ហេតុអ្វីការអភិវឌ្ឍលំនៅឋានសម្រាប់អ្នកចូលនិវត្តកំពុងមានកំណើននៅចិន?

ក្រុមអ្នកវិនិយោគកាន់តែច្រើនឡើង​កំពុងចាប់យកឱកាសពីការវិនិយោគលំនៅឋានសម្រាប់​និវត្តជន ស្របពេលចំនួនប្រជាជន​​វ័យចំណាស់កាន់តែច្រើន​ឡើងនៅ​ប្រទេសចិន។ នេះបើតាមសេចក្តីរាយការណ៍របស់សារព័ត៌មាន Bloomberg។ 

ក្រុមហ៊ុន Lendlease Corp Ltd., ដែលជាក្រុមហ៊ុនអភិវឌ្ឍន៍អចលនទ្រព្យ និងហេដ្ឋារចនាសម្ព័ន្ធ មានមូលដ្ឋាននៅទីក្រុងស៊ីដនី ប្រទេសអូស្រ្តាលី បានបោះទុនវិនិយោគ ២៨០​ លានដុល្លារ ដើម្បីអភិវឌ្ឍន៍គម្រោងលំនៅឋានបែបសហគមន៍សម្រាប់និវត្តជនមួយកន្លែងនៅក្រុង សៀងហៃ ហើយគម្រោងនេះមានឈ្មោះថា Ador  Garden។

ក្រុមហ៊ុន Lendlease ស្ថិតក្នុងចំណោមក្រុមហ៊ុន​វិនិយោគជាច្រើនទៀត ដែលមើលឃើញពីបរិយាកាស​គោលនយោបាយ ក្នុងការចាប់យកចំណែកទីផ្សារ​នេះ ស្របពេលដែលរដ្ឋាភិបាលចិនកំពុងដាក់ចេញគោលនយោបាយក្នុងការដោះសា្រយបញ្ហាប្រឈមទាក់ទងនឹងកំណើននៃប្រជាជនវ័យចំណាស់។

ប្លង់គំរូនៃគម្រោងអភិវឌ្ឍន៍លំនៅឋានសហគមន៍សម្រាប់អ្នកចូលនិវត្តន៍របស់ក្រុមហ៊ុន Lendlease

លោក Ding Hui ប្រធានក្រុមហ៊ុន Lendlease បានថ្លែង​ថា តម្រូវការក្នុងទីផ្សារ​នេះនឹងកាន់តែមានកំណើនខ្ពស់ បើគិតពី១០ឆ្នាំ​ខាងមុខ ធៀបនឹងបច្ចុប្បន្ន។ លោកបន្តថា៖ «បើរង់ចាំ​១០​ ឆ្នាំទៀត ទើបចាប់ផ្តើមគិត​​…ចាប់ផ្តើមធ្វើ ប្រហែលពេលនោះយឺ​តពេលបាត់ទៅហើយ ក្នុងការចាប់យកឱកាសបែបនេះ»។

យោងតាមទិន្ន័យទាក់ទងនឹងតួរលេខបច្ចុប្បន្នភាព​នៃចំនួនប្រជានជនចិន បានឱ្យដឹងថា ប្រជាជនចិនដែលមានអាយុ ៦០ ឆ្នាំនិងលើសនេះ បានកើនឡើង ៤៧ ភាគរយ នាយរៈពេលប៉ុន្មានទស្សវត្សរ៍ចុងក្រោយនេះ ឬស្មើនឹងចំនួន ២៦០ លាននាក់។​ ចំនួននេះស្មើនឹង​ជាង ១៨ ភាគរយ នៃចំនួនប្រជាជនចិនសរុបប្រមាណ ១,៤ ពាន់លាននាក់​គិតត្រឹមឆ្នាំ២០២០។ ទិន្ន័យដដែលព្យការណ៍ថា ចំនួនអ្នកចូលនិវត្តន៍នេះនឹងអាចកើនដល់ ៥០០ លាន​នាក់នៅត្រឹមឆ្នាំ ២០៥០ ពោលគឺកើនឡើងជិតពីរដង​  ធៀបនឹងចំនួនបច្ចុប្បន្ន ២៦០ លាននាក់។

សេចក្តីរាយការណ៍ Bloomberg បានបញ្ជាក់ថា រដ្ឋាភិបាលចិនកំពុងតែ​រៀបចំផែនការលម្អិតលើការពង្រឹងយកចិត្តទុកដាក់អ្នកចូលនិវត្តន៍ (senior-care sector) ហើយផែនការនេះនឹងផ្តោតលើការចំណាយចាំ​បាច់ និងសេវាកម្មប្រើប្រាស់ផ្សេងៗរបស់និវត្តជន​។

មានក្រុមហ៊ុនវិនិយោគបរទេស និងអ្នកវិនិយោគក្នុងស្រុកជាច្រើនទៀត ដែលកំពុងចាប់ផ្តើមវិនិយោគលើលំនៅឋាន និងសេវកម្ម​ សម្រាប់អ្នកចូលនិវត្តនៅក្នុងប្រទេសចិន។ ​ក្រុមហ៊ុនទាំងនោះមានដូចជា ក្រុមហ៊ុនគ្រប់គ្រងដោយរដ្ឋប្រទេសសឹង្ហបុរី Temasek Holdings Pte, ក្រុមហ៊ុនអាមេរិក Columbia Pacific Management និងក្រុមហ៊ុន Fortess Investemnt Group ជាដើម។ ​

លោក William Tang ដែលជានិវត្តជនមួយរូប ក្នុងចំណោមនិវត្តជនជាច្រើនរូបទៀត បានចំណាយ​ទឹកប្រាក់ ២២០ ០០០ ដុល្លារ ដើម្បីជួលអាផាតមិនដែលមានបន្ទប់គេង​គ្រែពីរ​ នៅក្នុងគម្រោង Ador  Garden ក្រុមហ៊ុន Lendlease Corp Ltd។ បច្ចុប្បន្នលោក Tang មានវ័យ៧០ ឆ្នាំ ហើយលោកបានជួលអាផាតមិន នៅក្នុងគម្រោង​លំនៅឋានសហគមន៍និវត្តជននេះរយៈពេល ១៥ឆ្នាំ ដែលលោកនឹងចាប់ផ្តើមទៅរស់នៅទីនោះចាប់ពីខែ​កញ្ញា ខាងមុខនេះ៕