តើមានអ្វីថ្មីនៅស្រុកឱរ៉ាល់?

ស្រុកឱរ៉ាល់នៃខេត្តកំពង់ស្ពឺកំពុងទទួលបានកំណើនវិនិយោគ​ជាបន្តបន្ទាប់ ដែលជា​សញ្ញាល្អ​មួយ​សម្រាប់ការអភិវឌ្ឍ​នៅ​តំបន់នេះ ស្របពេលដែលស្ថាប័នផ្តល់សិទ្ធវិនិយោគរបស់រដ្ឋាភិបាលបាន​​​ផ្តល់សិទ្ធវិនិយោគរោងចក្រថ្មីៗ​កាន់តែច្រើនឡើង​ទៅតំបន់នេះ​។

ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃចន្ទទី២៣ សីហា​ បានប្រកាសពីការផ្តល់វិញ្ញាបនបត្រចុះបញ្ជីជាស្ថាពរដល់គម្រោងវិនិយោគ ៧ គម្រោង​បន្ថែមទៀតក្នុងពេលតែមួយ ហើយក្នុងនោះគម្រោងរោងចក្រពីរបានបោះទុនវិនិយោគដោយដាក់ទីតាំងនៅស្រុកឱរ៉ាល់។ គម្រោងទាំងពីរគឺ៖

១ – គម្រោង​រោងចក្រ XIN CHENHUI (CAMBODIA) CHEMICAL INDUSTRY CO., LTD. ដែលជា​​រោងចក្រផលិតជីវគីមី ដែលមានទីតាំងវិនិយោគស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ គម្រោងនេះ​មានទុនវិនិយោគ ៩,១លានដុល្លារអាមេរិក និងអាចបង្កើតការងារបានចំនួន ៧២នាក់។

២ – គម្រោងរោងចក្រ CAMBODIAN XING CAN SHI PIN CO., LTD. ជា​រោងចក្រកែច្នៃផ្លែឈើ (ដំណាប់ស្វាយ, ម្នាស់, មៀន, ខ្នុរ និងស្វាយចន្ទី) ដែលមានទីតាំងនៅ​ភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មានទុនវិនិយោគប្រមាណ ១១,២លានដុល្លារអាមេរិក និងអាចបង្កើតការងារបានចំនួន ១៥៤នាក់។

ស្រុកឱរ៉ាល់ជាស្រុកមួយនៃខេត្តកំពង់ស្ពឺ ដែលជាខេត្ត​សក្តានុពលមួយសម្រាប់ទីតាំងរោចក្រឧស្សាហកម្មដោយសារស្ថិតនៅចន្លោះកណ្តាលរាជធានីភ្នំពេញ និងខេត្តព្រះសីហនុដែលជាតំបន់កំពង់ផែអន្តរជាតិធំជាងគេរបស់កម្ពុជា។

យោងតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ចាប់ពីខែមករា មកដល់ខែសីហា ឆ្នាំ២០២១ ខេត្តកំពង់ស្ពឺទទួលបានគម្រោងវិនិយោគសរុប ១៤ គម្រោង ដែលមានទុនវិនិយោគសរុបប្រមាណជាង ៨៤ លានដុល្លារ។

កំណើនវត្តមានរោងចក្រឧស្សាហកម្មនៅខេត្តកំពង់ស្ពឺ បានជំរុញឲ្យ​មានសកម្មភាពទិញ-លក់ដីនៅខេត្តកំពង់ស្ពឺនេះមាន​ភាពផុសផុលផងដែរនារយៈពេលចុងក្រោយនេះ។

យោងតាមទិន្នន័យពីក្រុមហ៊ុនជំនាញក្នុងវិស័យអចលនទ្រព្យ ខេត្តកំពង់ស្ពឺ មានចំនួនទិញលក់ដីធ្លីសរុប ៨ ៥១៨ ប្រតិបត្តិការ​កាលពីឆ្នាំ ២០២០ (ប្រតិបត្តិការដែលមានការកាត់ឈ្មោះជាផ្លូវការ)។ ក្នុងចំណោមនោះ ស្រុកឱរ៉ាល់ក៏ជាទីតាំងសក្តានុពលមួយផងដែរ៕