ក្បួនទិញដីដោយស្របច្បាប់ ៤ ដែលវិនិយោគិនបរទេសនិយមប្រើនៅកម្ពុជា

ហ៊ គីមសាយ 28/July/2021 17:54
ទស្សនា
ចែករំលែក

បើទោះបីជាច្បាប់ប្រទេសកម្ពុជារឹតត្បិតសម្រាប់​ជន​បរទេសក្នុងការ​​មានសិទ្ធ​ទិញ​​ដីធ្លី ឬអចលនទ្រព្យជាប់ដីក៏ដោយ តែការ​អនុវត្តជាក់ស្តែង​ក៏នៅទុក​​លទ្ធភាពឱ្យជនបរទេស​អាចទិញអចលនទ្រព្យទាំងនោះបានដោយស្របច្បាប់។

នៅក្នុងកិច្ចពិភាក្សាចែករំលែកចំណេះដឹងស្តីពី «ឱកាសការងារ និងវិនិយោគក្នុងវិស័យអចលនទ្រព្យ» កាលពីថ្ងៃចន្ទនេះ អ្នកស្រី ហ្រ្គេស រចនី អគ្គនាយិការក្រុមហ៊ុន Century 21 Cambodia បានបញ្ជាក់ពីវិធីសាស្រ្តបួនដែលវិនិយោគិនបរទេសតែង​អនុវត្តន៍ដើម្បីអាចទិញដីធ្លី និងអចលនទ្រព្យជាប់ដីបានដោយស្របច្បាប់នៅកម្ពុជា​។ ខាងក្រោមនេះ គឺជាវិធីសាស្រ្តសំខាន់ ៤ ដែលអ្នកគួរដឹង៖

១ – ចុះឈ្មោះក្រុមហ៊ុនសាជីវកម្មដែលមានម្ចាស់ជាជនជាតិខ្មែរយ៉ាងហោច ៥១ ភាគរយ​ (Land Holding Company)៖ លក្ខខណ្ឌនេះគឺត្រូវបានអនុវត្តជាច្រើនឆ្នាំមកហើយនៅក្នុងប្រទេសកម្ពុជា។ តាមរយៈវិធីនេះ ជនបរទេសអាចកាន់កាប់ដី ក្នុងនាមជាក្រុមហ៊ុនដែលមានសញ្ជាតិជាខ្មែរកាន់កាប់ភាគហ៊ុនយ៉ាងហោច ៥១ ភាគរយ​ហើយជនបរទេសកាន់កាប់៤៩ ភាគរយ។ វិធីនេះតែង​ប្រើក្នុងករណីមានការវិនិយោគទ្រង់ទ្រាយធំ ហើយ​ជនបរទេស ត្រូវបានការពារសិទ្ធិដោយកិច្ចសន្យាភាគហ៊ុន។

ចូលសញ្ជាតិកម្ពុជា៖ យោងទៅតាមច្បាប់របស់ប្រទេសកម្ពុជា មានតែប្រជាជនខ្មែរប៉ុណ្ណោះដែលមានសិទ្ធកាន់កាប់ដីធ្លី ឬផ្ទះជាប់ដីបាន (បរទេសអាច​ក្លាយជាម្ចាស់កម្មសិទ្ធផ្ទះ​ចាប់ពីជាន់ទី១ឡើង)។ វិធីសាស្រ្តចូលសញ្ជាតិខ្មែរ អនុញ្ញាតឲ្យជនបរទេសមានសិទ្ធស្របច្បាប់​លើអចលនទ្រព្យ ហើយ​វិធីសាស្រ្តនេះ​វិនិយោគិនចិន​ពេញនិយមអនុវត្ត​នៅពេលទិញដី និងអចលនទ្រព្យ​នៅកម្ពុជា។

រកអ្នកតំណាងជាជនជាតិកម្ពុជា៖ ជនបរទេសត្រូវរកអ្នកតំណាងជាជនជាតិខ្មែរ ដើម្បីធ្វើការទិញដីឬផ្ទះដោយស្របច្បាប់។ ​សិទ្ធកាន់កាប់គឺត្រូវប្រើឈ្មោះអ្នកតំណាង ដូច្នេះជនបរទេសនិងអ្នកតំណាងត្រូវធ្វើកិច្ចព្រមព្រៀងផ្ទាល់ខ្លួន។ វិធីនេះមានភាពងាយស្រួល ទន្ទឹមនិងនេះក៏អាចផ្តល់ហានិភ័យដល់ជនបរទេសផងដែរ ជាពិសេសនៅពេលដែលពួកគេមិនអាចរកអ្នកតំណាងដែលគួរឲ្យទុកចិត្ត។ ដូច្នេះជនបរទេសគួរតែជ្រើសរើសអ្នកតំណាងពីក្រុមហ៊ុនដែលមានវិជ្ជាជីវៈច្បាស់លាស់ក្នុងការផ្តល់សេវាកម្មនេះ។

ទិញតាម​ក្រុមហ៊ុនបរធនបាល (ក្រុមហ៊ុនថែរក្សាទ្រព្យសម្បត្តិជំនួស) ឬភាសាអង់គ្លេសហៅថា Trust Company យោងតាមច្បាប់ស្តីពីបរធនបាលកិច្ចឆ្នាំ២០១៩ ជនបរទេសអាចទិញដីនៅកម្ពុជាបានតាមរយៈក្រុមហ៊ុនបរធនបាល ដែលបានចុះបញ្ជីបរធនបាលកិច្ចនៅក្រសួងសេដ្ឋកិច្ច និងហិរញ្ញវត្ថុត្រឹមត្រូវ។

ក្រុមហ៊ុនបរធនបាលដើរតួជាអ្នកគ្រប់គ្រងទ្រព្យសម្បត្តិឱ្យជនបរទេស ដោយគ្មានសិទ្ធិយកទៅលក់ បន្តឡើយ ទោះជាដីនោះជាឈ្មោះកម្មសិទ្ធិរបស់ក្រុមហ៊ុនក៏ដោយ។ ការទិញដោយវិធីនេះ ជនបរទេសតែងមាន​ទំនុកចិត្តខ្ពស់។

នៅកម្ពុជា ក្រុមហ៊ុន Zillion Trust PLC គឺជាក្រុមហ៊ុនបរធនបាល មួយដែលបានចុះបញ្ជីនៅក្រសួងសេដ្ឋកិច្ច និងហិរញ្ញវត្ថុ និងទទួលស្គាល់ពេញលេញដោយនិយ័តករមូលបត្រកម្ពុជា (SERC) ដែលអាចជាតំណាងដ៏ស័ក្តិសម​សម្រាប់​ជនបរទេសក្នុងការ​ទិញដី និងអចលនទ្រព្យផ្សេងៗ៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង