ហាងភីហ្សា Pizza Hut ដ៏ល្បីល្បាញបើកអាជីវកម្មនៅកម្ពុជាបង្កើនតម្រូវការទីតាំងអាជីវកម្ម

ម៉ាកយីហោហាងភីហ្សាលំដាប់ពិភពលោកបើកដំណើរការនៅកម្ពុជាជាលើកដំបូង ហើយគ្រោងពង្រីកខ្លួនដល់ ៣០ ហាងក្នុងរយៈពេល ៣ ឆ្នាំ។
វត្តមាន Pizza Hut ជួយបង្កើនសក្តានុពលវិស័យលក់រាយកម្ពុជា ពង្រឹងទីផ្សារអចលនទ្រព្យ បង្កើនតម្រូវការទីតាំងអាជីវកម្ម។
ទីផ្សារភីហ្សានៅកម្ពុជាបង្កើតប្រាក់ចំណូលប្រហែល ១០០ លានដុល្លារក្នុងមួយឆ្នាំហើយតែងមានកំណើនចន្លោះពី ១៥ ទៅ ២០ ភាគរយក្នុងមួយឆ្នាំ។

ភ្នំពេញ៖ ហាងភីហ្សា Pizza Hut ដ៏ល្បីល្បាញលំដាប់អន្តរជាតិ នឹងបើកអាជីវកម្មហាងដំបូងរបស់ខ្លួននៅកម្ពុជាក្នុងខែសីហានេះ ហើយមានគម្រោងពង្រីកខ្លួនរហូតដល់ ៣០ ហាងក្នុងរយៈពេលបីឆ្នាំខាងមុខ។ នេះបើយោងតាមតំណាងក្រុមហ៊ុនដែលនាំយកយីហោហាង Pizza Hut មកដំណើរការនៅកម្ពុជា។

វត្តមានហាងអាហារលំដាប់អន្តរជាតិនេះនឹងជួយបង្កើនសក្តានុពលវិស័យលក់រាយកម្ពុជាដែលកំពុងរីកចម្រើន ហើយពង្រឹងទីផ្សារអចលនទ្រព្យកម្ពុជាតាមរយៈកំណើនតម្រូវការទីតាំងអាជីវកម្ម។

Pizza Hut គឺជាយីហោដើមរបស់ក្រុមហ៊ុនភោជនីយដ្ឋាន Yum Brands Inc នៅអាមេរិក ហើយត្រូវបាននាំយកមកដំណើរការនៅកម្ពុជាដោយក្រុមហ៊ុនសាជីវកម្មម្ហូបអាហារ United Food Group (UFG) ដែលជាក្រុមហ៊ុនមេរបស់ភោជនីយដ្ឋានផាក កាហ្វេ ដែលកំពុងដំណើរការហាងចំនួន ២០ នាពេលនេះ។

លោក ហេង សេងលី នាយកប្រតិបត្តិក្រុមហ៊ុន UFG បានមានប្រសាសន៍ថា ហាង Pizza Hut ដំបូងនឹងបើកដំណើរការក្នុងតំបន់ដែលមានជនបរទេសនិងសកម្មភាពពាណិជ្ជកម្មមមាញឹកគឺជិតផ្សារទួលទំពូង ខណៈដែលហាង២ ទៀតនឹងបើកដំណើរការក្នុងត្រីមាសទីបីឆ្នាំនេះ។ UFG នឹងពង្រីកចំនួនហាង Pizza Hut ឲ្យដល់ ៣០ ហាងនៅរយៈពេល ៣ ឆ្នាំខាងមុខ។

ប្លង់គំរូដែលមានការរចនាដ៏គួរឱ្យទាក់ទាញរបស់ហាង Pizza Hut ដែលនឹងបើកដំណើរការឆាប់ៗនេះ

លោក សេងលី បានបញ្ជាក់ថា៖«វត្តមានហាង Pizza Hut ពេលនេះ បានជួយឲ្យតម្រូវការជួលទីតាំងធ្វើអាជីវកម្មនៅតែមានភាពរឹងមាំ ខណៈដែលអាជីវកម្មមួយចំនួនរងផលប៉ះពាល់ពីស្ថានភាពមិនល្អនៃជំងឺកូវីដ ១៩»។ លោកបន្ថែមថា ហាង Pizza Hut នីមួយៗត្រូវការទីតាំងដែលមានផ្ទៃក្រលាជាមធ្យម ២០០ ម៉ែត្រការ៉េ ដែលជាឱកាសល្អសម្រាប់ម្ចាស់ទ្រព្យដែលមានទីតាំងល្អៗ អាចទាក់ទងបានដើម្បីដាក់ជួល (Tel:023 890 890)។

លោកសេងលី បញ្ជាក់បន្ថែមថា៖«Pizza Hut ក៏នឹងក្លាយជាទីតាំងថ្មីមួយទៀតដែលអាចឲ្យអ្នករកស៊ីផ្នែកដីធ្លី ឬអ្នកប្រកបមុខរបរអាជីវកម្មផ្សេងៗជួបគ្នាពិភាក្សាពីជំនួញ ដែលនឹងជួយបង្កើនសកម្មភាពពាណិជ្ជកម្ម និងសេដ្ឋកិច្ចបានមួយកម្រិតទៀត»។

យោងតាមការអង្កេតរបស់ UFG ទីផ្សារភីហ្សានៅកម្ពុជាអាចរកចំណូលបានប្រមាណ ១០០ លានដុល្លារក្នុងមួយឆ្នាំកាលពីឆ្នាំ ២០១៩ ហើយបានកើនឡើងជាមធ្យម ១៥ ទៅ ២០ ភាគរយក្នុងមួយឆ្នាំដោយសារកំណើនសេដ្ឋកិច្ចនិងការហូរចូលនៃការវិនិយោគបរទេស។

លោក សេងលី បានបញ្ជាក់ថា៖«ចំនួនយុវជនកម្ពុជាដែលអាចរកចំណូលបានដោយខ្លួនឯងមានការកើនឡើងយ៉ាងឆាប់រហ័ស ហើយពួកគេចូលចិត្តផលិតផលម៉ាកយីហោល្បីៗ ដើម្បីលើកកម្ពស់ការរស់នៅទំនើបរបស់ពួកគេ។ យើងជឿជាក់ថា Pizza Hut នឹងក្លាយជាម៉ាកហាងភីហ្សាសម្រាប់យុវវ័យ ហើយយើងមានគោលបំណងផ្សព្វផ្សាយម៉ាកយីហោល្បីនេះ ដល់ប្រទេសកម្ពុជាក្នុងតម្លៃប្រហាក់ប្រហែលគ្នាទៅនឹងប្រេន [brand] ដែលកំពុងមានវត្តមានសព្វថ្ងៃ»។

គិតមកទល់ពេលនេះ កម្ពុជាមានក្រុមហ៊ុនភីហ្សាជាច្រើនកំពុងដំណើរការ ដែលមានដូចជាក្រុមហ៊ុនភីហ្សាដែលមានមូលដ្ឋាននៅប្រទេសថៃ Pizza Company ភីហ្សា Domino’s Pizza ពីសហរដ្ឋអាមេរិក ហាងភីហ្សា Papa John’s Pizza ពីអាមេរិក Yellow Cab Pizza ពីហ្វីលីពីន និង Pezzo Pizza ដែលមានមូលដ្ឋាននៅសិង្ហបុរីជាដើម។

Pizza Hut នៅកម្ពុជាអាចទទួលបានអត្ថប្រយោជន៍ពីបណ្តាញធំទូលាយរបស់ខ្លួន ដោយ Pizza Hut មានដំណើរការហាង ១៨ ៧០៣ នៅក្នុងប្រទេសជាង ១០០ នៅទូទាំងពិភពលោកគិតត្រឹមឆ្នាំ ២០១៩ ដែលធ្វើឲ្យយីហោហាងភីហ្សានេះក្លាយជាហាងភីហ្សាធំបំផុតរបស់ពិភពលោកបើគិតពីចំនួនទីតាំងសរុប។ Pizza Hut តែងមានវិធីសាស្ត្រទីផ្សារតាមបែបទំនើបតាមអ៊ីនធឺណេត ការច្នៃប្រឌិត និងការពង្រីកហាងជាប្រចាំ៕