ការវិវត្តនៃស្ថានភាពទីផ្សារអចលនទ្រព្យក្នុងបរិបទកូវីដ-១៩

bunthoeun chhut 20/December/2021 17:35
ទស្សនា
ចែករំលែក

ចំណុចសំខាន់៖

  • ទីផ្សារលំនៅឋាន (បុរី) រក្សាបានភាពធន់ជាងគេក្នុងវិស័យអចលនទ្រព្យ ដែលមានចំនួនផ្គត់ផ្គង់ និងសកម្មភាព​ទិញលក់ច្រើនជាងគេក្នុងឆ្នាំ ២០២១ 
  • ទំហំកម្ចីដើម្បី​ទិញផ្ទះផ្តល់ដោយ​គ្រឹះស្ថានធនាគារ និងហិរញ្ញវត្ថុ​ (mortgage) កើនឡើង១៧ ភាគរយ
  • គម្រោងវិនិយោគពីបរទេស​ FDIs ធ្លាក់​ចុះដល់ ៨០ភាគរយ តែរំពឹងនឹង​វិលមករករកំណើនវិជ្ជមានវិញចាប់ពីឆ្នាំ២០២២  

«ទីផ្សារលំនៅឋាន រក្សាបានកំណើនល្អជាងគេក្នុងទីផ្សារអចលនទ្រព្យនៅកម្ពុជា ព្រោះលំនៅឋានជាតម្រូវការចំាបាច់របស់មនុស្ស​»

វិស័យអចលនទ្រព្យហាក់រក្សាបាននូវភាពធន់ខ្ពស់​ បើទោះបីជំងឺរាត្បាតសកលបង្កឡើងដោយជំងឺកូវីដ-១៩បានអូសបន្លាយអស់រយៈពេលជាង២ឆ្នាំ​មកនេះក្តី។ អ្នកជំនួញ និងរបាយការណ៍ស្រាវជ្រាវក្នុងវិស័យនេះ បានបញ្ជាក់ថាទីផ្សារដីធ្លី និងបុរីលំនៅឋាននៅតែបន្តមានសកម្មភាពទិញ-លក់រស់រវើក ខណៈដែលទីផ្សារខុនដូ និងការផ្គត់ផ្គង់អគារការិយាល័យហាក់ស្ងប់ស្ងាត់បន្តិច​ ដោយសារចំណែកទីផ្សារនេះពឹងផ្អែក​ច្រើន​លើ​អ្នកទិញជាជនជាតិបរទេស។

ទីផ្សារបុរីលំនៅឋានរក្សាបាននូវភាពរឹងមាំ​ជាងគេ 

ទិន្នន័យពីក្រសួងរៀបចំដែនដី នគរូបនីយកម្ម និងសំណង់ បានបង្ហាញថា​ រយៈពេល៨ខែ (មករា-សីហា) ឆ្នាំ២០២១នេះ គម្រោងសាងសង់សរុបជាង ជាង២ ៩០០ គម្រោង​នៅទូទាំងប្រទេសកម្ពុជាទទួលបានការអនុញ្ញាតពីក្រសួង។ ក្នុងនោះ ៨៧​ ភាគរយ ឬស្មើនឹង ២ ៥៣០ ជាគម្រោងសំណង់លំនៅឋាន។ ទិន្នន័យដដែលបានបង្ហាញថា គម្រោងលំនៅឋានមានការថមថយ ១៥ ភាគរយធៀបនឹងរយៈពេលដូចគ្នាកាលពី ឆ្នាំមុន។

នាយកប្រតិបត្តិក្រុមហ៊ុនអចលនទ្រព្យ Century 21 Imperial Realty លោក ខេន ឡូ បានលើកឡើងថា តម្លៃទីផ្សារលំនៅឋាន និងដីធ្លីហាក់​​មានទំនុកចិត្តល្អពីវិនិយោគិន។ បើធៀបនឹងកាលដែលសេដ្ឋកិច្ចកម្ពុជា​រងផលប៉ះពាល់ដោយសារវិបត្តិសេដ្ឋកិច្ចសកលក្នុងអំឡុងឆ្នាំ២០០៨ វិបត្តិកូវីដ១៩ បានបង្កផលប៉ះពាល់ដល់ទីផ្សារដីធ្លីតិចតួចជាង។

លោកបញ្ជាក់ថា៖ «ទីផ្សារលំនៅឋាន រក្សាបានកំណើនល្អជាងគេក្នុងទីផ្សារអចលនទ្រព្យនៅកម្ពុជា ព្រោះលំនៅឋានជាតម្រូវការចំាបាច់របស់មនុស្ស។​»

[អានបន្ថែម៖ ការទិញ-លក់អចលនទ្រព្យកំពុងវិលត្រលប់ទៅរកសភាពដើម ខណៈសេដ្ឋកិច្ចបើកដំណើរការឡើងវិញ]

របាយការណ៍ស្រាវជ្រាវត្រីមាសទី៣របស់ក្រុមហ៊ុន CBRE Cambodia ដែលផ្តោតតែទីផ្សារអចលនទ្រព្យនៅរាជធានីភ្នំពេញ បានបញ្ជាក់ថា គម្រោងបុរីលំនៅឋានថ្មីមានចំនួន ៥៨ គម្រោង (២៤គម្រោងបញ្ចប់ការសាងសង់រួចរាល់) ស្មើចំនួនផ្ទះ ៩ម៉ឺន២ពាន់ខ្នងត្រូវបាន​ដាក់លក់ក្នុងទីផ្សារគិតត្រឹមដំណាច់ត្រីមាសទី៣ ឆ្នាំ២០២១។ ការផ្គត់ផ្គង់បុរីលំនៅឋានទាំងនេះមាន ៥៧ ភាគរ​យផ្តោតលើតម្លៃបង្គួរ និង ៣៣ភាគរយផ្តោតលើតម្លៃសមរម្យ។ តាមការរំពឹងទុកចំនួនលំនៅឋានបុរីអាចកើនដល់ជិត​ ១០ម៉ឺនខ្នងពេញមួយឆ្នាំ២០២១នេះ។

ក្រុមហ៊ុនជំនាញក្នុងវិស័យអចលនទ្រព្យបានកំណត់ប្រភេទ​ទីផ្សារលំនៅឋានជាបីប្រភេទ។ ទី១គឺទីផ្សារលំនៅឋានតម្លៃសមរម្យ ដែលបច្ចុប្បន្នមានតម្លៃចន្លោះពី ៤ម៉ឺន ទៅ១០ម៉ឺនដុល្លារក្នុងមួយខ្នង, ទីផ្សារតម្លៃបង្គួរ​ចន្លោះពី១០ម៉ឺន ទៅ ៤០ម៉ឺនដុល្លារ ខណៈដែលលំនៅឋានលំដាប់ខ្ពស់មានតម្លៃចាប់ពី ៤០ម៉ឺនដុល្លារឡើងទៅ។

ការផ្តល់កម្ចីទិញផ្ទះកើនឡើង ឆ្លុះបញ្ជាំងពី​ទំនុកចិត្ត​

គ្រឹះស្ថានហិរញ្ញវត្ថុហាក់ផ្តល់ទំនុកចិត្តខ្ពស់ដល់ទីផ្សារអចលនទ្រព្យកម្ពុជា ដោយបន្តពង្រីកទុនរបស់ខ្លួនទៅក្នុងវិស័យនេះតាមរយៈការផ្តល់កម្ចីបន្តែម។ គិតត្រឹមខែកញ្ញា ឆ្នាំ២០២១ កម្ចីក្នុងវិស័យអចលនទ្រព្យបានកើនដល់ប្រមាណ ៦ ពាន់លានដុល្លារ គឺកើនពីត្រឹម ៥ពាន់លានដុល្លារកាលពី​ដំណាច់ឆ្នាំ២០២០។ នេះបើតាមរបា​យការណ៍របស់ការិយាល័យឥណទាន​កម្ពុជា​​ ហៅកាត់ថា CBC។

