៣ ចំណុចគួរដឹងពីទីផ្សារអចលនទ្រព្យតាមបណ្តោយផ្លូវ ៤៨

ខេត្តកោះកុង៖ ផ្លូវជាតិលេខ៤៨ ជាផ្លូវគមនាគមន៍ដ៏សំខាន់មួយក្នុងខេត្តកោះកុង ហើយផ្លូវនេះក៏មានការតភ្ជាប់ជាមួយផ្លូវជាតិលេខ៤ ចេញពីខេត្តព្រះសីហនុ ដែលជាប៉ូលសេដ្ឋកិច្ចមួយដ៏សំខាន់របស់កម្ពុជា។ បច្ចុប្បន្នរដ្ឋាភិបាលបានស​ម្រេចស្ថាបនាផ្លូវជាតិលេខ ៤៨ ដើម្បីបង្កើនសក្តានុពលវិនិយោគ និងដឹកជញ្ជូន ដែលកត្តានេះនឹងធ្វើឱ្យទីផ្សារអចលនទ្រព្យនៅក្នុងតំបន់នេះកាន់តែលេចធ្លោ។  បីចំណុចខាងក្រោមនេះ ជាអ្វីដែលអ្នកគួរដឹងពីទីផ្សារអចលនទ្រព្យតាមបណ្តោយផ្លូវ ៤៨៖

1- ផ្លូវហាយវ៉េអាស៊ាន១២៣ (ASEAN Highway 123)

ផ្លូវជាតិលេខ ៤៨ នឹងត្រូវស្ថាបនាឡើងវិញ ដើម្បីលើកកម្រិតគុណភាពផ្លូវនេះឱ្យកាន់តែល្អប្រសើរ ដោយគ្រោងចំណាយទឹកប្រាក់ប្រមាណ ៦៥ លានដុល្លារ។​ គម្រោងអភិវឌ្ឍន៍ផ្លូវជាតិលេខ ៤៨ មានប្រវែង ១៤៨ គីឡូម៉ែត្រ ដោយចាប់ផ្តើមសាងសង់ពីចំណុចប្រសព្វជាមួយផ្លូវជាតិលេខ៤  ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង។ ផ្លូវនេះបើកការដ្ឋានសាងសង់នៅថ្ងៃទី៣ ខែ មករា  ឆ្នាំ២០២២ ហើយគ្រោងនឹងបញ្ចប់អំឡុងខែមិថុនា ឆ្នាំ២០២៤។

តាមការបញ្ជក់ពីក្រសួងសាធារណការ និងដឹកជញ្ជូន ការស្ថាបនាផ្លូវជាតិដ៏សំខាន់នេះ  នឹងជួយសម្រួលដល់ការដឹកជញ្ជូន, ជំរុញសក្តានុពលតំបន់ទេសចរណ៍ និងបង្កើនសេដ្ឋកិច្ចក្នុងតំបន់ជាពិសេស ជាមួយប្រទេសជិតខាង ដោយសារតែផ្លូវនេះ​ ជាផ្នែកមួយនៃផ្លូវហាយវ៉េអាស៊ាន១២៣ ដែលភ្ជាប់ប្រទេសកម្ពុជា ទៅប្រទេសថៃ និងប្រទេសភូមា។

2- ជាផ្លូវដែលបណ្តុំដោយតំបន់សេដ្ឋកិច្ចពិសេស

សក្តានុពលនៃផ្លូវជាតិលេខជាតិលេខ ៤៨ បាន​ទាក់ទាញការវិនិយោគសួនឧស្សាហកម្មដល់ទៅ៤ ដែលស្ថិតនៅតាមបណ្តោយផ្លូវនេះ​តែមួយ។ តំបន់សេដ្ឋកិច្ច ពិសេស៤កន្លែងនេះមានដូចជា តំបន់សេដ្ឋកិច្ចពិសេសកោះកុង (Koh Kong SEZ), តំបន់សេដ្ឋកិច្ចពិសេសស៊ួយ ឆេង (Suoy Chheng SEZ, តំបន់សេដ្ឋកិច្ចពិសេសគិរីសាគរកោះកុង (Kirisakor Koh Kong SEZ) និងតំបន់សេដ្ឋកិច្ចពិសេសរតនា(Ratana SEZ)។​

3- ទីផ្សាដីធ្លីរបន្តកើនឡើងពីមួយឆ្នាំទៅមួយឆ្នាំ​

ដោយសារទីតាំង និងសក្តានុពល្អទាំងនេះ​ហើយ បានជំរុញឱ្យតម្លៃដីនៅតាមបណ្តោយផ្លូវជាតិលេខ ៤៨ មានកំណើនល្អពីមួយឆ្នាំទៅមួយឆ្នាំ។

ជាក់ស្តែងតម្លៃដីនៅតាមបណ្តោយផ្លូវជាតិលេខ ៤៨ មានតម្លៃដាក់លក់ចន្លោះពី ៧ ទៅ ៨ ដុល្លារក្នុងមួយម៉ែត្រការ៉េ កាលពីដើមឆ្នាំ២០២០ ហើយបច្ចុប្បន្នតម្លៃនេះបានកើនដល់ចន្លោះពី ១៣ ទៅ ១៨ ដុល្លារ ក្នុងមួយម៉ែត្រការ៉េ​ ដែលតម្លៃនេះគឺអាស្រ័យលើទីតាំងសក្តានុពលនៃដី។​ នេះបើតាម​ លោកទុយ ប៉ោហេង ប្រធានសាខាក្រុមហ៊ុន Century 21 Zillion Holding  ប្រចាំខេត្តកោះកុង៕