ភាសាខ្មែរ 
English 
អ្នកអភិវឌ្ឍដីឡូតិ៍ត្រូវដាក់ប្រាក់តម្កល់ធានាអាជីវកម្មរបស់ខ្លួនខ្ពស់ជាងក្រុមហ៊ុនអភិវឌ្ឍលំនៅឋាន ឬអគារសហកម្មសិទ្ធិ ដែលលក្ខណ្ឌតម្រូវនេះធ្វើឡើងដើម្បីធានាតុល្យភាពផលប្រយោជន៍អ្នកអភិវឌ្ឍនិងអ្នកប្រើប្រាស់ និងការទប់ស្កាត់ហានិភ័យហិរញ្ញវត្ថុក្នុងវិស័យអចលនវត្ថុ។
ប្រកាសស្តីពី «ការគ្រប់គ្រងអាជីវកម្មអភិវឌ្ឍអចលនវត្ថុ» ចេញផ្សាយក្នុងឆ្នាំ២០២០ដោយក្រសួងសេដ្ឋកិច្ចនិងហិរញ្ញវត្ថុបានបញ្ជាក់ថា អ្នកអភិវឌ្ឍលំំនៅឋាន ឬអគារសហកម្មសិទ្ធិ (ខុនដូ, អគារការិយាល័យ, អគារផ្សារ) ដែលស្នើសុំអាជ្ញាបណ្ណ ឬលខិតអនុញ្ញាតអាជីវកម្មប្រភេទ២ ត្រូវដាក់ប្រាក់តម្កល់ធានាអាជីវកម្មរបស់ខ្លួនចំនួន ២ ភាគរយ នៃតម្លៃសំណង់សរុប ឬតម្លៃសំណង់តាមដំណាក់កាលនីមួយៗ។ អ្នកអភិវឌ្ឍដីឡូតិ៍វិញ តម្រូវឱ្យដាក់ប្រាក់តម្កល់ធានាអាជីវកម្មចំនួន ៥ ភាគរយ នៃតម្លៃវិនិយោគសរុប ឬតម្លៃវិនិយោគតាមដំណាក់កាលនីមួយៗ។
ប្រកាសដដែលបានបញ្ជាក់ថា ទាំងអ្នកអភិវឌ្ឍលំនៅឋាន ឬអគារសហកម្មសិទ្ធិ និងអ្នកអភិវឌ្ឍដីឡូតិ៍ ត្រូវដាក់ប្រាក់តម្កល់តាមវីធីសាស្រ្តណាមួយដូចជា តាមរយៈការតម្កល់ជាសាច់ប្រាក់ក្នុងគណនីទោលរតនាគារជាតិ ដែលបើកនៅធានាគារជាតិនៃកម្ពុជា ឬនៅធនាគារពាណិជ្ជកម្មក្នុងស្រុក ឬជាលិខិតធានាពីធនាគារពាណិជ្ជក្នុងស្រុកណាមួយដែលមានតម្លៃស្មើ។
ប្រាក់តម្កល់ដកបានវិញនៅពេលណា?
ប្រាក់តម្កល់ធានាអាជីវកម្មអភិវឌ្ឍលំនៅឋាន ឬអគារសហកម្មសិទ្ធិ អាចដកវិញបានលុះត្រាតែគម្រោងអភិវឌ្ឍលំនៅឋាន ឬអគារសហកម្មសិទ្ធិនោះសាងសង់បានចាប់ពី ៧០ ភាគរយឡើង ឬចប់ជាស្ថាពរដោយមានលិខិតបិទការដ្ឋានសាងសង់ និងលិខិតបញ្ជាក់គុណភាពសំណង់ និងក្រោយពីមានការចុះវាយតម្លៃជាក់ស្តែងពីមន្រ្តីជំនាញ។ ក្នុងករណី គម្រោងអភិវឌ្ឍលំំនៅឋាន ឬអគារសហកម្មសិទ្ធិមានច្រើនដំណាក់កាល ឬអ្នកអភិវឌ្ឍមានគម្រោងថ្មីមួយផ្សេងទៀត ដូច្នេះប្រាក់តម្កល់ធានាអាជីវកម្មនេះអាចធ្វើការផ្ទេរពីមួយដំណាក់កាលទៅមួយដំណាក់កាល ឬពីមួយគម្រោងទៅមួយគម្រោងទៀតបាន បន្ទាប់ពីដំណាក់កាលមុន ឬគម្រោងមុនសាងសង់បាន ៥០ ភាគរយឡើង។
ចំណែកឯប្រាក់តម្កល់ធានាអាជីវកម្មដីឡូតិ៍វិញ អាចដកវិញបានលុះត្រាតែអ្នកអភិវឌ្ឍដីឡូតិ៍ បានបំពេញកាតព្វកិច្ចចប់សព្វគ្រប់ រួមទាំងការផ្ទេរកម្មសិទ្ធិអចលនវត្ថុជូនអ្នកទិញទៅតាមកិច្ចសន្យា និងក្រោយពីមានការចុះវាយតម្លៃជាក់ស្តែងពីមន្រ្តីជំនាញ។
ចុចទីនេះដើម្បីទាញយកប្រកាសស្តីពី ការគ្រប់គ្រងអាជីវកម្មអភិវឌ្ឍអចលនវត្ថុ
អត្ថបទទាក់ទង៖ បណ្ណអាជីវកម្មអភិវឌ្ឍលំនៅឋាន បែងចែកជាប៉ុន្មានប្រភេទ ហើយខុសគ្នាដូចម្តេចខ្លះ?
