ក្រុមហ៊ុនមហាសេដ្ឋីអចលនទ្រព្យហុងកុង បម្លែងសណ្ឋាគារទៅជាអគារលំនៅឋាន

ក្រុមហ៊ុន CK Asset Holdings Limited គ្រប់គ្រងដោយមហាសេដ្ឋីអចលនទ្រព្យនៅហុងកុង គឺលោក Li Ka-shing បានបំប្លែង​សណ្ឋាគារមួយចំនួនរបស់ខ្លួនធ្វើជាលំនៅឋាន ដើម្បីសម្របខ្លួនតាមស្ថានភាពទីផ្សារបច្ចុប្បន្ន។

យោងតាមសេចក្តីរាយការណ៍សារព័ត៌មានហុងកុង South China Morning Post កាលពីថ្ងៃសុក្រ ក្រុមហ៊ុនរបស់មហាសេដ្ឋីអចលនទ្រព្យរូប​នេះ បានកែប្រែ​​អគារសណ្ឋាគារចំនួនពីរដែលស្ថិតនៅ​តំបន់ក្រុងរណប Tin Shui Wai និងតំបន់ប្រជុំជន Ma On Shan ទៅជាអគារស្នាក់នៅដើម្បីដាក់ជួលវិញ​។

អគារអតីតសណ្ឋាគារទាំងពីរបូកបញ្ចូលគ្នាមានទំហំសរុបជាង ១សែន ៨ម៉ឺន ម៉ែត្រការ៉េ ឬស្មើនឹង ១ ៩៣៣ បន្ទប់ ឬ​ស្មើនឹង ១៣ ភាគរយ នៃបន្ទប់សណ្ឋាគារសរុប ១៥ ០០០ របស់ក្រុមហ៊ុន CK Asset Holdings Limited។

កូវីដ-១៩ បានបង្កផលប៉ះពាល់ខ្លាំងដល់​វិស័យបដិសណ្ឋារកិច្ច ប៉ុន្តែ​ផ្ទុយទៅវិញ​ទីផ្សារលំនៅឋាននៅហុងកុង​បែរជាមានតម្រូវការខ្ពស់​​ដែលជំរុញឱ្យតម្លៃលំនៅឋានកើនឡើងគួរឱ្យកត់សម្គាល់។

អគ្គនាយកគ្រប់គ្រង​ក្រុមហ៊ុន CK Asset Holdings Limited លោក Victor Li Tzar-kuoi ដែលត្រូវជាកូនប្រុសរបស់មហាសេដ្ឋី Li Ka-shing បានបញ្ជាក់ប្រាប់អ្នកសារព័ត៌មានថា សណ្ឋាគារដែលពឹងផ្អែកតែលើការមកដល់នៃការធ្វើ​ដំណើរកម្សាន្តរបស់ភ្ញៀវទេសចរបានទទួលរងផលប៉ះពាល់យ៉ាងធ្ងន់ធ្ងរ។ លោក​បន្តថា ការបម្លែងសណ្ឋាគារខ្លះទៅជាបន្ទប់លំនៅឋាននាពេលនេះគឹ ដោយសារតែលំនៅឋានមានចំណែកទីផ្សារខ្ពស់ ហើយតម្លៃបន្តកើនឡើងផងដែរ។

ទិន្នន័យស្រាវជ្រាវរបស់​ក្រុមហ៊ុនអចលនទ្រព្យ​ហុងកុង​ Midland Realty បានបង្ហាញថា ក្នុង​រយៈពេល ៦ ខែដំបូង​ឆ្នាំ២០២១ ការទិញ-លក់អចលនទ្រព្យនៅហុងកុង​រួមមានអចលនទ្រព្យពាណិជ្ជកម្ម, ឧស្សាហកម្ម, ចំណតឡាន​ និងអចលនទ្រព្យលំនៅឋាន មានទំហំទឹកប្រាក់បូកបញ្ជូលគ្នាដល់ទៅ ៦០,៤ ពាន់លានដុល្លារ​ កើនឡើងប្រមាណ ៧៤ ភាគរយ ធៀបនឹងរយៈពេលដូចគ្នាកាលពីឆ្នាំមុន។

​ក្នុងចំណោមការទិញ-លក់អចលនទ្រព្យសរុប​ វិនិយោគិនភាគច្រើនផ្តោតលើទីផ្សារលំនៅឋាន ដែលទីផ្សារនេះមានចំណែកដល់ទៅ ៦០ ភាគរយ នៃប្រតិបត្តិការទិញ-លក់សរុបជាង ៦០ពាន់លានដុល្លារ៕