អចលនទ្រព្យឧស្សាហកម្ម បង្ហាញពីសញ្ញាងើបឡើងវិញ

ចំណែកទីផ្សារអចលនទ្រព្យឧស្សាហកម្មនៅវៀតណាមរំពឹងថា នឹងមានការកើនឡើងនៅឆ្នាំនេះ ដោយសារការបើកព្រំដែនឡើងវិញ ដែលនឹងជំរុញរំហូរវិនិយោគផ្ទាល់ពីបរទេស (FDIs) ខណៈដែល​វិស័យផលិតកម្មបង្ហាញភាពប្រសើរឡើងវិញ ដែលបានជួយបង្កើនទំនុកចិត្តដល់អ្នកវិនិយោគ។ នេះបើតាមការចេញផ្សាយសារព័ត៌មានក្នុងស្រុកវៀតណាម។

អចលនទ្រព្យឧស្សាហកម្មសំដៅការសាងសង់ឃ្លាំងសម្រាប់ស្តុកទំនិញ រោងចក្រ ដែលបម្រើដល់ចង្វាក់ផលិតកម្មកែច្នៃ និងការផលិតផលផ្សេងរាប់ពីគ្រឿងបង្គុំអេឡិចត្រូនិច និងសម្លៀកបំពាក់ជាដើម។ ចង្វាក់ផលិតកម្មទាំងនេះ ជំរុញការនាំចេញទៅទីផ្សារ​អន្តរជាតិ ពន្លឿនការអភិវឌ្ឍសេដ្ឋកិច្ច។

កាលពីថ្ងៃទី ១៥ ខែមីនា ឆ្នាំ ២០២២ រដ្ឋាភិបាលវៀតណាមបានអនុញ្ញាតឱ្យពលរដ្ឋនៃប្រទេសចំនួន ១៣ រួមមានអាល្លឺម៉ង់ សាធារណៈរដ្ឋកូរ៉េ ជប៉ុន និងបារាំង ធ្វើដំណើរមកប្រទេសវៀតណាមមិនទាមទារទិដ្ឋាការស្នាក់នៅរយៈពេល១៥ថ្ងៃ។ ចំណាត់ការនេះ ត្រូវបានអ្នកជំនាញអចលនទ្រព្យមើលឃើញថា ជាសញ្ញាសម្រាប់ជំរុញការវិនិយោគវិស័យឧស្សាហកម្ម។

លោក John Campbell អ្នកជំនាញនៃក្រុមហ៊ុនអចលនទ្រព្យ Savills Vietnam បានលើកឡើងថា៖ «ការបើកព្រំដែនឡើងវិញរបស់វៀតណាមមានសារៈសំខាន់ក្នុងការពង្រឹងទំនុកចិត្តអ្នកវិនិយោគ ទៅលើវិស័យឧស្សាហកម្ម»។ លោកបានបន្ថែមថា ដើមឆ្នាំ២០២២នេះ​ សកម្មភាពអាជីវកម្មមួយចំនួនបានវិនិយោគលើរោងចក្រ និងចាប់ផ្តើមពង្រីកផលិតកម្មឡើងវិញជាបណ្តើរៗ។

សេដ្ឋកិច្ចវៀតណាមត្រូវបានព្យាករណ៍ថានឹងកើនឡើងលើសពីការរំពឹងទុកនៅឆ្នាំ២០២២នេះ ដោយសារតម្រូវការក្នុងស្រុកបានស្ទុះងើបឡើងវិញ ហើយលំហូរ FDI បន្តមានស្ថិរភាពល្អប្រសើរ។​ ខណៈដែលអាជីវកម្មក្នុងស្រុកក៏មានភាពប្រសើរឡើងក្នុងរយៈពេលប្រាំខែចុងក្រោយនេះ។

ទិន្នន័យពីរដ្ឋាភិបាលវៀតណាម បានបង្ហាញថា  ទុនវិនិយោគពី FDI ចាក់បញ្ចូលទៅក្នុងសដ្ឋកិច្ចប្រទេសនេះសម្រេចបានទំហំទឹកប្រាក់ ៥ ពាន់លានដុល្លារក្នុងរយៈពេល​២ខែឆ្នាំ ២០២២ កើនប្រហែល ៧ភាគរយ ​ធៀបនឹងឆ្នាំ ២០២១។ ទុនវិនិយោគពី FDI រំពឹងសម្រេចបាន ​៤០ ពាន់លានដុល្លារនៅឆ្នាំ ២០២២នេះ។ ទំហំទឹកប្រាក់វិនិយោគពី FDI​ មានចំណែកប្រហែល ១៤ ភាគរយ​ នៃផលិតផលក្នុងស្រុកសរុប ២៩០​ពាន់លានដុល្លារ កាលពីឆ្នាំ២០២១៕

អត្ថបទ៖  សេង ចន្ទី