ធុរកិច្ចជនកម្ពុជា រៀបចំដំណើរទស្សនកិច្ច ទាក់ទាញវិនិយោគិននៅអាមេរិក

Bunthoeun Chhut 20/March/2022 12:10
ចែករំលែក

ក្រុមធុរកិច្ចជន​នៅកម្ពុជា ដែលដឹកនាំដោយក្រុមហ៊ុន Z1 Financial បានរៀបចំដំណើរទស្សនកិច្ច ដើម្បីទាក់ទាញអ្នកវិនិយោគនៅអាមេរិក មកវិនិយោគគម្រោងអចលនទ្រព្យ និងគម្រោងសក្តានុពលផ្សេង​ៗទៀតនៅកម្ពុជា។ ដំណើរទស្សនកិច្ចនេះ ក៏នឹងអាចឱ្យក្រុមហ៊ុន Z1 Financial ពង្រីកបណ្តាញទំនាក់ទំនងរបស់ខ្លួន ជាមួយបណ្តាអ្នកវិនិយោគ នៅលើទឹកដីសហរដ្ឋអាមេរិកផងដែរ​។​

ការជំរុញឱ្យមានការវិនិយោគពីបរទេស  ពីវិស័យឯកជន គឺជាការឆ្លើយតបទៅនឹងការដាក់ចេញនូវគោលនយោបាយ របស់រដ្ឋាភិបាលកម្ពុជា ជាពិសេសច្បាប់វិនិយោគថ្មី ដែលទើបបានប្រកាសដាក់ឱ្យប្រើប្រាស់ កាលពីពេលថ្មីនេះ សំដៅ ទាក់ទាញការវិនិយោគពីបរទេសនៅកម្ពុជា ដើម្បីជួយពន្លឿនសេដ្ឋកិច្ចជាតិ។

ដំណើរទស្សនកិច្ចនេះ នឹងមានការរៀបចំសិក្ខាសាលា និងការធ្វើបទបង្ហាញ ទាក់ទងនឹងគម្រោងវិនិយោគអចលនទ្រព្យ និងឱកាសវិនិយោគផ្សេងៗទៀត​នៅកម្ពុជា ទៅដល់អ្នកចូលរួមនៅសហរដ្ឋអាមេរិក។ វាគ្មិនសំខាន់ៗ ចូលរួមចែករំលែកពីឱកាសវិនិយោគនេះរួមមានលោក សាយ សុខហេង, អ្នកស្រី ហ្គ្រេស រចនី ហ្វុង, លោកវ៉ា វីរៈ, ព្រមទាំងវាគ្មិនកិត្តយសជាច្រើនរូបទៀត។ កម្មវិធីចែករំលែកពីឱកាសវិនិយោគដ៏សំខាន់នេះ នឹងចាប់ផ្តើមពីថ្ងៃទី ២២២៣ មីនា ឆ្នាំ២០២២ ដែលនឹងធ្វើឡើងនៅឯសណ្ឋាគារ Harrahs Las Vegas ស្ថិតក្នុងទីក្រុង Las Vegas នៃរដ្ឋ Nevada  សហរដ្ឋអាមេរិក។ កម្មវិធីនេះ​នឹងបន្តដំណើរទៅដល់​ក្រុង Long Beach រដ្ឋ California ចាប់ពីថ្ងៃទី ២៦-២៧​ ខែមីនា ២០២២។

ក្រុមហ៊ុន Z1 Financial នឹងជួយសម្រួលដល់អ្នកវិនិយោគ ដើម្បីទទួលបានឱកាសវិនិយោគក្នុងទីផ្សារអចលនទ្រព្យដែលកំពុងរីកចម្រើនទាំងនៅកម្ពុជា និងបណ្តាប្រទេសនៅតំបន់អាស៊ី។ ក្រុមហ៊ុន Z1 Financial មានមូលដ្ឋាននៅប្រទេសឹង្ហបុរី ផ្តល់សេវាកម្មគ្រប់គ្រងទ្រព្យឌីជីថល (digital asset management) និងសេវាកម្មវិនិយោគទៅដល់វិនិយោគិន និងអតិថិជន តាមរយៈផ្លេតហ្វមវិនិយោគរបស់ក្រុមហ៊ុន ដែលផ្លេតហ្វមនោះនឹងជួយចាត់ចែង និងគ្រប់គ្រងការវិនិយោគរបស់វិនិយោគិន លទ្ធភាពទទួលបានប្រភពទុន ដែលអាចបង្កើតប្រាក់ចំណេញក្នុងកម្រិតអតិប្បរមា។​

កាលពីថ្ងៃទី ១៨ កុម្ភៈ កន្លងទៅថ្មីៗនេះ ក្រុមហ៊ុន Z1 Financial បានចុះអនុស្សារណៈយោគយល់គ្នាជាមួយ ក្រុមហ៊ុន Mercan Group ដែលជាក្រុមហ៊ុនវិនិយោគដ៏ធំមួយមានមូលដ្ឋាននៅប្រទេសកាណាដា។ កិច្ចសហការនេះ គឺដើម្បីជំរុញការវិនិយោគទៅវិនិយោគទៅវិញទៅមករវាងកម្ពុជា ជាមួយប្រទេសសមាជិកសហគមន៍អ៊ឺរ៉ុប និងសហរដ្ឋអាមេរិក។ ក្រុមហ៊ុន Mercan Group មានគម្រោងវិនិយោគ ៤០ គម្រោងនៅសហរដ្ឋអាមេរិក និង១៥គម្រោងទៀត នៅប្រទេសព័រទុយហ្គាល់។ (អានបន្ថែម)

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង