ភាសាខ្មែរ 
English 
Bitcoin ដែលជារូបិយប័ណ្ណឌីជីថល និងមិនបានស្ថិតក្រោមការត្រួតពិនិត្យរបស់ធនាគារកណ្តាលប្រទេសណាមួយនៅឡើយ ត្រូវបានក្រុមហ៊ុនផ្តល់កម្ចីធំមួយនៅអាមេរិកសម្រេចទទួលយកជាមធ្យោបាយទូទាត់កម្ចីទិញផ្ទះជាលើកដំបូងនៅចុងឆ្នាំនេះ។
ក្រុមហ៊ុន United Wholesale Mortgage ដែលជាក្រុមហ៊ុនផ្តល់កម្ចីធំមួយនៅអាមេរិក បានប្រកាសនៅសប្តាហ៍នេះថាខ្លួននឹងទទួលរូបីយប័ណ្ណឌីជីថល Bitcoin ជាមធ្យោបាយទូទាត់កម្ចីទិញផ្ទះ។ នេះបើតាមការចេញផ្សាយរបស់សារព័ត៌មានអាមេរិក CNBC។
លោក Mat Ishbia នាយកប្រតិបត្តិក្រុមហ៊ុន United Wholesale Mortgage បានបញ្ជាក់ថា៖«យើងបានត្រួតពិនិត្យពីការសិក្សារបស់យើង ហើយយើងរីករាយក្នុងការក្លាយខ្លួនជាក្រុមហ៊ុនផ្តល់កម្ចីទិញផ្ទះដំបូងគេនៅអាមេរិកដែលទទួលយកលុយអេឡិចត្រូនិកក្នុងការទូទាត់កម្ចីទិញផ្ទះ»។
លោកបន្តថា ក្រុមហ៊ុននឹងអាចចាប់ផ្តើមគម្រោងនេះចាប់ពីត្រីមាសទី ៣ ឆ្នាំនេះទៅ ដោយទទួលយក Bitcoin ជារូបីយប័ណ្ណសម្រាប់ទូទាត់ដំបូងគេ ហើយនឹងពិចារណារូបីយប័ណ្ណអេឡិកត្រូនិកប្រភេទផ្សេងនាពេលក្រោយ។
ក្រុមហ៊ុន UWM គឺជាក្រុមហ៊ុនផ្តល់កម្ចីធំទីពីរនៅអាមេរិកបន្ទាប់ពី Quicken ដែលមានមូលដ្ឋាននៅ Detroit និងជាក្រុមហ៊ុនបុត្រសម្ព័ន្ធរបស់ Rocket Companies៕
