ភាសាខ្មែរ 
English 
កាតព្វកិច្ចពន្ធពីរប្រភេទក្នុងវិស័យអចលនទ្រព្យនឹងអាចចាប់ផ្តើមអនុវត្តន៍ឡើងវិញនៅចុងឆ្នាំនេះ និងដើមឆ្នាំ២០២២ ប្រសិនបើមិនមានការប្រកាសលើកលែង ឬពន្យាពេលអនុវត្តន៍សារជាថ្មីពីរដ្ឋាភិបាលទេនោះ។
កតព្វកិច្ចពន្ធទាំងពីរគឺ ពន្ធប្រថាប់ត្រាចំពោះអចលនទ្រព្យលំនៅឋានដែលមានតម្លៃស្មើ ឬក្រោម ៧ម៉ឺនដុល្លារ និង ពន្ធលើចំណេញមូលធន ដែលគ្រោងអនុវត្តន៍ចាប់ពីថ្ងៃទី ១មករាឆ្នាំ២០២១ ប៉ុន្តែត្រូវពន្យាពេលដោយសារឥទ្ធិពលវិបត្តិកូវីដ-១៩។
ប្រសិនបើមិនការប្រែប្រួលទេនោះ ឬ មិនមានការប្រកាសជាថ្មីពីរដ្ឋាភិបាលទេនោះ កាតព្វកិច្ចពន្ធប្រថាប់ត្រាសម្រាប់អចលនទ្រព្យលំនៅឋានតម្លៃស្មើ ឬក្រោម ៧ម៉ឺនដុល្លារនឹងត្រូវអនុវត្តន៍ឡើងវិញនៅចាប់ពីខែធ្នូឆ្នាំ ២០២១ នេះទៅ ខណៈពន្ធលើចំណេញមូលធននឹងអនុវត្តន៍ចាប់ពីខែមករាឆ្នាំ ២០២២។
ខាងក្រោមនេះគឺជាចំណុចសំខាន់ៗមួយចំនួនដែលអ្នកគួរដឹងពីប្រភេទពន្ធទាំងពីរនេះ៖
- ពន្ធប្រថាប់ត្រាលើអចលនទ្រព្យ មានការកំណត់អត្រាពន្ធ ៤% នៃតម្លៃអចលនទ្រព្យ។ ពន្ធនេះត្រូវបានប្រមូលលើរាល់ការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ (ដូចជា ការទិញលក់ ឬការដោះដូរ ឬការធ្វើអំណោយ ឬការដាក់ភាគហ៊ុនជាអចលនទ្រព្យក្នុងក្រុមហ៊ុន) ទោះបីអចលនទ្រព្យនោះមានប័ណ្ណកម្មសិទ្ធិជាប្លង់រឹង និងប្លង់ទន់ក្តី។
- ប្រមូលចំណូលបាន ៩០ លានដុល្លារ៖ ពេញមួយឆ្នាំ២០២០ ចំណូលពីពន្ធប្រថាប់ត្រាបានប្រមូលចូលថវិការជាតិសម្រេចបានក្នុងទំហំទឹកប្រាក់ជិត ៩០ លានដុល្លារ (មិនរាប់បញ្ចូល ការផ្ទេរកម្មសិទ្ធិអចលនទ្រព្យតម្លៃ ៧ម៉ឺនដុល្លារចុះក្រោម)។ នេះបើតាមទិន្នន័យពីក្រសួងដែនដីនគរូបនីយកម្ម និងសំណង់។
ចំណែកកាតព្វកិច្ចពន្ធលើចំណេញមូលធន ដំបូងឡើយគ្រោងអនុវត្តន៍ផ្លូវការចាប់ពីថ្ងៃទី ១មករាឆ្នាំ២០២១ ប៉ុន្តែដោយសារមានការស្នើសុំពីប្រតិបត្តិករក្នុងវិស័យអចលនទ្រព្យ ពន្ធប្រភេទនេះនឹងចាប់ផ្តើមអនុវត្តន៍ជាផ្លូវការចាប់ពីថ្ងៃទី១ ខែមករា ឆ្នាំ២០២២ វិញ។
បើតាមអគ្គនាយកដ្ឋានពន្ធដារ មូលធនឬទ្រព្រដែលជាកម្មវត្ថុជាប់ពន្ធលើចំណេញមូលធនមាន៦ ប្រភេទដូចជា អចលនទ្រព្យ, ទ្រព្យវិនិយោគ, កេរ្តរិ៍ឈ្មោះអាជីវកម្ម, កម្មសិទ្ធបញ្ញា, រូបិយវត្ថុបរទេស, និងភតិសន្យា។ អគ្គនាយដ្ឋានពន្ធដារបានគូសបញ្ជាក់ថាដោយផ្អែកលើការសិក្សាបទពិសោធន៍ពីបណ្តាប្រទេសនានា និងស្ថានភាពសេដ្ឋកិច្ចកម្ពុជា ពន្ធលើចំណេញមូលធនត្រូវបានកំណត់យកអត្រា២០ភាគរយ ទៅលើផលចំណេញសម្រេចបាន (មិនមែន២០ភាគរយនៃតម្លៃលក់នោះទេ)។
