ហេតុអ្វីគួរវិនិយោគដីធ្លីក្នុងស្រុកអង្គស្នួល?

ប៊ុនធឿន 19/October/2021 15:48
ទស្សនា
ចែករំលែក

ខេត្តកណ្តាល៖  ស្រុកអង្គស្នួលក្លាយជាទិសដៅវិនិយោគលើរោងចក្រឧស្សាហកម្មលេចធ្លោជាងគេ ដោយមានរោងចក្រថ្មីៗបោះទីតាំងវិនិយោគ​ក្នុងស្រុកនេះដល់ទៅជាង ១០គម្រោង នៃគម្រោងវិនិយោគសរុបក្នុងខេត្តកណ្តាល។

ស្រុកអង្គស្នួល ជាតំបន់ឆ្លងកាត់ផ្លូវជាតិលេខ ៤ ដែលជាផ្លូវគមនាគមន៍ដ៏សំខាន់ក្នុងការតភ្ជាប់រាជធានីភ្នំពេញ ជាមួយខេត្តកំពង់ស្ពឺ និងខេត្តព្រះសីហនុ។ ការបោះទីតាំងវិនិយោគរោងចក្រឧស្សាហកម្មថ្មីៗជាច្រើនក្នុងស្រុកអង្គស្នួល នឹងជំរុញសកម្មភាពវិនិយោគដីធ្លីក្នុងស្រុកនេះកាន់តែទាក់ទាញ។

យោងតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC) លើទំព័រហ្វេសបុកផ្លូវការទាក់ទងនឹងការអនុម័តគម្រោងវិនិយោគចាប់ពីខែមករា ដល់ដំណាច់ខែកញ្ញា ឆ្នាំ២០២១ បានបង្ហាញថា ខេត្តកណ្តាលទទួលបានគម្រោងវិនិយោគ ២៤ គម្រោង ដែលមានទុនវិនិយោគប្រមាណ ១៧៥ លានដុល្លារ។

តាមទិន្នន័យ ស្រុកអង្គស្នួលទទួលបានគម្រោងវិនិយោគច្រើនជាងគេដល់ទៅ ១៣ គម្រោង នៃគម្រោងវិនិយោគសរុប ២៤ គម្រោង។ គម្រោងផ្សេងៗទៀត បោះទីតាំងក្នុងស្រុកកណ្តាលស្ទឹង ស្រុកកៀនស្វាយ និងស្រុកពញាឮ​ ​​ជាដើម។​

លោក ស៊ូ ប៊ុនសុង ប្រធានសាខាក្រុមហ៊ុន Century 21 Zillion Holding ប្រចាំខេត្តកណ្តាល បានប្រាប់បណ្តាញព័ត៌មានអចលនទ្រព្យ Z1News ថា ស្រុកអង្គស្នួលជាតំបន់មានសណ្ឋានដីខ្ពង់រាបស្មើ  និងមានទីតាំងឋិតនៅកៀកនឹងរាជធានីភ្នំពេញ  ដោយឆ្លងកាត់តាមបណ្តោយផ្លូវជាតិលេខ ៤ ដែលជាផ្លូវដឹកជញ្ជូនតភ្ជាប់ប៉ូលសេដ្ឋកិច្ចធំៗពីរគឺរាជធានីភ្នំពេញ និងខេត្តព្រះសីហនុ។ លោកបន្តថា កត្តាអំណោយផលទាំងនេះធ្វើឱ្យស្រុកអង្គស្នួលកាន់តែមានសក្តានុពលខ្ពស់ក្នុងការវិនិយោគរោងចក្រឧស្សាហកម្ម និងតម្រូវការទីតាំងដីសម្រាប់សាងសង់ផ្ទះល្វែង និងអាជីវកម្មផ្សេងៗ។

លោក ប៊ុនសុង បានបញ្ជាក់ថា ទីតាំងដីធ្លីជាង ២០ កន្លែងក្នុងស្រុកអង្គស្នួល កំពុងដាក់លក់តាមរយៈសាខាក្រុមហ៊ុន Century 21 Zillion Holding ប្រចាំខេត្តកណ្តាល។ លោកបញ្ជាក់បន្ថែមថា​ ទីផ្សារដីធ្លីក្នុងស្រុកអង្គស្នួល មានតម្លៃដាក់លក់ (asking price) ជាមធ្យមចន្លោះពី ៥០ ទៅ ២៥០ ដុល្លារក្នុងមួយម៉ែត្រការ៉េ សម្រាប់ទីតាំងដីធ្លីតាមផ្លូវតូច។ ទីតាំងដីដែលជាប់នឹងផ្លូវជាតិលេខ ៤ ក្នុងភូមិសាស្រ្តឆ្លងកាត់ខេត្តកណ្តាលមានតម្លៃដាក់លក់ចន្លោះពី ២៥០ ទៅ ៥០០ ដុល្លារក្នុងមួយម៉ែត្រការ៉េ៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង