ភាសាខ្មែរ 
English 
ខេត្តសៀមរាប នឹងក្លាយជាទីក្រុងទំនើប និងរីកចម្រើនខ្លាំង ដោយសារគម្រោងអភិវឌ្ឍធំៗ ពីស្ថាប័នរាជរដ្ឋាភិបាល និងក្រុមហ៊ុនឯកជន ស្របពេលដែលខេត្តទេសចរណ៍វប្បធម៌-ប្រវត្តិសាស្រ្ត មួយនេះត្រូវបានប្រមុខរដ្ឋាភិបាលកម្ពុជាប្រសិទ្ធិនាមប្រៀបដូចជា «តារារះនៅទិសឧត្តរ»។
ខាងក្រោមនេះគឺជាគម្រោងអភិវឌ្ឍន៍ ៤ ធំៗ ដែលនឹងមានឥទ្ធិពលដល់ការអភិវឌ្ឍរបស់ខេត្តសៀមរាបនាពេលខាងមុខ។
1/ ការអភិវឌ្ឍផ្លូវ៣៨ខ្សែ
គម្រោងស្ថាបនា និងកែលម្អផ្លូវចំនួន៣៨ខ្សែ ក្នុងក្រុងសៀមរាប ត្រូវបានសម្ពោធបើកឱ្យប្រើប្រាស់ជាផ្លូវការនៅថ្ងៃទី ៤ខែមេសា ឆ្នាំ២០២២ បន្ទាប់ពីសាងសង់អស់រយៈពេលជាង១ឆ្នាំ។ គម្រោងអភិវឌ្ឍន៍ផ្លូវនេះ មានប្រវែងសរុបជាង១០៨គីឡូម៉ែត្រ ដោយចំណាយទឹកប្រាក់ប្រមាណជិត ១៥០ លានដុល្លារអាមេរិក។ ការបើកដំណើរការហេដ្ឋារចនាសម្ព័ន្ធទាំងនេះ ជាការត្រៀមស្វាគមន៍ ភ្ញៀវទេសចរដែលនឹងធ្វើដំណើរមកទស្សនា និងសម្រាកកម្សាន្តនៅខេត្តសៀមរាបឡើងវិញ បន្ទាប់ពីជំងឺកូវីដ-១៩ ស្ថិតក្នុងស្ថានភាពធូរស្រាល និងអាចគ្រប់គ្រងបាន។
2/ គម្រោងស្តារ-កែលម្អដងស្ទឹងសៀមរាប និងគម្រោងកែលម្អផ្លូវនៅមុខប្រាសាទអង្គរវត្ត
គម្រោងស្តារ និងកែលម្អដងស្ទឹងសៀមរាប ចាប់ពីស្ពានរ៉ោករ៉ាក ដល់ស្ពានអាងក្រពើ មានប្រវែងជាង ៤ពាន់៥រយម៉ែត្រ ឋិតក្នុងក្រុងសៀមរាប បានបញ្ចប់ និងដាក់ឲ្យប្រើប្រាស់ជាផ្លូវការទន្ទឹមនឹងការដាក់សម្ពោធផ្លូវ៣៨ខ្សែ។
ចំណែកគម្រោងកែលម្អផ្លូវចូល និងទីធ្លាមុខប្រាសាទអង្គរវត្ត ក្រោមការរៀបចំ និងដឹកនាំដោយអាជ្ញាធរជាតិអប្សារា ជិតបញ្ចប់ជាស្ថាពរមកដល់ពេលនេះ ដោយមានការរៀបចំសួនច្បារ ដាំដើមឈើប្រណិត និងឈើផ្កាព្រៃស្រស់បំព្រង។ គម្រោងកែលម្អនេះចាប់ផ្តើមនៅចុងឆ្នាំ២០១៩ ដើម្បីកែប្រែសោភ័ណ្ឌភាពនៅបរិវេណមុខប្រាសាទអង្គរវត្តឱ្យសក្ដិសមជាសម្បត្តិបេតិកភណ្ឌពិភពលោក។
គម្រោងទាំងពីរនេះនឹងជួយលើកកម្ពស់សោភ័ណភាពទីក្រុងសៀមរាប ដើម្បីបង្កើនភាពទាក់ទាញ ក៏ដូចជាត្រៀមស្វាគមន៍នៃការមកដល់ភ្ញៀវទេសចរជាតិ និងអន្តរជាតិនាពេលខាងមុខ។
3/ គម្រោងសាងសង់អាកាសយានដ្ឋានអន្តរជាតិសៀមរាប-អង្គរ
អាកាសយានដ្ឋានអន្តរជាតិសៀមរាប-អង្គរ សាងសង់លើផ្ទៃដីប្រមាណជា ៧០០ហិកតា មានទីតាំងស្ថិតនៅក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។ គម្រោងសាងសង់អាកាសយាន្តដ្ឋានថ្មីនៅខេត្តសៀមរាប គ្រោងចំណាយទុនវិនិយោគប្រមាណ ៨៨០លានដុល្លារអាមេរិក។
បច្ចុប្បន្នការសាងសង់សម្រេចបានប្រមាណ ២២ភាគរយ នៃផែនការសរុប។ អាកាសយានដ្ឋាននេះ គ្រោងប្រើរយៈពេលសាងសង់សរុបចំនួន ៣៦ខែ គ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងដំណើរការសាកល្បង ជាលើកដំបូងនៅខែតុលា ឆ្នាំ២០២៣។ មន្រ្តីរដ្ឋាភិបាលបានបញ្ជាក់ថា នៅពេលដាក់ឱ្យដំណើរក្នុងដំណាក់កាលដំបូង អាកាសយានដ្ឋាននេះ មានសមត្ថភាពទទួលអ្នកដំណើរប្រមាណ៧លាននាក់ក្នុងមួយឆ្នាំ។ នៅក្នុងដំណាក់កាលទី២ អាចទទួលអ្នកដំណើរដល់ ១០លាននាក់ក្នុងមួយឆ្នាំ ហើយដំណាក់កាលទី៣ អាចទទួលអ្នកដំណើរបានរហូតដល់ ២០លាននាក់នៅក្នុងមួយឆ្នាំ។
4/ គោលដៅទេសចរណ៍ថ្មីៗ
គោលដៅទេសចរណ៍ថ្មីចំនួន៤ធំៗបន្ថែមទៀតលើគោលដៅទេសចរណ៍២ ដែលមានស្រាប់ អាចនឹងត្រូវបានបង្កើតឡើងដែលរួមមានតំបន់បឹងទន្លេសាប តំបន់ភ្នំគូលែន តំបន់បន្ទាយស្រី និងទីក្រុងសៀមរាបថ្មី។
ផែនការទាំងនេះត្រូវបានដាក់បញ្ចូលទៅក្នុងផែនការមេអភិវឌ្ឍន៍ទេសចរណ៍ខេត្តសៀមរាប ដែលបច្ចុប្បន្នក្រសួងទេសចរណ៍ កំពុងរៀបចំកែសម្រួលដើម្បីដាក់ឆ្លងរាជរដ្ឋាភិបាល ពិនិត្យនិងអនុម័ត នៅពេលខាងមុខ ក្នុងគោលដៅទាក់ទាញភ្ញៀវទេសចរអន្តរជាតិឲ្យបានដល់ ៧លាននាក់ក្នុងមួយឆ្នាំសម្រាប់ខេត្តសៀមរាបគិតចាប់ពីឆ្នាំ២០៣៥ទៅ៕
អត្ថបទ៖ ងន ឆៃរ៉ាត់
