អចលនទ្រព្យមានចំណែកធំជាងគេ ទាក់ទាញការវិនិយោគពីក្រៅប្រទេស

«អចលនទ្រព្យ និងសំណង់ នៅតែដើរតួជាចន្ទល់នៃសេដ្ឋកិច្ចរបស់យើង ហើយក្នុងរយៈពេលមធ្យមយើងត្រូវការវិស័យនេះ ដើម្បីជួយទ្រទ្រង់ដល់កំណើនសេដ្ឋកិច្ច»

វិស័យអចលនទ្រព្យរក្សាបានកំណើនយ៉ាងរឹងមាំរយៈពេលជិត៣០ឆ្នាំចុងក្រោយនេះ ដោយរួមចំណែកដ៏សំខាន់ក្នុងការរុញច្រានកំណើនសេដ្ឋកិច្ចនៅកម្ពុជា តាមរយៈការទាក់ទាញរំហូរវិនិយោគផ្ទាល់ពីបរទេស (FDI) ដែលមានចំណែកធំជាងគេ បើធៀបនឹងវិស័យសក្តានុពលផ្សេងៗទៀត។ នេះបើតាមស្ថិតិធនាគារជាតិនៃកម្ពុជា។

កំណើននៃការវិនិយោគនេះបានបង្ហាញថា អចលនទ្រព្យនៅតែជាវិស័យដ៏មានសក្តានុពល ដែលបានបង្កើតឱកាសជាច្រើនដល់អ្នកប្រកបអាជីពក្នុវិស័យនេះ ព្រមទាំងអ្នកវិនិយោគក្នុងស្រុក និងបរទេស ដែលបណ្តាក់ទុនវិនិយោគនៅកម្ពុជា។

យោងតាមស្ថិតិសង្ខេបស្តីពីស្ថានភាពវិនិយោគផ្ទាល់ពីបរទេសចេញផ្សាយដោយធនាគារជាតិនៃកម្ពុជា កាលពីសប្តាហ៍មុន បានបង្ហាញថា ទុន FDI ដែលបានចាក់បញ្ចូលទៅក្នុងសេដ្ឋកិច្ចកម្ពុជាមានប្រមាណ ៤១ ពាន់លានដុល្លារអាមេរិក ដែលគិតចាប់ពីឆ្នាំ១៩៩៤ មកដល់ដំណាច់ឆ្នាំ២០២១។ អ្នកវិនិយោគមកពីប្រទេសចិន កូរ៉េខាងត្បូង ជប៉ុន និងវៀតណាម នាំមុខគេវិនិយោគនៅកម្ពុជា។

ក្នុងនោះអចលនទ្រព្យមានចំណែកធំជាងគេ (បូកបញ្ចូលទាំងការវិនិយោគកម្មន្តសាល ដែលសំដៅលើការវិនិយោគលើរោងចក្រឧស្សាហកម្ម) ដែលមានទំហំទឹកប្រាក់ប្រមាណជាង ១៣ ពាន់លានដុល្លារ ឬស្មើនឹងប្រមាណ ៣៣ ភាគរយ។ ខណៈដែលFDI ចាក់បញ្ចូលទៅក្នុងវិស័យហិរញ្ញវត្ថុមានប្រមាណ ៩ ពាន់លានដុល្លារអាមេរិក ឬមានចំណែកប្រហែល ២៣ ភាគរយនៃទុនវិនិយោគសរុប។

យ៉ាងណាមិញ ស្ថិតិនេះមិនបានបង្ហាញលម្អិតទាក់ទងនឹងសកម្មភាពវិនិយោគក្នុងវិស័យអចលនទ្រព្យនោះទេ ដែលជាទូទៅសកម្មភាពនៃការវិនិយោគអចលនទ្រព្យមានដូចជា អចលនទ្រព្យលំនៅឋាន (សំណង់ផ្ទះជាប់ដី និងខុនដូ អាផាតមិន) អចលនទ្រព្យពាណិជ្ជកម្ម (សណ្ឋាគារ ផ្សារទំនើប អគារពាណិជ្ជកម្ម) អចលនទ្រព្យឧស្សាហកម្ម (ឃ្លាំង និងរោងចក្រដែលបម្រើដល់សកម្មភាពផលិតទំនិញសម្រាប់ផ្គត់ផ្គង់ក្នុងស្រុក និងនាំចេញ) និងអចលនទ្រព្យជាដីធ្លី។

អ្នកជំនាញជាច្រើនក្នុងវិស័យអចលនទ្រព្យ និងមន្រ្តីរដ្ឋាភិបាល ចាត់ទុកសកម្មភាពនៃការវិនិយោគអចលនទ្រព្យ បានតួរនាទីយ៉ាងសំខាន់ក្នុងការទ្រទ្រង់កំណើនសេដ្ឋកិច្ចនៅកម្ពុជា តាមរយៈការប្រមូលពន្ធសម្រាប់ថវិការជាតិ។

ថ្លែងក្នុងវេទិកាសាធារណៈស្ដីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២២» កាលពីដើមឆ្នាំនេះ ឯកឧត្តម វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានលើកឡើងថា៖ «អចលនទ្រព្យ និងសំណង់ នៅតែដើរតួជាចន្ទល់នៃសេដ្ឋកិច្ចរបស់យើង ហើយក្នុងរយៈពេលមធ្យមយើងត្រូវការវិស័យនេះ ដើម្បីជួយទ្រទ្រង់ដល់កំណើនសេដ្ឋកិច្ច។ មិនមែនតែនៅស្រុកខ្មែរទេដែលពឹងលើវិស័យអចលនទ្រព្យ សម្រាប់ជាចន្ទល់សេដ្ឋកិច្ច …. ហុងកុង សិង្ហបុរី ចិន អាមេរិក ក៏ត្រូវការអចលនទ្រព្យជំរុញការកំណើនសេដ្ឋកិច្ចដែរ។

អត្ថបទទាក់ទង៖ ការវិវត្តនៃស្ថានភាពទីផ្សារអចលនទ្រព្យក្នុងបរិបទកូវីដ-១៩

របាយការណ៍បច្ចុប្បន្នភាពទីផ្សារអចលនទ្រព្យនៅភ្នំពេញរបស់ក្រុមហ៊ុន CBRE Cambodia បានបង្ហាញថា អចលនទ្រព្យលំនៅឋាន ៦២ គម្រោង ឬស្មើនឹង២ម៉ឺនខ្នង ជាគម្រោងបើកលក់ថ្មីក្នុងទីផ្សារកាលពីឆ្នាំ២០២១។ ប៉ុន្តែចំនួនផ្គត់ផ្គង់នេះតិចជាងឆ្នាំ ២០២០ ដែលមានចំនួន ៦២គម្រោង ឬស្មើនឹងជាង ៣ម៉ឺនខ្នង។ ទីផ្សារអចលនទ្រព្យលំនៅឋាន (គិតតែបណ្តុំសំណង់បុរី ផ្ទះល្វែង វីឡា មិនរាប់បញ្ចូលខុនដូ) មានតម្លៃចាប់ពី ៥ម៉ឺនដុល្លារ ដល់ទៅជិត ៥០ម៉ឺនដុល្លារក្នុងមួយខ្នង។

ចំណែកទីផ្សារខុនដូវិញ មានតែប្រភេទខុនដូតម្លៃសមរម្យ (affordable) ប៉ុណ្ណោះបានបង្ហាញពីការងើបឡើងវិញតិចតូច ១,៦ ភាគរយ ក្នុងត្រីមាសទី១ឆ្នាំ២០២២ ធៀបនឹងត្រីមាសទី១ ឆ្នាំ២០២០ ដែលក្នុងមួយយូនីតលក់ក្នុងតម្លៃជាមធ្យម ១ ៥០០ ដុល្លារក្នុងមួយម៉ែត្រការ៉េ។ ខណៈដែលប្រភេទយូនីតខុនដូតម្លៃមធ្យម និងតម្លៃកម្រិតខ្ពស់ ចាប់ពី ២ ៥០០ដុល្លារ ទៅជាង ៣ ០០០ដុល្លារក្នុងមួយម៉ែត្រការ៉េ ហើយតម្លៃនេះថយចុះចន្លោះពី ០,៣ ទៅ ៤ ភាគរយក្នុងមួយយូនីត៕