ការមកដល់នៃកំណើនភ្ញៀវទេសចរអន្តរជាតិ និងរំហូរវិនិយោគចំពោះទីផ្សារខុនដូនៅកម្ពុជា

ការរំពឹងនៃការងើបឡើងវិញនៃកំណើនភ្ញៀវទេសចរអន្តរជាតិ និងរំហូរវិនិយោគពីក្រៅប្រទេស នឹងក្លាយជាកត្តារុញច្រានដ៏សំខាន់សម្រាប់ទីផ្សារអចលនទ្រព្យនៅកម្ពុជា ជាពិសេសគឺបង្កើនឱ្យមានតម្រូវការលើប្រតិបត្តិការទិញ-លក់ ឬជួលក្នុងទីផ្សារខុនដូ។

ការមកដល់របស់ភ្ញៀវទេសចរអន្តរជាតិ

ការមកដល់របស់ភ្ញៀវទេសចរអន្តរជាតិចូលកម្ពុជាបានបង្ហាញពីសញ្ញាល្អប្រសើរឡើងវិញ បន្ទាប់ពីរដ្ឋាភិបាលកម្ពុជាអាចគ្រប់ស្ថានភាពជំងឺកូវីដ-១៩ បានដោយជោគជ័យ និងកំពុងដាក់ចេញវិធានការសំខាន់ៗដើម្បីស្តារសេដ្ឋកិច្ចឱ្យងើបឡើងវិញ។ ភាពជោគជ័យក្នុងការគ្រប់គ្រងជំងឺកូវីដ-១៩ បានធ្វើឱ្យកម្ពុជាទទួលបានទំនុកចិត្តក្នុងចំណោមភ្ញៀវទេសចរណ៍បរទេសជាទិសដៅដ៏មានសក្តានុពលសម្រាប់ដំណើរកម្សាន្ត។ ជាក់ស្តែង ក្នុងឆ្នាំ២០២២ កម្ពុជាទទួលបានភ្ញៀវទេសចរអន្តរជាតិជាង ២លាននាក់។ នេះបើតាមទិន្នន័យរបស់ក្រសួងទេសចរណ៍។ ស្របពេលដែលរដ្ឋាភិបាលប្រទេសបានសម្រេចដកចេញនូវវិធានការណ៍ដ៍តឹងរឹងក្នុងការទប់ស្កាត់ជំងឺកូវីដ-១៩ ព្រមទាំងសម្រេចបើកព្រំដែនឡើងវិញ ដែលកត្តានេះកម្ពុជារំពឹងថានៅឆ្នាំ ២០២៣ន អាចទទួលភ្ញៀវទេសចរអន្តរជាតិដល់ ៤លាននាក់ ដែលភាគច្រើនគឺជាភ្ញៀវទេសចរជនជាតិចិន។

រំហូរវិនិយោគពីក្រៅចាក់បញ្ចូលទៅក្នុងសេដ្ឋកិច្ចកម្ពុជា

រំហូរវិនិយោគផ្ទាល់ពីបរទេសដែលចាក់បញ្ចូលទៅក្នុងសេដ្ឋកិច្ចកម្ពុជា សម្រចបានទំហំទឹកប្រាក់ប្រហែល ៤,៧ ពាន់លានដុល្លារកាលពីឆ្នាំ ២០២២ ដែលបង្ហាញការកើនឡើងជាង ៧ ភាគរយធៀបនឹងឆ្នាំ២០២១។ នេះបើតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា។ បើតាមប្រភពដដែលបានបង្ហាញទៀតថា ការវិនិយោគទាំងនេះភាគច្រើនគឺជាវិនិយោគមកពីប្រទេសក្នុងតំបន់អាស៊ីមានដូចជា ចិន ជប៉ុន កោះកៃម៉ាន ប្រទេសថៃ និងសិង្ហបុរី ហើយការវិនិយោគរបស់វិនិយោគិនបរទេសទាំងនេះគឺភាគច្រើនផ្តោតលើវិស័យកសិកម្ម និងកសិឧស្សាហកម្ម ផលិតកម្ម ទេសចរណ៍ និងហេដ្ឋារចនាសម្ព័ន្ធ។

កត្តាតម្រូវការ និងការផ្គត់ផ្គង់

ការផ្គត់ផ្គង់ខុនដូនៅក្នុងប្រទេសកម្ពុជាមានចំនួន ៤១ ០០០យូនីតក្នុងឆ្នាំ ២០២២ ដែលរួមមានខុនដូបីប្រភេទគឺតម្លៃសមរម្យ មធ្យម និងកម្រិតខ្ពស់។ តម្លៃខុនដូ បានធ្លាក់ចុះពី ១១% ទៅ ២៣% បើធៀបទៅនឹងឆ្នាំ ២០១៩ ពោលគឺមុនពេលផ្ទុះឡើងនៃជំងឺកូវីដ-១៩។ នេះបើយោងតាមការព្យាករណ៍ទីផ្សារអចលនទ្រព្យ២០២៣ របស់ក្រុមហ៊ុន CBRE Cambodia។ ចំណែកឯ ការជួលប្រចាំខែនៃខុនដូកម្រិតមធ្យម និងកម្រិតខ្ពស់ ក៏បានបង្ហាញការធ្លាក់ចុះចន្លោះពី ២៤% ទៅ ២៦%។ ការធ្លាក់ចុះនៃតម្លៃលក់ និងការជួលនេះត្រូវបានមើលឃើញថា ដោយសារតែការផ្គត់ផ្គង់ខុនដូមានច្រើនលើសលប់ក្នុងពេលបច្ចុប្បន្ន និងការថមថយនៃការវិនិយោគពីបរទេសនៅក្នុងគម្រោងអភិវឌ្ឍន៍អចលនទ្រព្យ។

ការមើលឃើញរបស់អ្នកជំនាញ

អ្នកជំនាញក្នុងវិស័យទេសចរណ៍ និងវិស័យអចលនទ្រព្យសុទ្ធសឹង តែបានបង្ហាញសុទ្ធិដ្ឋិនិយម ចំពោះការងើបឡើងវិញនៃការមកដល់ភ្ញៀវទេសចរណ៍អន្តរជាតិ ដែលនឹងរុញច្រានសកម្មភាពសេដ្ឋកិច្ចឱ្យស្ទុះងើបឡើងវិញ។ ហើយវិស័យដែលអាចទទួលបានផលច្រើនជាងគេគឺសកម្មភាពក្នុងវិស័យទេសចរណ៍រាប់ពីភោជនីយដ្ឋាន បដិសណ្ឋារកិច្ច រហូតដល់សេវាមគ្គុទេស និងវិស័យបន្ទាប់គឺទំនងអាចជាទីផ្សារអចលនទ្រព្យ។

ឧកញ៉ា សៀង មុំសោភា សមាជិកក្រុមប្រឹក្សាភិបាលសមាគមទេសចរណ៍កម្ពុជា បានលើកឡើងថា៖ “នៅពេលដែលបើកចំហឱ្យមានជើងហោះហើរកាន់តែច្រើន មិនមែនមានតែកំណើនភ្ញៀវទេសចរអន្តរជាតិទេ អ្នកវិនិយោគបរទេសក៏ចាប់ផ្តើមវិលត្រលប់មកស្វែងរកឱកាសវិនិយោគនៅកម្ពុជាឡើងវិញដែរ។ ដែលកត្តានេះនឹងជំរុញឱ្យវិស័យអចលនទ្រព្យស្ទុះងើបឡើងវិញជាថ្មីម្តងទៀត។”