិច្ចនៅមានកម្រិតទាបនៅឡើយ។
ប្រធានក្រុមប្រឹក្សាភិបាល នៃក្រុមហ៊ុនZillenuim Group លោក គុយ វ៉ាត
បញ្ហានេះ ប្រធានក្រុមប្រឹក្សាភិបាល នៃក្រុមហ៊ុនZillenuim Group លោក គុយ វ៉ាត លើកឡើងថា ការជួយគ្នានិងបណ្ដុះបណ្ដាលធនធានផ្នែកឌីជីថលគឺមានសារៈសំខាន់សម្រាប់ការអភិវឌ្ឍក្រុមហ៊ុននិងប្រទេសកម្ពុជា។ ចំណុចសំខាន់នៃកម្មវិធីសិក្សា គឺរៀនផង ធ្វើការងារផង និងទទួលបានបទពិសោធន៍ លើការអភិវឌ្ឍវិជ្ជាជីវៈនិងសមត្ថភាពខ្លួនឯង។ ហើយមូលដ្ឋានចំណេះដឹងជាចំណុចសំខាន់ ដើម្បីធ្វើឱ្យយើងសម្រេចបានល្អនូវជីវភាពរស់នៅប្រចាំថ្ងៃ។
ឆ្លើយតបទៅបញ្ហានេះ អគ្គនាយកនៃក្រុមហ៊ុន Flexible Solution លោក សុង ហេង លើកឡើងថាក្រុមហ៊ុនរបស់យើង កំពុងរៀបចំបណ្ដុះបណ្ដាញធនធានផ្នែកឌីជីថលនៅកន្លែងផ្ទាល់ ចំនួន៣០០០នាក់បន្ថែម ដើម្បីឆ្លើយតបនឹងទីផ្សារការងារ។
លោកបន្ថែមថា បំណងនៃការបណ្ដុះបណ្ដាល (On-the-job training) ចូលរួមចំណែកសេដ្ឋកិច្ចឌីជីល ១០ដងក្នុងសេដ្ឋកិច្ចកម្ពុជា និងបណ្ដុះបណ្ដាលធនធានឱ្យច្រើននិងចែករំលែកធនធានឆ្លើយតបនឹងតម្រូវការ និងឆ្លើយតបតម្រូវការរបស់ក្រុមហ៊ុន។ លោកបញ្ជាក់ទៀតថា រៀនផងនិងធ្វើការងារផង (on- the-job training) ក្នុងរយៈពេល៦ខែទៅ១ឆ្នាំ ជួយអភិវឌ្ឍសមត្ថភាពលឿន និងចំណាយតិច ក្នុងការទទួលបានការងារធ្វើជាក់លាក់។
របាយការណ៍របស់រាជរដ្ឋាភិបាលកម្ពុជា បានបង្ហាញថា កម្ពុជាជាប្រទេសដែលសម្រេចបានកំណើនសេដ្ឋកិច្ចខ្ពស់នៅក្នុងតំបន់ ប្រកបដោយជវភាព និងមានអំណោយផលលើផ្នែកប្រជាសាស្រ្ត សម្រាប់បន្តជំរុញការអភិវឌ្ឍប្រទេស តាមរយៈការអភិវឌ្ឍឧស្សាហកម្មទីបួន និងផ្នែកឌីជីថល។ បច្ចុប្បន្ន កម្ពុជាមានយុវជនដែលពេញកម្លាំងប្រមាណ៦លាននាក់ដែលមានអាយុចន្លោះពី១៥ឆ្នាំ ទៅ៣៥ឆ្នាំ ដែលជាធនធានសំខាន់សម្រាប់ផ្នែកអភិវឌ្ឍឌីជីថល ចូលរួមនៅក្នុងសង្គមកាន់តែឆាប់រហ័ស តាមរយៈភាពងាយទទួលយក និងការចាប់យកបច្ចេកវិទ្យាថ្មីសម្រាប់អភិវឌ្ឍសេដ្ឋកិច្ច៕