តម្លៃជួលទីតាំងនៅតំបន់សេដ្ឋកិច្ចពិសេសនៅកម្ពុជាមានតម្លៃទាបជាងឆ្ងាយធៀបនឹងប្រទេសជិតខាង

ភ្នំពេញ៖ តម្លៃជួលដីដើម្បីប្រតិបត្តិការរោងចក្រនៅក្នុងតំបន់សេដ្ឋកិច្ចពិសេសធំមួយនៅ​​កម្ពុជា នៅមានតម្លៃ​ទាបជាងឆ្ងាយនៅឡើយធៀបនឹង​ប្រទេសជិតខាង ដែលឆ្លុះបញ្ជាំងថា​កម្ពុជា​នៅ​មាន​ឱកាសជាច្រើនទៀតក្នុងការ​​ទាញប្រយោជន៍ពីកំណើនតម្លៃជួល​ទីតាំង​រោងចក្រ និងឃ្លាំងនាពេលខាងមុខ​។

តំបន់សេដ្ឋកិច្ចពិសេសភ្នំពេញ (PPSEZ) គឺជាតំបន់សេដ្ឋកិច្ចធំជាងគេមួយ​នៅកម្ពុជា ហើយ​ប្លុកឧស្សាហកម្មនេះបានប្រមូលចំណូលពីការ​ជួលទីតាំង​ជាពីរប្រភេទ គឺទីមួយការជួល​ដី និងទីពីរការជួលរោងចក្រ។​

យោងតាមទិន្នន័យពីក្រុមហ៊ុន CBRE Cambodia  គិតត្រឹមដំណាច់ឆ្នាំ២០២០ ទីតាំងដីសម្រាប់ដាក់ជួលនៅក្នុងតំបន់សេដ្ឋកិច្ចពិសេសភ្នំពេញ (PPSEZ) មានតម្លៃជាមធ្យម ១ដុល្លារក្នុងមួយម៉ែត្រការ៉េក្នុងមួយខែ ខណៈតម្លៃជួល​រោងចក្រវិញមានតម្លៃជួលជាមធ្យម ៣,១ ដុល្លារក្នុងមួយម៉ែត្រការ៉េ​ក្នុងមួយខែ។

អត្រាជួលនេះហាក់មានតម្លៃទាប បើធៀបនឹងតម្លៃជួលរោងចក្រ និងឃ្លាំង (ready-built factories – RBFs) នៅតាមតំបន់សេដ្ឋកិច្ចពិសេសនៅវៀតណាម និងនៅ​ប្រទេសថៃ។  នេះបើតាមរបាយការណ៍ពីក្រុមហ៊ុន CBRE ដដែលដែលត្រូវបាន​រាយការណ៍ដោយព័ត៌មានក្នុងស្រុកវៀតណាម និងថៃ។ តម្លៃជួលរោងចក្រ​នៅតំបន់សេដ្ឋកិច្ចពិសេសនៅវៀតណាមតម្លៃ​ជាមធ្យម ៥ ដុល្លារក្នុងមួយម៉ែត្រការ៉េក្នុងមួយខែ ខណៈនៅថៃមានតម្លៃ ៦ ដុល្លារក្នុងមួយម៉េត្រការ៉េក្នុងមួយខែ​។

តំបន់សេដ្ឋកិច្ចពិសេសភ្នំពេញ ឬ PPSEZ  បានចាប់ផ្តើមប្រតិបត្តិការនៅឆ្នាំ២០០៧ ហើយបច្ចុប្បន្ន PPSEZ ជាតំបន់សេដ្ឋកិច្ចពិសេសធំជាងគេទីពីរនៅកម្ពុជា ក្នុងចំណោមតំបន់សេដ្ឋកិច្ចពិសេសទាំង១៧។ PPSEZ មានទំហំផ្ទៃដីសរុបជាង ៣៥៧,៣២ហិក​តា ហើយមានរោងកក្រឧស្សាកម្ម ឬសហគ្រាស ៩២ គម្រោងកំពុងប្រតិបត្តិការ។

តំបន់សេដ្ឋកិច្ចពិសេសនៅកម្ពុជាចំនួន ១៧ ដែលកំពុងដំណើរការ។ ទិន្ន័យ៖ PPSEZ

តាម CBRE Cambodia ទំហំផ្ទៃដីសរុប​ជាង ៣៥៧ ហិក​តា (ឬប្រហែល ៣ ៥៧៣ ១៧៩ ម៉ែត្រការ៉េ) ក្នុងតំបន់សេដ្ឋកិច្ចពិសេសភ្នំពេញ ត្រូវបានប្រើប្រាស់អស់ប្រហែល ៧៥ ភាគរយ គិតត្រឹមឆ្នាំដំណាច់ឆ្នាំ២០២០។ ប្រភពដដែលបញ្ជាក់ថាវិនិយោគិនបរទេសដែលបានជួលទីតាំងសម្រាប់ប្រតិបត្តិការអាជីវកម្មនៅក្នុងតំបន់សេដ្ឋកិច្ចពិសេសនេះភាគច្រើនជាវិនិយោគិនមកពីប្រទេសជប៉ុន ដែលមានចំណែកដល់ទៅ ៣៧ ភាគរយ ហើយវិនិយោគគិនចិនមានចំណែក ១៧ ភាគរយ នៃចំនួនអ្នកជួលសរុប។

តំបន់​សេដ្ឋកិច្ច​ពិសេស​ភ្នំពេញ (PPSEZ) បានចុះបញ្ជីនៅផ្សារមូលបត្រកម្ពុជាជាផ្លូវការកាលពី​ឆ្នាំ២០១៦  ដែលបាន​បើក​ផ្លូវ​ឲ្យ​តំបន់​សេដ្ឋកិច្ច​ពិសេសដ៏ធំមួយនេះ ​លក់​ភាគ​ហ៊ុន​របស់​ខ្លួន​មាន​ឈ្មោះ​ក្នុង​ផ្សារ​មូលបត្រ​ថា PPSP។ PPSEZ បានបោះលក់មូលបត្រជាសាធារណៈ​ជាលើកដំបូង​បាន​ដោយជោគជ័យ ដោយកៀរគរដើមទុនបាន​ទឹកប្រាក់ ៨,២លានដុល្លារ ពីការបោះផ្សាយលក់មូលបត្រចំនួន ១១,៦ លានហ៊ុន​ ដែលភាគ​ហ៊ុននាពេលនោះធ្វើ IPO មានតម្លៃ ០,៧១ ដុល្លារ៕

ផែនការមេ នៃការប្រើប្រាស់ដីក្នុងតំបន់សេដ្ឋកិច្ចពិសេសភ្នំពេញ។ ផ្ទៃដីតំបន់សេដ្ឋកិច្ចពិសេសនេះលាតសន្ធឹងក្នុងសង្កាត់បីគឺសង្កាត់កន្ទោក សង្កាត់ភ្លើងឆេះរទះ និងសង្កាត់បឹងធំ នៃខណ្ឌកំបូល។ រូបភាព៖ PPSEZ