អចលនទ្រព្យជួល ជួយបុរសវ័យក្មេងរូបនេះបង្កើនទ្រព្យមានតម្លៃរាប់លានដុល្លារ​

« លុយដែលខ្ញុំរកបាន មិនបានធ្វើឲ្យគោលបំណងធំបំផុតរបស់ខ្ញុំផ្លាស់ប្ដូរនោះទេ។ ផ្ទុយទៅវិញ លុយទាំងអស់នោះ បានបង្ហាញឲ្យខ្ញុំឃើញថា នៅពេលដែលយើងមានហេតុផលគ្រប់គ្រាន់ក្នុងការធ្វើអ្វីមួយ និងការតាំងចិត្តមុតមាំ នោះអ្វីៗក៏អាចទៅរួចដែរ»

Sahil Mehta អ្នកវិនិយោគអចលនទ្រព្យវ័យក្មេង ដែលផ្តើមពីប្រាក់សន្សំ

ផ្តើមពីលុយសន្សំដែលរកបានពីការងារជាបុគ្គលិកផ្នែកលក់ក្នុងក្រុមហ៊ុនអចលនទ្រព្យមួយនៅសហរដ្ឋអាមេរិក លោក Sahil Mehta ដែលមានវ័យទើបតែ២៦ឆ្នាំ បានបង្កើតចំណូលពីអចលនទ្រព្យ​ជួល ហើយចំណូលនោះយកទៅបង្កើនទ្រព្យដែលមានរហូតដល់ជិត ១០លានដុល្លារ។

មានដើមកំណើតជាជនឥណ្ឌា Sahil Mehta បានផ្តើមប្រឡូក​ការងារដំបូងក្នុងឆ្នាំ២០១៥ ជាអ្នកលក់អចលនទ្រព្យក្នុងក្រុមហ៊ុនអចលនទ្រព្យ Golden Gate Sotheby’s International Realty ស្ថិតក្នុងរដ្ឋកាលីហ្វញ៉ា សហរដ្ឋអាមេរិក ស្របពេលដែលលោកកំពុងបន្តការសិក្សាថ្នាក់មហាវិទ្យាល័យនៅទីនោះ។

អចលនទ្រព្យ​ ជាការងារដែល Mehta ស្រលាញ់ពេញចិត្ត ហើយឱកាសការងារនាពេលនោះបានផ្តល់លទ្ធភាពដល់បុរសវ័យក្មេង​រូបនេះ អាចសន្សំប្រាក់ពីកម្រៃជើងសារដែលរកបាន យកទៅទិញបានផ្ទះមួយកន្លែង ក្នុងរយៈពេលត្រឹមតែ២ឆ្នាំប៉ុណ្ណោះ ពោលគឺនៅឆ្នាំ២០១៧។ ទម្លាប់នៃការប្រើប្រាស់ហិរញ្ញវត្ថុបានត្រឹមត្រូវពីការចំណាយ និងការសន្សំ បានធ្វើឱ្យ Mehta បានបង្កើតទ្រព្យជាបន្តបន្ទាប់ និងអាចចាប់ផ្តើមបើកក្រុមហ៊ុនគ្រប់គ្រងអចលនទ្រព្យតូចមួយជាមួយបងប្រុសបង្កើត​។

បច្ចុប្បន្ន Mehta បានប្រមូលទិញអចលនទ្រព្យរហូតដល់៥​កន្លែងឋិតក្នុងក្រុង Berkeley  ក្នុងរដ្ឋកាលីហ្វញ៉ា  ដែលមានតម្លៃជិត ១០លានដុល្លារ។ ក្នុងនោះអចលនទ្រព្យ៤ កន្លែង​បានដាក់ជួលទៅ​ឱ្យនិស្សិត និង អចលនទ្រព្យមួយកន្លែងទៀតគឺសម្រាប់រស់នៅខ្លួនឯង និងដាក់ជួលនៅលើផ្លេតហ្វម Airbnb។ (ចុចទីនេះស្វែងយល់ពី Airbnb)។

ចំណូលពីការជួលអចលនទ្រព្យទាំងនេះ បូកនឹងចំណូលពីការងារ  Mehta អាចរកប្រាក់ចំណូលដុលរហូតដល់ជាង កន្លះលានដុល្លារក្នុងមួយឆ្នាំ។

នេះជាខ្ទង់ចំណូល និងផែនការចំណាយប្រចាំខែ របស់ Mehta

ការវិនិយោគអចលនទ្រព្យ​ទាមទារឱ្យមានដើមទុនច្រើន ដើម្បីប្រឡូកក្នុងវិស័យនេះ។ Mehta បានចាត់ទុកការទទួលការងារជាមួយក្រុមហ៊ុនអចលនទ្រព្យ Golden Gate Sotheby’s International Realty ក្នុងអំឡុងពេលបន្តការសិក្សាមហាវិទ្យា ជាភ័ព្វសំណាងមួយដែលចាប់ផ្តើមប្រឡូកការងារដំបូង ហើយអាចសន្សំលុយបានច្រើនទាំងវ័យក្មេង។

ទោះបីជារកចំណូលបានច្រើនក្ដី Mehta និងបងប្រុសរបស់ខ្លួននៅតែព្យាយាមសន្សំលុយឲ្យបានច្រើន តាមដែលអាចធ្វើទៅបាន និងជៀសវាងការចំណាយលុយដែលមិនចាំបាច់ ដើម្បីទុកលុយទាំងនោះយកទៅវិនិយោគលើអចលនទ្រព្យឲ្យបានកាន់តែច្រើនបន្ថែមទៀត។

«ឧបសគ្គធំបំផុតនៃការចាប់ផ្ដើមដំបូងក្នុងវិស័យនេះគឺការតម្រូវឲ្យមានលុយច្រើន ដូច្នេះហើយ ពួកយើងនឹងព្យាយាមពង្រីកការវិនិយោគរបស់ពួកយើងដើម្បីជំរុញឲ្យអាជីវកម្មមួយនេះ កាន់តែរីកចម្រើនឲ្យបានច្រើនបំផុតតាមដែលអាចធ្វើទៅបាន»។

ការចេះសន្សំលុយ និងការចាយវាយត្រឹមត្រូវគឺជារឿងសំខាន់ ហើយចំពោះករណី Mehta អាចជាគំរូល្អ និងជាភាពឆ្លាតវៃ ក្នុងការប្រើប្រាស់លុយសន្សំបានបន្តិចម្តងៗទៅបង្កើតជាទ្រព្យតម្លៃខ្ទង់លានដុល្លារ។ ដូច្នេះការចែករំលែក​បទពិសោធន៍នៃការប្រើប្រាស់លុយ និងចាប់ផ្តើមវិនិយោគពីវ័យក្មេង ​សង្ឃឹមថានឹងជួយលើកទឹកចិត្តដល់អ្នកដទៃទៀតក្នុងចាប់ផ្តើមវិនិយោគក្នុងវិស័យដ៏មានសក្តានុពលនេះ៕

​ប្រភព៖ CNBC

ប្រែសម្រួលអត្ថបទ៖ ស្រីណែត