ទុនវិនិយោគផ្ទាល់ពីបរទេស​ក្នុងវិស័យអចលនទ្រព្យឧស្សាហកម្មច្រើនជាងគេ​

ការវិនិយោគក្នុងវិស័យសំណង់ និងអចលនទ្រព្យមានចំណែកដល់ទៅ ៥០ ភាគរយ​ នៃរំហូរវិនិយោគផ្ទាល់ពីបរទេស(FDIs) នៅមុនពេលផ្ទុះកូវីដ-១៩។ ការអូសបន្លាយនៃជំងឺកូវី-១៩ បានធ្វើឱ្យទុនវិនិយោគពី FDIs ធ្លាក់មកសល់ប្រមាណ ៥៤០ លានដុល្លារប៉ុណ្ណោះក្នុងរយៈពេល៩ខែឆ្នាំ២០២១ ឬធ្លាក់ចុះ ៨០ ភាគរយធៀបរយៈពេលដូចគ្នានឹងឆ្នាំ២០២០។ ​ការវិនិយោគពីFDI នៅកម្ពុជាធ្លាប់មានទឹកប្រាក់ដល់ទៅ​ជាង ៣,៤ ពាន់លានដុល្លារនៅឆ្នាំ២០១៩ និង ៣,៦ ពាន់លានដុល្លារនៅឆ្នាំ២០២០។ នេះបើតាមរបាយការណ៍ធនាគារពិភពលោក។

ខុនដូ ទីផ្សារអចលនទ្រព្យពាណិជ្ជកម្ម និងឧស្សាហកម្ម​

ការថមថយនៃរំហូរវិនិយោគផ្ទាល់ពីបរទេសនេះ ទំនងជាកត្តាសំខាន់មួយ​ធ្វើឱ្យចំណែកទីផ្សារខុនដូ និងទីផ្សារអចលនទ្រព្យពាណិជ្ជកម្មហាក់នៅទ្រឹង ជាពិសេសទាក់ទឹងតម្លៃទីផ្សារ។ អចលនទ្រព្យពាណិជ្ជកម្មសំដៅលើអគារការិយាល័យ ផ្សារទំនើប ខណៈដែលអចលនទ្រព្យឧស្សាហកម្មគឺសំដៅលើឃ្លាំងស្តុកទំនិញ និងរោងចក្រឧស្សាកហកម្មជាដើម។

បើតាម CBRE Cambodia ការផ្គត់ផ្គង់ខុនដូមានភាពយឺតយ៉ាវ ដោយ២ភាគ៣ នៃគម្រោងខុនដូរំពឹងបញ្ចប់ការសាងសង់នៅឆ្នាំនេះ ត្រូវបានពន្យាពេលទៅឆ្នាំក្រោយ។ ទិន្នន័យពីក្រុហ៊ុនដដែលបានបង្ហាញទៀតថា ក្នុងរយៈពេល៩ ខែដំបូង​ឆ្នាំ២០២១ ការផ្គាត់ផ្គង់ខុនដូសរុបមានចំនួនជិត ៨ ពាន់យូនីត ក្នុងនោះមានតែ ៣៦ ភាគរយប៉ុណ្ណោះបានបញ្ចប់ការសាងសង់រួចរាល់។ រីឯតម្លៃ​វិញ គឺមានចន្លោះពី ១ ៦០០ដុល្លារ ទៅ ៣ ២០០ ដុល្លារក្នុងមួយម៉ែត្រការ៉េ ដោយអាស្រ័យទៅតាមប្រភេទខុនដូដូចជា យូនីតខុនដូតម្លៃសមរម្យ មធ្យម និងកម្រិតខ្ពស់។ ហើយតម្លៃខុនដូទាំងបីកម្រិតនេះគឹមានការធ្លាក់ចុះចន្លោះពី ២ ទៅ ៣ ភាគរយ ធៀបនឹងត្រីមាសទី ១ ឆ្នាំ២០២០។

អគ្គនាយកក្រុមហ៊ុន RENT KH លោក នាក់ សមសែន បាន​លើកឡើងថា៖ «តម្លៃជួលខុនដូ និងអាផាតមិន ចាប់​ផ្តើមងើបបណ្តើរៗទៅរកតម្លៃដូចមុន ដោយសារតម្រូវការមានការកើន​ឡើងវិញ»។ លោកថា ទីផ្សារជួលនឹងងើបឡើងវិញលឿនដោយសារ​ការផ្គត់ផ្គង់នៅមានកម្រិតនៅឡើយក្នុងការឆ្លើយតបទៅនឹងតម្រូវការ។​

