ក្រុមហ៊ុនអចលនទ្រព្យធំៗនិងស្ថាប័នធនាគារ ជំរុញការប្រើប្រាស់បច្ចេកវិទ្យាឌីជីថលនៅកម្ពុជា

ចំណុចសំខាន់៖

ការវាយតម្លៃអចលនទ្រព្យ ដែលធ្លាប់តែប្រើដោយដៃចំណាយពេលយូរ តែបច្ចុប្បន្នត្រូវបានជំនួសដោយបច្ចេកវិទ្យាឌីជីថល ប្រើពេលខ្លី សុវត្ថិភាព តម្លាភាព និងសុក្រឹតភាព
ការទទួលសេវាវាយតម្លៃអចលនទ្រព្យបានត្រឹមត្រូវ ជួយពង្រឹងគុណភាពទីផ្សារហិរញ្ញវត្ថុ
50% នៃឥណទានសរុបដែលបានបញេ្ចញលើទីផ្សារ គឺជាឥណទានដែលមានការធានាដោយដាក់ទ្រព្យបញ្ចាំ ភាគច្រើនជាដីធ្លី និងផ្ទះសម្បែង
កម្ចីក្នុងវិស័យអចលនទ្រព្យ នៅកម្ពុជាមានចំណែកក្នុងរង្វង់ ៥០% នៃកម្ចីឥណទានសរុប ក្នុងរយៈពេលបីឆ្នាំចុងក្រោយនេះ

«ពីមុនការវាយតម្លៃអចលនទ្រព្យប្រើរយៈពេលដល់ទៅបីថ្ងៃ ទើបអាចដឹងតម្លៃពីអចលនទ្រព្យនោះ។ ប៉ុន្តែបច្ចុប្បន្នយើងប្រើពេល៣ម៉ោងប៉ុណ្ណោះ អាចដឹងពីតម្លៃអចលនទ្រព្យ»

ពីឆ្វេងទៅស្តាំ ប្រធានក្រុមប្រឹក្សាភិបាល ក្រុមហ៊ុន Vtrust Appraisal Co., Ltd លោក វង្ស សុខាល និង លោកឧកញ៉ា ហួត អៀងតុង ប្រធានអគ្គនាយធនាគារ Hattha Bank Plc

ក្រុមហ៊ុនហ្សីលាននាម ក្រុមហ៊ុនវីត្រាស់ អឹព្រេហ្សល និងធនាគារ ហត្ថា បានសម្រេចកិច្ចសហការ ជំរុញការប្រើប្រាស់ប្រើប្រាស់ប្រព័ន្ធបច្ចេកវិទ្យាឌីជីថលលើការទូទាត់សេវាកម្ម និងការវាយតម្លៃអចលនទ្រព្យ ស្របតាមការីកចម្រើនយ៉ាងឆាប់រហ័សនៃបច្ចេកវិទ្យាឌីជីថល ហើយការសម្របខ្លួនទៅនឹងការប្រើប្រាស់បច្ចេកវិទ្យានេះ នឹងជួយពង្រឹងគុណភាពទីផ្សារហិរញ្ញវត្ថុ ក៏ដូចជាបង្កើនភាពទាក់ទាញទីផ្សារអចលនទ្រព្យនៅកម្ពុជា។

ក្រុមហ៊ុនទាំងបីបានរៀបចំពិធីចុះហត្ថលេខាលើកិច្ចព្រមព្រៀងជាយុទ្ធសាស្រ្ត នៅថ្ងៃព្រហស្បតិ៍ទី ៣ ខែកុម្ភៈនេះ ដោយក្រុមហ៊ុនវីត្រាស់ អឹព្រេហ្សល បានសម្រេចដាក់ឱ្យប្រើប្រាស់ ភ្លេតហ្វម អ៊ីនឌីខេសិន ផ្លឹស (Indication Plus Platform) របស់ខ្លួន ដល់ធនាគារហត្ថា ដើម្បីវាយតម្លៃទ្រព្យរបស់អតិថិជនដែលដាក់ធានា មុននឹងអនុម័តកម្ចី។ ក្រុមហ៊ុនវីត្រាស់ អឹព្រេហ្សល គឺជាផ្នែកមួយនៃក្រុមហ៊ុន ក្រុមហ៊ុនហ្សីលាននាម។

កិច្ចសហការនេះត្រូវបានចុះហត្ថលេខាដោយលោក គុយ វ៉ាត ប្រធានក្រុមប្រឹក្សាភិបាល ក្រុមហ៊ុន Zillennium Co.,Ltd លោកវង្ស សុខាល ប្រធានក្រុមប្រឹក្សាភិបាល ក្រុមហ៊ុន Vtrust Appraisal Co.,Ltd និងលោកឧកញ៉ា ហួត អៀងតុង ប្រធានអគ្គនាយក Hattha Bank Plc។

ពីឆ្វេងទៅស្តាំ លោក គុយ វ៉ាត ប្រធានក្រុមប្រឹក្សាភិបាល ក្រុមហ៊ុន Zillennium Co.,Ltd និងលោកឧកញ៉ា ហួត អៀងតុង ប្រធានអគ្គនាយក Hattha Bank Plc

ប្រធានក្រុមប្រឹក្សាភិបាល ក្រុមហ៊ុន Vtrust Appraisal Co., Ltd លោក វង្ស សុខាល បានថ្លែងនៅក្នុងពិធីចុះហត្ថលេខាថា កិច្ចសហការនេះនឹងជំរុញឱ្យការប្រើប្រាស់សេវាវាយតម្លៃអចលនទ្រព្យកាន់តែទូលំទូលាយ និងបង្កើនប្រសិទ្ធភាពប្រតិបត្តិការសេវាឥណទានដល់ធនាគារ ហត្ថា ដោយសារថា Indication Plus Platform ជាសេវាកម្មវាយតម្លៃអចលនទ្រព្យទំនើបបែបឌីជីថល ដែលអាចវិភាគ និងចេញជារបាយការណ៍វាយតម្លៃអចលនទ្រព្យដោយស្វ័យប្រវត្តិ ដោយមានការរៀបចំចងជាប្រព័ន្ធរូបមន្តត្រឹមត្រូវដោយអ្នកជំនាញ និងតាមស្តង់ដារវាយតម្លៃអចលនទ្រព្យអន្តរជាតិ។

លោកថ្លែងថា៖ «ពីមុនការវាយតម្លៃអចលនទ្រព្យប្រើរយៈពេលដល់ទៅបីថ្ងៃ ទើបអាចដឹងតម្លៃពីអចលនទ្រព្យនោះ។ ប៉ុន្តែបច្ចុប្បន្នយើងប្រើពេល ២ ទៅ៣ម៉ោងប៉ុណ្ណោះ អាចដឹងពីតម្លៃនៃអចលនទ្រព្យ តាមរយៈការប្រើប្រាស់សេវា Indication Plus Platform ព្រោះផ្លេតហ្វមនេះ អ្នកប្រើប្រាស់អាចចូលទៅប្រើ និងស្នើការវាយតម្លៃអចលនទ្រព្យ បានគ្រប់ពេលវេលា ងាយស្រួល ឆាប់រហ័សប្រកបដោយទំនុកចិត្តខ្ពស់ ព្រមទាំងបានដឹងពីតម្លៃអចលនទ្រព្យគ្រប់ទីកន្លែងនៅទូទាំងប្រទេស។»

កម្ចីក្នុងវិស័យអចលនទ្រព្យដែលផ្តល់ឱ្យដោយគ្រឹះស្ថានធនាគារ និងហិរញ្ញវត្ថុ នៅកម្ពុជាមានចំណែកក្នុងរង្វង់ ៥០% នៃកម្ចីឥណទានសរុបពីឆ្នាំ២០១៩ ដល់ដំណាច់ត្រីមាសទី៣ ឆ្នាំ២០២១។ កម្ចីឥណទាន គឺជាផ្នែកមួយនៃឥណទានលក្ខណៈបុគ្គលដែលកត់ត្រាដោយការិយាល័យឥណទានកម្ពុជា ហៅកាត់ថា CBC។ កម្ចីឥណទានលក្ខណៈបុគ្គលនេះបានកើនពី ៨ ពាន់លានដុល្លារ នៅឆ្នាំ២០១៩, ជាង៩ពាន់លានដុល្លារនៅឆ្នាំ២០២០ និងបានបន្តកើនដល់ជិត១២ ពាន់លានដុល្លារត្រឹមដំណាច់ឆ្នាំ២០២១។

បើតាមCBC បានឱ្យដឹងថា ៥០ ភាគរយនៃឥណទានសរុបដែលបានបញេ្ចញលើទីផ្សារ គឺជាឥណទានដែលមានការធានាដោយដាក់ទ្រព្យបញ្ចាំ ហើយភាគច្រើននៃទ្រព្យបញ្ចាំទាំងនោះគឺជា ដីធ្លី និងផ្ទះសម្បែង។ ហើយប្រតិបត្តិការនេះមាន ចន្លោះពី ១៥ម៉ឺន ទៅ ២០ម៉ឺន ក្នុងមួយខែ។

តាមការបញ្ជាក់ពីអ្នកជំនាញ កត្តានេះមានន័យថា ការមានសេវាវាយតម្លៃអចលនទ្រព្យប្រកបដោយទំនុកចិត្តខ្ពស់ មានតម្លាភាព និងវិសាលភាពទូលំទូលាយ មានតួនាទីយ៉ាងសំខាន់សម្រាប់ប្រតិបត្តិការក្នុងវិស័យហិរញវត្ថុ ជាពិសេសសម្រាប់ការស្នើសេវាកម្មកម្ចី។ ដោយសារតែ អ្នកទទួលកម្ចីទាំងអស់ដែលដាក់ទ្រព្យជាវត្ថុធានា នឹងទទួលបានទំហំកម្ចីសមស្របតាមតម្លៃទ្រព្យធានា និងលទ្ធភាពអាចសងត្រទ្បប់វិញ ខណៈស្ថាប័នហិរញ្ញវត្ថុដែលជាអ្នកផ្តល់កម្ចីវិញ អាចធ្វើការវាយតម្លៃពីលទ្ធភាពរបស់អតិថិជនបានត្រឹមត្រូវ និងចៀសវាងហានិភ័យនានា ស្របតាមបទបញ្ញត្តិគ្រប់គ្រងហានិភ័យឥណទានដែលបានដាក់ចេញ និងណែនាំដោយធនាគារជាតិនៃកម្ពុជា។

លោកឧកញ៉ា ហួត អៀងតុង ប្រធានអគ្គនាយក នៃ ធនាគារ ហត្ថា មានប្រសាសន៍ថា ការសម្រេចកិច្ចសហការនៅថ្ងៃនេះ ជាការបោះជំហានទៅមុខកាន់តែប្រសើរឡើងមួយកម្រិតទៀតក្នុងការវាយតម្លៃអចលនទ្រព្យសម្រាប់ការសិក្សាឥណទានដល់អតិថិជនរបស់ធនាគារ ហត្ថា ប្រកបដោយគុណភាព និងប្រសិទ្ធភាពខ្ពស់តាមរយៈការទទួលបាននូវទិន្នន័យដ៏ច្បាស់លាស់ និងកាន់តែឆាប់រហ័សពីក្រុមហ៊ុនជំនាញ ដូចជា Indication Plus Platform របស់ក្រុមហ៊ុន Vtrust Appraisal Co., Ltd ។

លោកឧកញ៉ាថ្លែងថា៖ «ធនាគារ ហត្ថា សង្ឃឹមថានឹងទទួលបានផលប្រយោជន៍ច្រើន ពីប្រព័ន្ធវាយតម្លៃអចលនទ្រព្យទំនើបតាមឌីជីថលនេះ ដូចជាការផ្តល់ឥណទានរបស់យើងនឹងមានភាពលឿនរហ័ស និងមានសុក្រឹត្យភាពជាងមុន។ ខ្ញុំជឿថា កិច្ចសហការនៅថ្ងៃនេះ នឹងបំពេញបន្ថែមឱ្យគ្នាទៅវិញទៅមក ដើម្បីភាពរីកចម្រើនទាំងអស់គ្នា។»

ធនាគារ ហត្ថា បានវិវឌ្ឍន៍ខ្លួនពីគ្រឹះស្ថានហិរញ្ញវត្ថុ ក្លាយជាធនាគារពាណិជ្ជមួយក្នុងចំណោមធនាគារឈានមុខនៅកម្ពុជា។ រហូតមកដល់បច្ចុប្បន្ន ទ្រព្យសកម្មរបស់ធនាគារ ហត្ថា បានកើនដល់ប្រមាណ ២ ពាន់លានដុល្លារ ចាប់តាំងពីស្ថាប័ននេះបានបើកដំណើរការក្នុងអំឡុងឆ្នាំ ១៩៩៤។ ការរីកធំធាត់នេះ បានធ្វើឱ្យ ធនាគារ ហត្ថា ពង្រីកប្រតិបត្តិការរហូតដល់ ១៧៧ សាខា នៅទូទាំងប្រទេសកម្ពុជា ហើយការចុះកិច្ចព្រមព្រមនៅថ្ងៃនេះជាការបំពេញបន្ថែមភាពរីកចម្រើនវាងស្ថាប័នទាំងបី ក៏ដូចការរួមចំណែកអភិវឌ្ឍន៍វិស័យហិរញ្ញវត្ថុ និងវិស័យអចលនទ្រព្យនៅកម្ពុជា៕