ទិញអចលនទ្រព្យរង់ចាំឡើងថ្លៃលក់យកចំណេញ ឬបង្កើតចំណូលអកម្ម មួយណាជាជម្រើសល្អ?

bunthoeun chhut 05/January/2022 16:36
ទស្សនា
ចែករំលែក

ការទិញអចលនទ្រព្យទុកលក់យកចំណេញពេលឡើងថ្លៃ​ (capital gain or appreciation) និងការទិញអចលនទ្រព្យបង្កើតចំណូលអកម្ម ឬលំហូរសាច់ប្រាក់ (cash flow) ត្រូវបានចាត់ទុកថា ​ជាជម្រើសល្អក្នុងចំណោមជម្រើសផ្សេងៗទៀត ដែលអាចបង្កើតភាពមានបានក្នុងវិស័យអចលនទ្រព្យ។

ប៉ុន្តែសម្រាប់លោក Robert Kiyosaki ជាអ្នកនិពន្ធដ៏ល្បីល្បាញផ្នែកហិរញ្ញវត្ថុ និងការវិនិយោគ ហើយលោកក៏ជាធុរជនអចលនទ្រព្យផងដែរនោះ បានចាត់ទុកការទិញអចលនទ្រព្យដើម្បីបង្កើតចំណូលអកម្ម ជាវិធីសាស្រ្តវិនិយោគអចលនទ្រព្យក្នុងការកសាងស៊េរីភាពហិរញ្ញវត្ថុ ហើយអ្នកមានជាច្រើនបានបង្កើតទ្រព្យសម្បត្តិរបស់ពួកគេតាមវីធីនេះផងដែរ​។

Capital gain គឺសំដៅលើការវិនិយោគអចលនទ្រព្យលក់ចេញដើម្បីបានផលចំណេញ នៅពេលដែលអចលនទ្រព្យនោះឡើងថ្លៃ។ ចំណែកឯ cash flow​ គឺជាមធ្យោបាយនៃការវិនិយោគអចលនទ្រព្យ ​ដែលបង្កើតបានជាចំណូលអកម្មតាមការរយៈការដាក់ជួល ឬប្រតិបត្តិការផ្សេងៗដែលអាចបង្កើតជាលំហូរសាច់ប្រាក់ជាប្រចាំ។

នៅក្នុងសៀវភៅស្តីពីការវិនិយោគអចលនទ្រព្យ ដែលនិយាយរៀបរាប់ពីវិធីសាស្រ្តទិញអចលនទ្រព្យសម្រាប់អ្នកទើបចាប់ផ្តើម ជាស្នាដៃនិពន្ធរបស់លោក Robert Kiyosaki លោកបានលើកឡើងថា អាថ៌កំបាំងនៃការបង្កើតទ្រព្យសម្បត្តិស្តុកស្តម្ភក្នុងវិស័យអចលនទ្រព្យ គឺការវិនិយោគដើម្បីបង្កើតលំហូរសាច់ប្រាក់ បើទោះបីស្ថានភាពទីផ្សារ​ឡើង ឬចុះក៏ដោយ ម្ចាស់ទ្រព្យមិនបារម្ភពីការធ្លាក់ចុះនៃតម្លៃអចលនទ្រព្យនោះទេ។ ដូច្នេះអចលនទ្រព្យដែលវិនិយោគសម្រាប់ដាក់ជួល គឺនៅតែអាចបង្កើតចំណូលអកម្មចូលហោប៉ៅជានិច្ច។

លោកបញ្ជាក់ថា៖ «បុគ្គលដែលពុំ​មានចំណេះដឹងហិរញ្ញវត្ថុ វិនិយោគដើម្បីរង់ចាំអចលនទ្រព្យនោះឡើងថ្លៃ។ អ្នកមានវិញ គឺទិញអចលនទ្រព្យដើម្បីបង្កើតលំហូរសាច់ប្រាក់។» លោកបន្ថែមថា៖ «ចំពោះខ្ញុំ ខ្ញុំមិនដែលទិញអចលនទ្រព្យរង់ចាំឡើងថ្លៃនោះទេ។​ ប្រសិនបើខ្ញុំទិញអចលនទ្រព្យសម្រាប់ការវិនិយោគ  នោះប្រាកដជាការវិនិយោគដើម្បីបង្កើតលំហូរសាច់ប្រាក់។​»

លោក Robert សង្កេតឃើញថាមនុស្សភាគច្រើគិតថា ការទិញផ្ទះជាការវិនិយោគដ៏ល្អមួយ ដោយសារ​តែរំពឹងពីការឡើងថ្លៃនៃតម្លៃអចលនទ្រព្យនៅពេលណាមួយ។ ការយល់ឃើញបែបនេះ ដោយសារអ្នកទិញផ្ទះអាចលក់ក្នុងតម្លៃខ្ពស់ជាងពេលដែលទិញ ឬជាមធ្យោបាយប្រើប្រាស់កម្ចីទិញផ្ទះពីធនាគារ ដើម្បីយកមកវិនិយោគ ដោយរង់ចាំឡើងថ្លៃទើបលក់ចេញដើម្បីបានផលចំណេញ។

ប៉ុន្តែឥរិយាបថនៃការគិតបែបនេះ បើទោះបីជាអាចទទួលបានសាច់ប្រាក់ចំណេញពីការវិនិយោគនៅពេលផ្ទះនោះឡើងថ្លៃក៏ដោយ លោកបញ្ជាក់ថាមធ្យោបាយនៃការវិនិយោគបែបនេះមិនអាចបង្កើតភាពមានបានស្តុកស្តម្ភនោះទេ។

ជាឧទារហណ៍ នៅមុនអំឡុងឆ្នាំ២០០៨ សម្បូរអ្នកមាននៅលើក្រដាស​ច្រើនមែនទែន។ តែនៅពេលដែលវិស័យអចលនទ្រព្យមានវិបត្តិ មិនមានអ្នកមាននៅលើក្រដាសទៀតនោះទេ​ មូលហេតុដោយសារតែពួកគេមិនមានលទ្ធភាពសងត្រលប់ទៅធនាគារវិញនាពេលនោះ។

ឧទារហណ៍ខាងលើនេះបានឆ្លុះបញ្ជាំងពីទិដ្ឋភាពជាក់ស្តែងចំពោះអ្នកប្រើប្រាស់កម្ចីទិញផ្ទះយកទៅវិនិយោគ ដោយរំពឹងផលចំណេញនៅពេលផ្ទះនោះឡើងថ្លៃ។ ដូច្នេះពាក្យថា ទ្រព្យ គឺជារបស់ដែលអាចបង្កើតប្រាក់ចូលហោប៉ៅ ចំណែកបំណុលវិញ គឺទាញប្រាក់ចេញពីហោប៉ៅ។

សម្រាប់បរិបទទីផ្សារអចលនទ្រព្យនៅកម្ពុជា ការវិនិយោគតាមមធ្យោបាយទាំងពីរខាងលើនេះមានអត្រាចំណេញខុសៗគ្នា​។ បើតាមក្រុមហ៊ុនអចលនទ្រព្យក្នុងស្រុក បានប៉ាន់ប្រមាណថាចំណូលពីការវិនិយោគអចលនទ្រព្យដាក់ជួលនៅទីក្រុងភ្នំពេញមានអត្រាចន្លោះពី ៦ ទៅ ៨ ភាគរយក្នុងមួយឆ្នាំ។ ចំណែកតម្លៃអចលនទ្រព្យឡើងថ្លៃមានអត្រាជាមធ្យមចន្លោះពី ១០​ ទៅ ១៥ ភាគរយក្នុងមួយឆ្នាំ៕

[អត្ថបទទាក់ទង៖ ស្វែងយល់គន្លឹះទិញអចលនទ្រព្យឱ្យបានត្រឹមត្រូវ ហើយសុវត្ថិភាព

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង