ភាពខុសគ្នារវាង ផ្ទះអចិន្រ្តៃយ៍ ផ្ទះលម្ហែ និងផ្ទះវិនិយោគ

នៅពេលស្ថានភាព​សេដ្ឋកិច្ចល្អប្រសើរ ហើយ​ប្រជាជនកាន់តែច្រើនឡើង​មាន​ជីវភាព​​ធូរធារ ​តម្រូវ​ការ​ផ្ទះមិនមែនគ្រាន់តែសម្រាប់ជាទីជម្រកដើម្បីបំពេញ​តម្រូវការមូលដ្ឋានរបស់មនុស្សទៀតទេ។ សម្រាប់​អ្នកមានជីវភាពល្អ​ ផ្ទះគឺជាកន្លែងបង្កើន​គុណភាពជីវិត ធ្វើឲ្យ​​បែបបទនៃការរស់នៅល្អប្រសើ​រ​ ហើយកត្តា​នេះបាន​បង្កើតឲ្យមាន​ការផ្គត់ផ្គង​ផ្ទះ​ដើម្បីបម្រើគោលដៅថ្មីៗ។  ​

មានការបែងចែកគោលបំណងប្រើ​ផ្ទះជាបីប្រភេទដូចជា ផ្ទះអចិន្រ្តៃយ៍ ផ្ទះលម្ហែ និងផ្ទះវិនិយោគ។ ខាងក្រោមនេះគឺជាលក្ខណៈខុសគ្នាខ្លះនៃប្រភេទផ្ទះនីមួយៗដែលបណ្តាញពត៌មានអចលនទ្រព្យ Z1 News បានចងក្រងពីប្រភពផ្សេងៗមួយចំនួន​៖

1- ផ្ទះអចិន្រ្តៃយ៍ (Primary​ Residence)៖ សំដៅទៅលើផ្ទះដែលបុគ្គលម្នាក់ ឬប្តីប្រពន្ធ ឬគ្រួសាររស់នៅជាប្រចាំ។​ អចលនទ្រព្យនេះអាចជាផ្ទះជាប់ដី ខុនដូ ឬអាផាតមិនដែលទិញក្នុងគោលបំណងសម្រាប់ការរស់នៅអចិន្ត្រៃយ៍។ ការទិញផ្ទះប្រភេទនេះ​គឺជារឿងចាំបាច់មួយសម្រាប់មនុស្សគ្រប់គ្នាដូច្នេះពួកគេត្រូវសិក្សាស្វែងយល់ចំណុចជាច្រើនមុននិងសម្រចចិត្តទិញដូចជា ទីតាំង ប្រភេទផ្ទះ តម្លៃ និងប្រភព​ហិរញ្ញវត្ថុជាដើម។

2- ផ្ទះទីពីរ (Second Home): ជាផ្ទះបន្ថែមដែលទិញបន្ទាប់ពីផ្ទះទី១។ ផ្ទះទី២ ក៏អាចជាផ្ទះជាប់ដី ខុនដូ​ និងអាផាតមិនដែរ ប៉ុន្តែភាពខុសគ្នា​មួយរវាងផ្ទះដំបូង និងផ្ទះទី២គឺរយៈពេលដែលយើង​ការរស់នៅ។ ផ្ទះទី២អាចនិងមានចំងាយឆ្ងាយពីផ្ទះទី១ ដែលទិញសម្រាប់ការសម្រាកកំសាន្តដែលអាចមានទីតាំងនៅតាមជើងភ្នំ នៅជិតសមុទ្រ​ដែលម្ចាស់ផ្ទះទិញ​សម្រាប់លម្ហែ​ចុងសប្តាហ៍ ឬវិស្សមកាលជាដើម។ នៅក្នុងប្រទេសកម្ពុជានាពេលបច្ចុប្បន្ន និន្នាការថ្មីនៃអចលនទ្រព្យប្រភេទនេះកំពុងមានការកើនឡើង។ ជាក់ស្តែងដូចជាគម្រោងអភិវឌ្ឍន៍វីឡាលំហែកាយ Forest Harmony មានវត្តមានក្នុងខេត្តកំពតកំពុងទទួលបានការទាក់ទាញយ៉ាងខ្លាំងពីសំណាក់ប្រជាជនដែលមានជីវភាពធូរធារ​ដែលទិញទុកសម្រាប់លម្ហែ​កាយ ក្រៅពីផ្ទះដែលមានស្រាប់។

3- ផ្ទះ​សម្រាប់វិយោគៈ ជាអចលនទ្រព្យដែលទិញក្នុងគោលបំណងដើម្បីបង្កើនប្រាក់ចំណូល ដែលមានដូចជាផ្ទះជួល ផ្ទះចាស់ដែលទិញយកមកជួសជុសហើយលក់ចេញ (fix-and-flip) ជាដើម។ ការទិញអចលនទ្រព្យសម្រាប់ការវិនិយោគគឺជាមធ្យោបាយមួយដ៏ប្រសើរសម្រាប់ការរកប្រាក់ចំណូលអកម្ម ប៉ុន្តែក៏អាចមានហានិភ័យខ្លះ​ដែរ ដែលទាមទារឲ្យអ្នកវិនិយោគត្រូវសិក្សាយ៉ាងល្អិតល្អន់និងមានភាពឆ្លាតវៃក្នុងការវិនិយោគ៕