ស្រុក៣ក្នុងខេត្តពោធិ៍សាត់មានតម្លៃដីប្រហាក់់ប្រហែលគ្នា

ស្រុកសំខាន់ៗចំនួន ៣ ក្នុងខេត្តពោធិ៍សាត់ ដែលជាទីតាំងទាក់ទាញលើគម្រោងវិនិយោគរោងចក្រឧស្សាហកម្ម បានបង្ហាញពីតម្លៃដីធ្លីប្រហាក់ប្រហែលគ្នា ដែលទីតាំងដីក្នុងស្រុកទាំងបីនេះមានតម្លៃខ្ពស់បំផុត​៣៥០ដុល្លារក្នុងមួយម៉ែត្រការ៉េ។

លោកប៊ឹក ពោធិ៍ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចំាខេត្តពោធិ៍សាត់ បានឱ្យដឹងថា ស្រុកបាកាន, ភ្នំក្រវាញ និងស្រុកក្រគរ មានតម្លៃដីដាក់លក់ប្រហាក់ប្រហែលគ្នា ចន្លោះពី២៥ ដុល្លារ ទៅ៣៥០ដុល្លារ ក្នុងមួយម៉ែត្រការ៉េ នាពេលបច្ចុប្បន្ន។​ បើធៀបនឹងឆ្នាំមុន ទីតាំងដីក្នុងស្រុកទាំងបីនេះមានតម្លៃដាក់លក់តែ​១៥ ដុល្លារ ទៅ ៣០០ដុល្លារ  ក្នុងមួយម៉ែត្រការ៉េ។

បើតាមលោក ប៊ឹក ពោធិ៍ តម្លៃដីនេះគឺផ្តោតតែលើទីតាំងដីដែលឋិតនៅតាមតំបន់ប្រជុំជននៃទីរួមស្រុក និងទីតាំងដីមានចំងាយប្រហែល ៥ គីឡូម៉ែត្រចេញពីទីរួមស្រុកនីមួយៗ។​ ស្រុកភ្នំក្រវាញឆ្លងកាត់ផ្លូវជាតិលេខ ៥៥ ដែលតភ្ជាប់ជាមួយច្រកព្រំដែនថ្មថា រវាងកម្ពុជា​ និងប្រទេសថៃ។ ចំណែកស្រុកបាកាន និងស្រុកក្រគរ ឆ្លងកាត់ផ្លូវជាតិលេខ ៥ ជាផ្លូវអាស៊ានហាយវេលេខ១ ដែលអាចបង្កើនការនាំចេញ-នាំចូល និងជាផ្លូវមួយប្រកបដោយសក្តានុពលខ្ពស់សម្រាប់បម្រើវិស័យសេដ្ឋកិច្ចកម្ពុជា។

ក្នុងចំណោមស្រុកទាំងបីនេះ ស្រុកក្រគរ មានការវិនិយោគច្រើនជាងគេលើរោងចក្រឧស្សាហកម្ម។ ជាក់ស្តែង​ ពីឆ្នាំ២០២០ ដល់ដំណាច់ខែសីហា ឆ្នាំ២០២១ មានគម្រោងធំៗចំនួន៥ ទទួលបានការអនុម័តពីក្រុមប្រឹក្សាអភិវឌ្ឍន៍កម្ពុជា ដើម្បីបោះទុនវិនិយោគក្នុងខេត្តពោធិ៍សាត់។ ក្នុងចំណោមនោះ មាន៤គម្រោង បោះទីតាំងវិនិយោគក្នុងស្រុកក្រគរ និងមួយផ្សេងទៀតស្ថិតក្នុងស្រុកវាលវែង។

កាលពីពេលថ្មីៗនេះ ក្រុមហ៊ុន RMA Cambodia ដែលជាក្រុមហ៊ុននាំចូល និងចែកចាយរថយន្ត Ford កាលពីថ្មីៗនេះក៏បានបង្ហាញគម្រោងរោងចក្រផ្គុំ និង​តម្លើងរថយន្ត Ford ក្នុងស្រុកក្រគរផងដែរ ដោយ​​គ្រោងចំណាយ​ទុនវិនិយោគ ២១ លានដុល្លារ។ (អានបន្ថែម)

ស្រុកទាំងបីខាងលើ ស្ថិតក្នុងចំណោមស្រុកបីផ្សេងទៀតក្នុងខេត្តពោធិ៍សាត់គឺស្រុកតាលោសែនជ័យ កណ្តៀង និងស្រុកវាលវែង។ ស្រុកតាលោសែនជ័យ​ មានតម្លៃដីទាបជាងគេ ដែលទីតាំងដីទីឋិតក្នុងតំបន់ប្រជុំជនក្នុងស្រុកនេះមានតម្លៃចន្លោះពី ១៥ ទៅ ២៥០ ដុល្លារក្នុងម៉ែត្រការ៉េ៕​