[អានបន្ថែម៖ ទីផ្សារជួល-ទិញ ខុនដូ និងអាផាតមិន រំពឹងងើបឡើងឆាប់រហ័ស]

ការផ្គត់ផ្គង់ទីផ្សារការិយាល័យ

បរិមាណ​បន្តកើនឡើងនៅឆ្នាំនេះ នឹងឆ្នាំបន្ទាប់។ តាមការរំពឹងទុក ការផ្គត់ផ្គង់ ការិយាល័យនឹងកើនដល់ជាង ៧៩ម៉ឺនម៉ែត្រការ៉េ នៃទំហំផ្ទៃក្រឡាជួលសរុប (NLA) ដែលកើនជាង ១សែន៤ម៉ឺនម៉ែត្រការ៉េ ធៀបនឹងឆ្នាំ​មុន។ ទំហំផ្ទៃក្រឡាជួលនេះនឹងបន្តកើនដល់ជាង ១លានម៉ែត្រការ៉េ នៅត្រឹមដំណាច់ឆ្នាំ២០២២។ ការជួលការិយាល័យ​មានតម្លៃចាប់ពី ១២ ដល់ ៣០ ដុល្លារក្នុងមួយម៉ែត្រការ៉េ ក្នុងមួយខែ​ ដែលតម្លៃជួលនេះមានការថមថយចន្លោះពី ២ ទៅ ៣ភាគរយ ធៀបនឹងត្រីមាសទី៣ឆ្នាំនេះ។ តម្លៃការិយាល័យគឺអាស្រ័យទៅតាមទីតាំង និងកម្រិតខុសៗគ្នា ដូចជាអគាការិយាល័យកម្រិត A B និង C។

ទីផ្សារអចលនទ្រព្យលក់រាយ​

ទីផ្សារលក់រាយក៏នៅតែបង្ហាញពីសកម្មភាពថមថយដែរទាក់ទងអត្រាជួល ដែលក្នុងត្រីមាសទី៣ ឆ្នាំនេះធ្លាក់ចុះជិត ៤ ភាគរយធៀបនឹងត្រីមាសមុន។ ផ្ទៃក្រឡាជួលក្នុងវិស័យលក់រាយកើនដល់ជាង ៣សែន ៧ម៉ឺនម៉ែត្រការ៉េ ខណៈដែលអត្រាជួល​មានប្រហែល ៦៨ ភាគរយ និង២៨ភាគរយនៅទំនេរ។ ការជួលទីតាំងធ្វើអាជីវកម្មក្នុងផ្សារទំនើបមានតម្លៃចាប់ពី ២០ ដុល្លារ ដល់ទៅ ៣០ដុល្លារ ក្នុងមួយម៉ែត្រការ៉េ ក្នុងមួ​យខែ។ តម្លៃជួលនេះគឺមានការថមថយចន្លោះពី ០,៤ ដល់ ៩ ភាគរយ ទៅតាមប្រភេទផ្សារទំនើប។

ដ្បិតថា ចំណែកទីផ្សារ​អចលនទ្រព្យពាណិជ្ជកម្ម មិនទាន់មានការបង្ហាញពីសកម្មភាពវិជ្ជមាន​ឡើងវិញ តែការវិនិយោគអចលនទ្រព្យឧស្សាហកម្មបានបង្ហាញពីសកម្មភាពវិនិយោគយ៉ាងច្រើនសន្ធឹកសន្ធាប់​។ គ្រាន់តែរយៈពេល ៩ខែឆ្នាំ២០២១នេះ ការវិនិយោគលើរោងចក្រឧស្សាហកម្មមានចំណែកដល់ទៅ ៨៥ ភាគរយ នៃទុនវិនិយោគពី FDIs សរុប ៥៤០លានដុល្លារ៕

[អានបន្ថែម៖ អចលនទ្រព្យឧស្សាហកម្ម ក្លាយជាទិសដៅវិនិយោគលេចធ្លោក្នុងតំបន់អាស៊ាន]

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង