ស្ថាបនិក Facebook ប្រមូលទិញដីទុកច្រើនកន្លែង

សហ-ស្ថាបនិកក្រុមហ៊ុន Facebook និងជាមហាសេដ្ឋីពាន់លានដុល្លារគឺលោក Mark Zuckerberg បានប្រមូលទិញដីទុកជាច្រើនកន្លែងដែលមានទំហំរាប់សិបហិកតា នៅសហរដ្ឋអាមេរិក ដែលមានតម្លៃរាប់រយលានដុល្លារអាមេរិក។

យោងតាម​ការចេញផ្សាយសារព័ត៌មាន The Guardian នាពេលកន្លងទៅថ្មីៗនេះ បានឱ្យដឹងថា លោក Mark Zuckerberg បានទិញដីបន្ថែមក្នុងទំហំជិត ៤៥ ហិកតា ក្នុងតម្លៃជាង ១៧ លានដុល្លារ ឋិតក្នុងតំបន់កោះ Kuai ដែលជាកោះធំជាងគេទី៤ ក្នុងរដ្ឋ Hawaii​ សហរដ្ឋអាមេរិក។ បច្ចុប្បន្ន មហាសេដ្ឋីវ័យ ៣៧ ឆ្នាំរូបនេះ មានទ្រព្យសម្បត្តិសរុបជិត ៧០ ពាន់លានដុល្លារអាមេរិក គិតត្រឹមថ្ងៃទី២២ មេសា ២០២២។

កាលពីដើមឆ្នាំ ២០២១ លោក Mark ក៏បានចំណាយលុយទិញដីនៅតំបន់កោះនេះដែលមានទំហំផ្ទៃដីជាង ២៤០ ហិកតា ក្នុងតម្លៃជាង ៥០លានដុល្លារ និងដីមួយកន្លែងទៀតឋិតនៅក្បែរតំបន់កោះ Kuai មានទំហំផ្ទៃដីជាង ៣០០ ហិកតា ក្នុងទំហំទឹកប្រាក់ជាង ១០០ លានដុល្លារ។ ដូច្នេះគ្រាន់តែតំបន់កោះ​ Kuai ឋិតក្នុងរដ្ឋ Hawaii ​ដែលលោក Mark Zuckerberg បានទិញដីក្នុងតំបន់នេះ មានទំហំផ្ទៃដីសរុបជាង ៦០០ ហិកតា ក្នុងទំហំទឹកប្រាក់សរុប​ជិត ១៧០ លានដុល្លារអាមេរិក។​

ផ្នែកខ្លះនៃដីនេះ នឹងធ្វើជាកសិដ្ឋានចិញ្ចឹមសត្វ និងបម្រើដល់ការដាំដុះលើដំណាំកសិសកម្ម។

​តាមប្រភព The Guardian បានបញ្ជាក់ថាបន្ថែមថា ក្រៅពីរដ្ឋ Hawaii លោកMark Zuckerberg ក៏បានទិញដីទុកជិត ៦០០ ហិកតា និងផ្ទះ១០ កន្លែង ឋិតក្នុងតំបន់ Palo Alto ក្រុង San Francisco រដ្ឋ California។ អចលនទ្រព្យទាំងដី និងផ្ទះ១០ កន្លែងនេះ មានតម្លៃសរុបជាង ៣០០​ លានដុល្លារអាមេរិក៕