តើគម្រោងអភិវឌ្ឍដីចាប់ពីប៉ុន្មានម៉ែត្រការ៉េត្រូវស្នើសុំលិខិតអនុញ្ញាតពីក្រសួង ?

គម្រោងអភិវឌ្ឍដីសម្រាប់គោលដៅបំបែកក្បាលដីពី​មួយ ទៅជាក្បាលដីច្រើនកន្លែងសម្រាប់លក់ ឬ​សាងសង់លំនៅឋាន ពាណិជ្ជកម្ម និងគោលដៅផ្សេងៗត្រូវស្នើសុំលិខិតអនុញ្ញាតអភិវឌ្ឍដីជាមុនពីអាជ្ញាធរមានសមត្ថកិច្ច។

យោងតាមប្រកាសស្តីពី «ការអភិវឌ្ឍដី» ចុះហត្ថលេខាដោយឯកឧត្តមជា សុផារ៉ា  រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីខែឧសភា ឆ្នាំ២០១៨ បានបញ្ជាក់ថា គម្រោងអភិវឌ្ឍដីត្រូវបានបែងចែកទៅតាមទំហំផ្សេងគ្នា ដើម្បីស្នើសុំលិខិតអនុញ្ញាតអភិវឌ្ឍជាមុនពីអាជ្ញាធរមានសមត្ថកិច្ចដូចខាងក្រោម៖  ​

ទី១_គម្រោងអភិវឌ្ឍដីដែលមានទំហំផ្ទៃដីធំជាង ៣០ ០០០ ម៉ែត្រក្រឡា ត្រូវស្នើ​សុំលិខិតអនុញ្ញាតអភិវឌ្ឍដីពីរដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់

ទី២_គម្រោងអភិវឌ្ឍដីដែលមានទំហំផ្ទៃដីតូចជាង ឬស្មើ ៣០ ០០០ ម៉ែត្រក្រឡា ត្រូវស្នើសុំលិខិតអនុញ្ញាតអភិវឌ្ឍដីពី អភិបាលនៃគណៈអភិបាលរាជធានីខេត្ត ដែលទីតាំងគម្រោងនោះស្ថិតនៅ។​​

ទី៣_គម្រោងអភិវឌ្ឍដីដែលមានទំហំផ្ទៃដីតូចជាង ឬស្មើ ៥ ០០០ ម៉ែត្រក្រឡា ត្រូវស្នើសុំលិខិតអនុញ្ញាតអភិវឌ្ឍដីពីអភិបាលនៃគណៈអភិបាលក្រុង ស្រុក ខណ្ឌ ដែលទីតាំងគម្រោងនោះស្ថិតនៅ ក្នុងករណីដែលក្រុង ស្រុក ខណ្ឌ នោះមានប្លង់គោលប្រើប្រាស់ដី ដែលត្រូវបានអនុម័តដាក់ឱ្យប្រើប្រាស់ជាផ្លូវការរួចមក៕

សូមចុចទីនេះដើម្បីទាញយកប្រកាសស្តីពី ការអភិវឌ្ឍដី