ជាង ៣០ ភាគរយនៃមហាសេដ្ឋីប្រទេសសឹង្ហបូរី ជាអ្នកជំនួញអចលនទ្រព្យ

ប៊ុនធឿន 12/October/2021 10:26
ទស្សនា
ចែករំលែក

សឹង្ហបូរី៖ អ្នកជំនួញដែលត្រូវបានផ្តល់ចំណាត់ថ្នាក់ជាមហាសេដ្ឋីក្នុងប្រទេសសឹង្ហបូរីមានប្រមាណជាង ៣០ ភាគរយ ដែលបានបង្កើតទ្រព្យសម្បត្តិស្តុកស្តម្ភរបស់ពួកគេតាមរយៈការវិនិយោគក្នុងវិស័យអចលនទ្រព្យ។ នេះបើតាមទស្សនាវដ្តី Forbes។

ទស្សនាវដ្តី Forbes បានផ្តល់ចំណាត់ថ្នាក់អ្នកជំនួញចំនួន ៥០នាក់ ជាមហាសេដ្ឋីក្នុងប្រទេសសឹង្ហបូរីប្រចាំឆ្នាំ២០២១ ដែលមហាសេដ្ឋីទាំងនេះវិនិយោគលើមុខជំនួញផ្សេងៗគ្នារួមមាន អចលនទ្រព្យ បច្ចេកវិទ្យា វិស័យសុខាភិបាល ធនាគារ និងហិរញ្ញវត្ថុ វិស័យលក់រាយ និងការវិនិយោគចម្រុះ(diversified) ជាដើម​។​

បើតាម Forbes មហាសេដ្ឋីចំនួន ១៧នាក់ ឬស្មើនឹង ៣៤ ភាគរយ នៃមហាសេដ្ឋីសរុបទាំង ៥០នាក់ បានបង្កើតទ្រព្យសម្បត្តិរបស់ពួកគេតាមរយៈការវិនិយោគក្នុងវិស័យអចលនទ្រព្យ។

ប្រភពដដែលបង្ហាញថា បងប្អូនបង្កើតពីរនាក់គឺលោក Phillip Ng និងលោក Robert Ng គ្រប់គ្រងក្រុមហ៊ុនអភិវឌ្ឍអចលនទ្រព្យធំជាងគេបង្អស់នៅសឹង្ហបូរីគឺក្រុមហ៊ុន Far East Organization និងក្រុមហ៊ុនអភិវឌ្ឍអចលនទ្រព្យ Sino Group មានមូលដ្ឋាននៅហុង កុង។

គ្រួសារត្រកូល Ng ពីរនាក់បងប្អូនបង្កើតនេះ កំពុងគ្រប់គ្រងជំនួញអចលនទ្រព្យ ហើយបានបង្កើតទ្រព្យសម្បត្តិពីវិស័យនេះបូកបញ្ចូលគ្នាដល់ទៅជាង ១៤ ពាន់លានដុល្លារអាមេរិក ដែលជាទ្រព្យសម្បត្តិច្រើនជាងគេក្នុងវិស័យអចលនទ្រព្យនៅ​ប្រទេសសឹង្ហបូរី។ ប៉ុន្តែ បើគិតក្នុងចំណោមមហាសេដ្ឋីទាំង៥០​នាក់ បងប្អូនបង្កើតត្រកូល Ng ឈរនៅលេខរៀងទី៦។

ទស្សនាវដ្តី Forbes បានផ្តល់ចំណាត់ថ្នាក់មហាសេដ្ឋីក្នុងប្រទេសសឹង្ហបុរីដោយផ្អែកលើទ្រព្យសម្បត្តិរបស់ពួកគេបង្កើតបាន ដោយគិតត្រឹមខែសីហា ឆ្នាំ២០២១ ដែលអ្នកជំនួញមានទ្រព្យសម្បត្តិជាង ២០ ពាន់លានដុល្លារអាមេរិក ជាមហាសេដ្ឋីឈរលេខរៀងទី១ ខណៈដែលមហាសេដ្ឋីទី៥០ មានទ្រព្យសម្បត្តិជាង ៧០០ លានដុល្លារអាមេរិក។

បើតាម Forbes មហាសេដ្ឋីទី១របស់សឹង្ហបុរី គឺលោក Li Xiting ដែលមានទ្រព្យសម្បត្តិសរុប ២៣ ពាន់លានដុល្លារអាមេរិក។ លោក​ Li ជាអ្នកជំនួញក្នុងវិស័យសុខាភិបាល ខណៈដែលមហាសេដ្ឋីទី៥០ គឺលោក Saurabh Mittal ជាអ្នកជំនួញវិស័យហិរញ្ញវត្ថុ មានទ្រព្យសម្បត្តិសរុប ៧៣៥ លានដុល្លារអាមេរិក៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង