តម្លៃដីក្នុងតំបន់ផ្លូវ ៦០ ម៉ែត្រកើនឡើងជាង ១០០ ភាគរយជាប្រចាំឆ្នាំ

ភ្នំពេញ​៖ តម្លៃ​ដីឋិតនៅតាមបណ្តោយមហាវិថីសម្តេចតេជោ ហ៊ុន សែន ឬផ្លូវ៦០ម៉ែត្រ បានកើនឡើង​យ៉ាងគំហុក ក្នុងរយៈពេលជិត៨ ឆ្នាំចុងក្រោយ ដោយ​កើនឡើងដល់ទៅ ១១ដង​ ក្នុងរយៈពេល​​ពីឆ្នាំ២០១៣ មកដល់បច្ចុប្បន្ន។ នេះបើតាមការសិក្សាពីក្រុមហ៊ុនអចលនទ្រព្យ។ ​

របាយការណ៍របស់ក្រុមហ៊ុន CBRE Cambodia ទាក់ទងនឹងអនាគតនៃទីផ្សារអចលនទ្រព្យភាគខាងត្បូងរាជធានីភ្នំពេញ ចេញផ្សាយនៅថ្ងៃទី ១២ សីហា ឆ្នាំ២០២១ បានបង្ហាញថា ទីតាំងដីតាមបណ្តោយ​ផ្លូវ៦០ម៉ែត្រ ដែល​មានតម្លៃជាមធ្យម ២០០ ដុល្លារ ក្នុងមួយម៉ែត្រការ៉េកាលពីឆ្នាំ២០១៣ បានកើនដល់ជាមធ្យម ២ ២០០ ដុល្លារក្នុងមួយម៉ែត្រការ៉េ នាពេលបច្ចុប្បន្ន។ តម្លៃនេះបង្ហាញពីការកើនឡើង ១១ដងក្នុងរយៈពេល ៨ ឆ្នាំនេះ។

ការប្រៀធៀបតម្លៃដីតាមបណ្តោយផ្លូវ ៦០ម៉ែត្រពីឆ្នាំ២០១៣ ដល់ ២០២១

តាមការសិក្សាដដែលបានបញ្ជាក់ថា តម្លៃដីដែលកើនយ៉ាងគំហុកនេះ ដោយសារការអភិវឌ្ឍហេដ្ឋារចនាសម្ព័ន្ធ ជាពិសេស​ផ្លូវ៦០ម៉ែត្រ ដែលបានទាក់ទាញក្រុមហ៊ុនជាច្រើនទៅអភិវឌ្ឍន៍លំនៅឋាន និងអគារពាណិជ្ជកម្មក្នុងតំបន់នេះ។​ កត្តានេះបានធ្វើឱ្យតំបន់ផ្លូវ៦០ម៉ែត្រ កំពុងក្លាយទីក្រុងថ្មីដ៏ទាក់ទាញ ដែលនៅកៀកនឹងកណ្តាលរាជធានីភ្នំពេញ។

ផ្លូវ​ ៦០ម៉ែត្រ ត្រូវបានបើកឱ្យចរាចរណ៍កាលពីខែ មេសា ឆ្នាំ ២០១៧  ដោយ​ឆ្លងកាត់​សង្កាត់​ចំនួន​បី គឺ​សង្កាត់​ចាក់អង្រែលើ និង​ចាក់អង្រែ​ក្រោម​ក្នុង​ខណ្ឌមានជ័យ និង​សង្កាត់​ជើងឯក​ក្នុង​ខណ្ឌដង្កោ។  កាលពីខែតុលា ឆ្នាំ២០២០ ផ្សារទំនើប AEON Mall ទី៣ បានបើកការដ្ឋានសាងសង់នៅតាមបណ្តោយមហាវិថីដ៏ធំមួយនេះ ហើយរំពឹងបើកដំណើរការនៅឆ្នាំ ២០២២ ខាងមុខ។

ជាមួយគ្នានេះ គម្រោងអភិវឌ្ឍន៍របស់ក្រុមហ៊ុនក្នុងស្រុក និងក្រៅស្រុកជាច្រើនផ្សេងទៀតក៏កំពុងអភិវឌ្ឍន៍ក្នុងតំបន់នេះផងដែរដូចជា គម្រោងបុរី និងផ្សារទំនើបរបស់ក្រុមហ៊ុន បុរីប៉េង ហួត, ក្រុមហ៊ុនជីប ម៉ុង, គម្រោងអភិវឌ្ឍន៍ចម្រុះរបស់ក្រុមហ៊ុនចិន R&F, គម្រោង​បុរីវីឡា Woodland Residence, គម្រោងខុនដូ Lingnan Garden និងគម្រោងខុនដូ Urban Village ជាដើម។

អ្នកនាង ម៉ាន់ កណិកា ប្រធានសាខារបស់ក្រុមហ៊ុន Century 21 Zillion Holding ប្រចាំខណ្ឌដង្កោ ធ្លាប់បានបញ្ជាក់ប្រាប់ព័ត៌មានអចលនទ្រព្យ Z1News ថា តម្លៃដីតាមបណ្តោយផ្លូវ ៦០ម៉ែត្រមានតម្លៃជាមធ្យមចន្លោះពី ១ ៨០០ ដុល្លារទៅ ២ ៦០០ ដុល្លារ​ក្នុងមួយម៉ែត្រការ៉េ។

អ្នកនាងបញ្ជាក់ថា តម្លៃនេះគឺអា​ស្រ័យលើទំហំ និងសម្រាប់ទីតាំងដីដែលដែលចេញពីចំនុចផ្លូវ ២៧១ បត់ចូលតាមបណ្តោយផ្លូវ ៦០ ម៉ែត្ររហូតដល់ស្តុបបំបែកបត់ទៅតាមផ្លូវ ៥០ ម៉ែត្រ៕