កូវីដ-១៩ កំពុងជំរុញឱ្យមានកំណើនទិញផ្ទះលម្ហែកាយនៅអាមេរិក

ជំងឺរាតត្បាតសកល​ ដែលបង្កឡើងដោយកូវីដ១៩ កំពុងជំរុញឱ្យប្រជាជនអាមេរិកទិញផ្ទះលម្ហែកាយកាន់តែច្រើនឡើង ​ដែលគិតត្រឹម​បួនខែដំបូងឆ្នាំ  ២០២១នេះ (មករា-មេសា) ប្រតិបត្តិការលក់ផ្ទះលម្ហែកាយកើនឡើង ៥៧ ភាគរយ។ នេះបើតាមសមាគមជាតិនៃភ្នាក់ងារអចលនទ្រព្យរបស់សហរដ្ឋអាមេរិក (NAR)។

ស្ថាប័ន NAR បានចេញផ្សាយរបាយការណ៍ថ្មីមួយទាក់ទងនឹងទីផ្សារលំនៅឋានបែបលម្ហែកាយឆ្នាំ២០២១ បានបង្ហាញថា រយៈពេលបួនខែដំបូង​ឆ្នាំនេះ ចំនួននៃការលក់ផ្ទះមិនមែនប្រភេទលំនៅឋានលម្ហែកាយ (non-vacation home) មានកំណើន​តែ ២០ ភាគរយប៉ុណ្ណោះធៀបរយៈពេលដូចគ្នាក្នុងឆ្នាំ២០២០។

ក្នុងឆ្នាំ២០២០ តម្លៃផ្ទះ​លម្ហែកាយ​មានកំណើន ១៤ ភាគរយ ស្របពេលដែលផ្ទះមិនមែនលម្ហែកាយមានកំំណើ ១០​ ភាគរយ  ធៀបនឹងឆ្នាំ២០១៩។​ នេះបើតាមរបាយការណ៍។

លោក Lawrence Yun ប្រធានផ្នែកស្រាវជ្រាវជាន់ខ្ពស់ NAR បានបញ្ជាក់នៅក្នុងរបាយការណ៍នេះថា ផ្ទះ​លម្ហែកាយកំពុងក្លាយជាទីផ្សារ​ដ៏មានសក្តានុពល ដោយសារតែម្ចាស់ក្រុមហ៊ុនជាច្រើននៅតែបន្តអនុញ្ញាតឱ្យបុគ្គលិកធ្វើការពីចំងាយ​។ កត្តានេះលោក Lawrence បញ្ជាក់បន្ថែមថា ផ្ទះលម្ហែកាយនៅតែពេញនិយមក្នុងចំណោមអ្នកទិញ។

តាមការសិក្សា NAR ទីតាំងសំខាន់ៗនៅក្នុងរដ្ឋ​ចំនួន ៤នៅអាមេរិកដូចជារដ្ឋ Florida, Michigan, North Carolina, និងរដ្ឋ Massachusetts ជាតំបន់មានកំណើននៃការលក់ផ្ទះ​លម្ហែបានច្រើនជាងគេ។ ហើយផ្ទះលម្ហែកាយ​នៅក្នុងតំបន់ទាំងនេះមានតម្លៃជាមធ្យមជាង ១សែនដុល្លារ ដល់ជាង ១លានដុល្លារ ក្នុងមួយផ្ទះ ឬយូនីត៕