ទីតាំង៣កន្លែងក្នុងខេត្តកណ្តាល ដែលអ្នកវិនិយោគដីធ្លីមិនគួរមើលរំលង

អ្នកជំនួញ និងជាអ្នកឯកទេសវិនិយោគលើវិស័យដីធ្លីបានបង្ហើបពីទីតាំងចំនួនបីកន្លែងក្នុង​ខេត្តកណ្តាល ដែលសុទ្ធតែជាទីតាំងសក្តានុពល ហើយអ្នកវិនិយោគគួរពិចារណាដើម្បីចាប់យកឱកាស​ពីលទ្ធភាពនៃការឡើងថ្លៃនៃតម្លៃដីក្នុងតំបន់ទាំងនេះនាពេលខាងមុខ។ ​

លោក ឧកញ៉ា កាង សុធី នាយកប្រតិបត្តិក្រុមហ៊ុន Century 21 Land Station​ បានឱ្យដឹងថា​ ស្រុកកណ្តាលស្ទឹង  ស្រុកមុខកំពូល និងស្រុកពញា​ឮ ជាទីតាំងដែលមានសក្តានុពលជាងគេក្នុងខេត្តកណ្តាល ដែលអ្នកវិនិយោគ​គួរសម្លឹងមើល ដោយសារតែឥទ្ធិពលវិជ្ជមាននៃការ​ពង្រីករាជធានីភ្នំពេញ។

លោក ឧកញ៉ា កាង សុធី ដែលមានបទពិសោធន៍លើការវិនិយោគដីធ្លីជិត ២០ឆ្នាំនៅ​កម្ពុជា បានបញ្ជាក់ថា ស្រុកទាំងបីនេះមានលក្ខណៈពិសេស និងបែបផែននៃការរីកចម្រើនផ្សេងៗគ្នា។ តួយ៉ាង ស្រុកកណ្តាលស្ទឹងមាការអភិវឌ្ឍគម្រោងអាកាសយាន្តដ្ឋានអន្តរជាតិ​ថ្មី ហើយស្រុកមុខកំពូលវិញស្ថិតនៅជិតពហុកីឡាដ្ឋានជាតិ​មរតកតេជោ ដែលទើបបញ្ចប់ការសាងសង់រួចរាល់ ដើម្បីត្រៀមធ្វើជាម្ចាស់ផ្ទះព្រឹត្តិការណ៍ស៊ីហ្គេមនៅឆ្នាំ២០២៣។

លោកឧកញ៉ា កាង សុធី (កណ្តាល) ជានាយកប្រតិបត្តិក្រុមហ៊ុន Century 21 Land Station​ និងជាអ្នកជំនាញវិនិយោគដីធ្លីជិត២០ ឆ្នាំ

លោកថ្លែងថា៖ «ស្រុកកណ្តាលស្ទឹង ជាតំបន់ដែលមានការអភិវឌ្ឍន៍លឿន  ដែលស័ក្កិសម​សម្រាប់អ្នកវិនិយោគរយៈពេលវែងចន្លោះពី ១០ ទៅ ១៥ ឆ្នាំ​ព្រោះតម្លៃដីធ្លីនៅតំបន់នេះអាចមានកំណើនចន្លោះពី ៣០ ទៅ​ ៤០ ភាគរយក្នុងមួយឆ្នាំ។ ស្រុកមុខកំពូលវិញ មានបរិយាកាសល្អដែលមានទន្លេអមសងខាង ហើយថែមទាំងមានផ្លូវជាតិលេខ៦អា ដែលតភ្ជាប់ជាមួយខេត្តសំខាន់ៗដូចជាខេត្តកំពង់ធំ កំពង់ចាម និងខេត្តសៀមរាបជាដើម។ ស្រុកមុខ​កំពូល​អាចទទួលបានផលចំំណេញលឿន ដែលល្អសម្រាប់អ្នកវិនិយោគរយៈពេលខ្លី»។​

ចំណែកស្រុកពញា​ឮ អ្នកជំនាញរូបនេះបានបញ្ជាក់បន្ថែមថា ស្រុកនេះក៏ស្ថិតនៅកៀកភ្នំពេញផងដែរ ហើយថែមមានការអភិវឌ្ឍហេដ្ឋារចនាសម្ព័ន្ធជាច្រើន។ មិនតែប៉ុណ្ណោះស្រុកនេះមានសណ្ឋានដីល្អមិនលិចទឹក ដែលស័ក្កសមសម្រាប់ការអភិវឌ្ឍលំនៅឋាន ខណៈដែលចំនួនប្រជាជនក៏មានកំណើនច្រើនគួរឱ្យកត់សម្គាល់ផងដែរ។

ខេត្តកណ្តាលមានក្រុងមួយ​ និងស្រុកចំនួន១០  ដែលព័ទ្ធ​ជុំវិញ​​រាជធានីភ្នំពេញ។ ស្រុកទាំងបីខាងលើស្ថិតក្នុងចំណោមស្រុកចំនួន ៧ ផ្សេងទៀតក្នុងខេត្តនេះ។

យោងតាមអនុក្រឹត្យស្តីពី «ការដាក់ឱ្យអនុវត្តប្លង់គោលប្រើប្រាស់ដីរាជធានីភ្នំពេញ» ចុះហត្ថលេខាដោយសម្តេចតេជោនាយករដ្ឋមន្រ្តី ហ៊ុន សែន កាលពីខែ​ធ្នូ ឆ្នាំ ២០១៥ បានឱ្យដឹងថា ព្រំដែនរាជធានីភ្នំពេញ អាចនឹងពង្រីកនៅក្នុងរង្វង់ទំហំ ៣០ គីឡូម៉ែត្រជុំវិញដោយគិតពីចំណុចកណ្តាលនៃរាជធានីភ្នំពេញ។ ឯកសារដដែល បានបញ្ជាក់ថា នៅពេលដែលមានការពង្រីកក្រុង ពេលនោះទីក្រុងភ្នំពេញនឹងត្រូវគ្របដណ្តប់លើផ្ទៃដីខាងជើងស្ទើរតែទាំងអស់នៃខេត្តកណ្តាល។

លោក ស៊ូ ប៊ុនសុង ប្រធានសាខាក្រុមហ៊ុន Century 21 Zillion Holding ប្រចាំខេត្តកណ្តាល បានបញ្ជាក់ថា​ គ្រប់តំបន់ក្នុងភូមិសាស្រ្តខេត្តកណ្តាលនេះសុទ្ធតែមានសក្តានុពលខ្ពស់សម្រាប់ការវិនិយោគដីធ្លីនាពេលបច្ចុប្បន្ន ហើយទទួលបានចំណេញខ្ពស់នាពេលអនាគត ព្រោះតែការរីកសាយនៃការអភិវឌ្ឍក្រុង ដែល​នឹងជួយបង្កើនតម្លៃទីផ្សារ​ដីធ្លី៕