នរណាជាអ្នកទិញផ្ទះដែលមានឥទ្ធិពលដល់ទីផ្សារក្នុងឆ្នាំ ២០២១ នេះ?

ប្រជាជនដែលមានវ័យចន្លោះពី ៣០ ទៅ ៣៩ ឆ្នាំ បានក្លាយជាអតិថិជនសក្តានុពលរបស់ក្រុមហ៊ុនអភិវឌ្ឍន៍លំនៅឋាន​នៅ​អាមេរិក​ដោយសារប្រជាជន​ក្នុងវ័យនេះកំពុង​ក្លាយជាអ្នកទិញ​លំនៅឋាន​ច្រើនជាងគេបង្អស់​។ នេះបើតាមសេចក្តីរាយការណ៍របស់សារព័ត៌មានអចលនទ្រព្យ Inman។

Inman បានធ្វើសេចក្តីរាយការណ៍ដោយ​ផ្អែកលើរបាយការណ៍ស្តីពីនិន្នាការអ្នកទិញលំនៅឋានឆ្នាំ២០២១ ដែលត្រូវបានធ្វើការអង្កេតដោយ​ក្រុមហ៊ុន​អចលនទ្រព្យ Zillow។ ​ក្រុមហ៊ុនេះនេះ​ធ្វើការស្ទង់មតិពីមនុស្សជាង ២ ០០០ ពាន់នាក់ដែលជាអ្នកទិញផ្ទះថ្មី ដែលសុទ្ធសឹងជា​មេគ្រួសារ​មានវ័យចាប់់ពីអាយុ ១៨ ឆ្នាំឡើងទៅ។

តាមការសិក្សាបានបង្ហាញថា អ្នកទិញផ្ទះនៅអាមេរិកមានវ័យចន្លោះពី ៣០ ទៅ ៣៩ ឆ្នាំ មានអត្រាខ្ពស់ជាងគេដែលមានចំណែកដល់ទៅ ២៦ ភាគរយនៃអ្នកទិញផ្ទះទាំងអស់​ ហើយអ្នកមានអាយុចន្លោះពី ៤០ ទៅ ៤៩ ឆ្នាំ​ មាន ២៣ ភាគរយ ខណៈ​ ២៣ ភាគរយផ្សេងទៀតជាអ្នកទិញ​មានវ័យ ៦០ ឆ្នាំ ឡើងទៅ។

ការសិក្សាដដែលបានរកឃើញថា អ្នកដែលបានទិញលំនៅឋានកាលពី​ឆ្នាំមុន ជាគ្រួសារដែលមានចំណូលមធ្យមប្រចាំឆ្នាំប្រមាណ ៨៦ ០០០ ដុល្លារ ដែលប្រាក់ចំណូលនេះ​ច្រើនជាងចំណូលរបស់ប្រជាជនអាមេរិកទូទៅដែលរកបានជាមធ្យម​ ៥៦ ៧០០ ដុល្លារ​ក្នុងមួយគ្រួសារ​កាលពីឆ្នាំ២០១៩។

ដោយសារថា​ការទិញផ្ទះគឺតែង​ជាប់ទាក់ទងទៅនិងព្រឹត្តិការណ៍សំខាន់ក្នុងជីវិត​ដូចជាការរៀបអាពាហ៍ពិពាហ៍ឬការបង្កើតគ្រួសារជាដើម ដូច្នេះហើយបានជា ៥៧ ភាគរយនៃអ្នកទិញផ្ទះសរុប គឺជាអ្នកដែលបានរៀបការហើយឬក៏កំពុងមានដៃគូជីវិត។ មានតែ ២០ ភាគរយប៉ុណ្ណោះដែលមិនទាន់រៀបការ។

នៅក្នុងឆ្នាំ ២០២១ អ្នកទិញផ្ទះចំនួន ៤០% មានកូនអាយុក្រោម ១៨ ឆ្នាំរស់នៅជាមួយពួកគេហើយមានតែ ៤% ប៉ុណ្ណោះដែលមានឪពុកម្តាយឬឪពុកម្តាយក្មេកនៅជាមួយ។ ជាងពាក់កណ្តាលនៃអ្នកទិញទាំងនោះ មានឆ្កែយ៉ាង​ហោចណាស់មួយក្បាលជាសត្វចិញ្ចឹម និង ៣៩% ទៀតមានឆ្មាយ៉ាងហោចណាស់មួយក្បាលនៅក្នុងផ្ទះ។ ផ្ទះដែលមានបន្ទប់គេង ៣ ក្លាយជាផ្ទះដែលមានការពេញនិយមសម្រាប់អ្នកទិញនៅឆ្នាំ ២០២១ នេះ។

អ្នកទិញផ្ទះ ច្រើនតែទិញផ្ទះដែលមានបន្ទប់គេង ៣ បន្ទប់ទឹក ៣ និងមានទំហំចន្លោះពី ១​ ០០០ ទៅ ១ ៩៩៩ ហ្វីតការ៉េ (ប្រហែល ៩២ ទៅ ១៨៥ ម៉ែត្រការ៉េ) ។ ចំនួនអ្នកទិញផ្ទះជាប់ដី និងខុនដូបានកើនឡើងធៀបនឹងឆ្នាំមុន។ អ្នកទិញផ្ទះជាប់ដីបានកើនឡើង ១១% បើប្រៀបធៀបនិងឆ្នាំមុនដែលមានចំនួនត្រឹមតែ ៨% ប៉ុណ្ណោះ ស្របពេលដែលចំនួនអ្នកទិញខុនដូរបានកើនឡើង​ ១០% ខណៈកាលពីឆ្នាំមុនមានត្រឹមតែ ៦% ប៉ុណ្ណោះ៕