តម្លៃដីខ្ពស់បំផុតក្រុងកំពង់ឆ្នាំង ប្រហាក់ប្រហែលតម្លៃដីទាបបំផុតក្រុងច្បារមន

ប៊ុនធឿន 22/September/2021 16:09
ទស្សនា
ចែករំលែក

ហាងឆេង​​ដី​ក្នុងក្រុងកំពង់ឆ្នាំង ខេត្តកំពង់ឆ្នាំងមានតម្លៃទាបជាងឆ្ងាយនៅឡើយធៀបនឹងក្រុងច្បារមនខេត្តកំពង់ស្ពឺ ដោយទិន្នន័យ​បង្ហាញថា​​តម្លៃដីដាក់លក់​​ខ្ពស់បំផុតក្នុងក្រុងកំពង់ឆ្នាំង​ ស្មើ​នឹង​តម្លៃទាបបំផុតក្នុង​ក្រុងច្បារមន។ នេះបើតាម​ក្រុមហ៊ុន Century 21 Zillion Holding ដែលជាក្រុមហ៊ុនឯកទេសខាងទិញ លក់ និងជួលដីធ្លី។

ខេត្តទាំងពីរមានព្រំប្រទល់ជាប់គ្នា តែជាតំបន់​សម្រាប់ការចរាចរណ៍ទិសដៅផ្សេងគ្នាដោយសារក្រុងច្បារមនជាតំបន់ឆ្លងកាត់ពីភ្នំពេញទៅខេត្តភាគ​​ខាងលិច ខណៈកំពង់ឆ្នាំង ជាតំបន់ឆ្លងកាត់ពីភ្នំពេញទៅខេត្តភាគពាយ័ព្យ។

យោងតាមទិន្នន័យដីធ្លីសាខាក្រុមហ៊ុន Century 21  Zillion Holding ប្រចាំខេត្តកំពង់ឆ្នាំង បានបង្ហាញថា ក្រុងកំពង់ឆ្នាំងមានតម្លៃដីដាក់លក់ជាមធ្យមចន្លោះពី ១៥០ ទៅ ៧០០ ក្នុងមួយម៉ែតការ៉េ។ ហាងឆេងដីនៅ​ក្រុងច្បារមនខេត្តកំពង់ស្ពឺវិញ មានតម្លៃដីដាក់លក់ជាមធ្យមចន្លោះពី ៧០០ ទៅ ២ ៧០០ ដុល្លារក្នុងមួយម៉ែត្រការ៉េ។

តាមរយៈទិន្នន័យនេះ​ តម្លៃដីទាបបំផុតក្នុងក្រុងច្បារមននាពេលបច្ចុប្បន្ន មានតម្លៃប្រហាក់ប្រហែលនឹងតម្លៃដីខ្ពស់បំផុតក្នុងក្រុងកំពង់ឆ្នាំង។

ក្រុងច្បារមនខេត្តកំពង់ស្ពឺ​ ជាតំបន់ពាណិជ្ជកម្ម និងមានរោងចក្រឧស្សាហកម្ម​ច្រើន និងជាតំបន់កណ្តាលរវាងរាជធានីភ្នំពេញ និងខេត្តព្រះសីហនុ ដែលជាតំបន់កំពង់ផែអន្តរជាតិ។

ក្រុងកំពង់ឆ្នាំងក៏ជាតំបន់សក្តានុពលសម្រាប់ការ​ឆ្លងកាត់មួយដ៏សំខាន់​ពីភ្នំពេញទៅខេត្តធំៗដូចជាបាត់ដំបង ពោធិ៍សាត់ និងបន្ទាយមានជ័យ ដែលមាន​​​​សកម្មភាពពាណិជ្ជកម្ម និងទេសចរណ៍កំពុងរីកចម្រើន ហើយ​​ទីផ្សារដីធ្លីដ៏កំពុង​មានភាពអំណោយផលផងដែរ៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង