នៅពីក្រោយភាពជោគជ័យអាជីពសិល្បៈ ម្ចាស់បទ All Of Me ក៏ជាអ្នកវិនិយោគអចលនទ្រព្យដ៏ចំណាន

លោក John Legend ជាតន្រ្តីករជនជាតិអាមេរិកដ៏ល្បីឈ្មោះម្នាក់ ជាពិសេសតាមរយៈបទចម្រៀង All of Me ដែលមានអ្នកចូលទស្សនាលើបណ្តាញសង្គមយូធូបជិត ២ ពាន់លានដងគិតមកដល់បច្ចុប្បន្ន។

ក្រៅពីអាជីពជាតន្រ្តីករ លោក John Legend ក៏ជាអ្នកវិនិយោគលើអចលនទ្រព្យដ៏សកម្ម ហើយបានវិនិយោគជាច្រើនកន្លែងនៅសហរដ្ឋអាមេរិក ដែលមានតម្លៃសរុបបូកបញ្ចូលគ្នារាប់សិបលានដុល្លារ។

តាមសេចក្តីរាយការណ៍របស់សារព័ត៌មាន Wall Street Journal លោក John និងភរិយារបស់លោកដែលជាតារាម៉ូឌែលគឺអ្នកនាង Chrissy Teigen ទើបតែសម្រេចការលក់វីឡាដ៏ស្កឹមស្កៃមួយកន្លែង នៅក្នុងតំបន់ Beverly Hillls នៃក្រុង Los Angeles រដ្ឋ California។ Beverly Hillls ជាតំបន់ពេញនិយមសម្រាប់ការរស់នៅរបស់តារាហូលីវូដ ដែលបណ្តុំទៅដោយលំនៅឋានប្រណិតៗជាច្រើន។

លោក John និងអ្នកនាង Chrissy Teigen

គូស្វាមីទាំងពីរបានទិញវីឡានេះក្នុងតម្លៃ ១៤,១ លានដុល្លារកាលពី ២០១៤ ហើយបានលក់ចេញវិញបានតម្លៃ ១៦,៨ លានដុល្លារឲ្យទៅនាយកប្រតិបត្តិក្រុមហ៊ុនផ្សារហ៊ុនដ៏ធំមួយនៅអាមេរិកកាលពីខែកក្កដា ឆ្នាំ២០២១នេះ។

ភាគីជាអ្នកតំណាងទិញអចលនទ្រព្យប្រណិតនេះគឺអ្នកស្រី Joyce Rey ដែលជាភ្នាក់ងារអាជីពមកពីក្រុមហ៊ុន Coldwell Banker ដែលជាក្រុមហ៊ុនមានឯកទេសខាងទិញ-លក់អចលនទ្រព្យប្រណិតៗនៅលើពិភពលោក។ (អានបន្ថែម)

ផ្ទះវីឡាប្រណិតដែលទើបសម្រេចការលក់បាននេះ ស្ថិតក្នុងចំណោមអចលនទ្រព្យជាច្រើនទៀតដែលលោក John បានចំណាយរាប់សិបលានដុល្លារក្នុងការវិនិយោគ។

យោងតាមសេចក្តីរាយការណ៍របស់សារព័ត៌មានអាមេរិក The New York Post ចេញផ្សាយកាលពីខែ មិថុនា ឆ្នាំ២០២១ លោក John និងអ្នកនាង Chrissy បានចំណាយទឹកប្រាក់ប្រមាណជាង ៥៧ លានដុល្លារ ទិញអចលនទ្រព្យជាច្រើនកន្លែងនៅអាមេរិក។

The News York Post បានកត់ត្រា អចលនទ្រព្យមួយចំនួន ដែលជាការវិនិយោគរបស់ John និងអ្នកនាង Chrissy ដូចខាងក្រោម៖

នៅខែកញ្ញា ឆ្នាំ២០២០ គូរស្វាមីទាំងពីរនេះបានទិញលំនៅឋានប្រណិតមួយកន្លែងក្នុងតំបន់ Beverely Hills ដដែល ក្នុងតម្លៃ ១៧,៥ លានដុល្លារ
ក្នុងឆ្នាំ២០១២ ពួកគាត់បានទិញបន្ទប់ស្នាក់នៅគ្រែមួយ មួយយូនីតក្នុងអគារខុនដូមួយឈ្មោះថា The Brewster Carriage House ស្ថិតតាមបណ្តោយផ្លូវ Broomer ក្រុង New York។ តម្លៃយូនីតអាខុដូនាពេលនោះមានតម្លៃ ២,៤៩ លានដុល្លារ ហើយអ្នកទាំងពីរបានលក់ចេញវិញក្នុងតម្លៃ ៣,៩៩ លានដុល្លារក្នុងឆ្នាំ២០១៦។
ក្នុងឆ្នាំ២០១៨ និងឆ្នាំ២០២០ អ្នកទាំងពីរបានទិញយូនីតខុនដូប្រភេទ Penthouse ក្នុងអគារខុនដូដដែល ចំនួនពីរយូនីតដែលមានទំហំប្រហែល ៥៧២ ម៉ែត្រការ៉េ (6163 square feet)។ យូនីត Penthouse ទាំងពីរនេះមានតម្លៃសរុបបូកបញ្ចូលគ្នា ១៦,៧២ លានដុល្លារ។
ក្នុងខែមេសា ឆ្នាំ ២០១២ អ្នកទាំងពីរបានទិញលំនៅឋានប្រណិតមួយកន្លែងស្ថិតក្នុងតំបន់ទីប្រជុំជន West Hollywood ក្រុង Los Angeles នៃរដ្ឋ California។ ផ្ទះនេះមានទំហំផ្ទៃក្រឡាប្រហែល ៣១៩ ម៉ែត្រការ៉េ ដែលអ្នកទាំងពីរទិញនាពេលនោះក្នុងតម្លៃ ៥,១ លានដុល្លារ
ក្នុងឆ្នាំ ២០០៧ លោក John បានទិញលំនៅឋានមួយកន្លែងស្ថិតក្នុងតំបន់លំនៅឋាន Hollywood Hills ក្រុង Los Angeles មានតម្លៃ ១,៥ លានដុល្លារ។ ផ្ទះនេះត្រូវបានលក់ចេញវិញក្នុងតម្លៃជាង ២លានដុល្លារ ក្នុងឆ្នាំ២០១៤ ពោលគឺមួយឆ្នាំបន្ទាប់ពីលោក John និងអ្នកនាង Chrissy បានរៀបការជាមួយគ្នា។
ក្នុងឆ្នាំ ២០០៩ លោក John បានទិញខុនដូមានបន្ទប់គេងគ្រែពីរ ស្ថិតក្នុងតំបន់ផ្លូវ Bowery ក្រុង New York ក្នុងតម្លៃ ១,៩ លានដុល្លារ ហើយបានលក់ចេញវិញក្នុងតម្លៃ ២,៦៨ លានដុល្លារក្នុងឆ្នាំ២០១២។
ក្នុងឆ្នាំ២០០៥ លោក John បានទិញយូនីតអាផាតមិនដែលមានបន្ទប់គេងគ្រែពីរក្នុងតម្លៃ ១,៤ លានដុល្លារ។ អាផាតមិននេះ ស្ថិតក្នុងតំបន់ប្រជុំជន East Village ក្រុង Los Angeles៕