«ដីធ្លី» គឺជាប្រភេទវិនិយោគពេញនិយមជាងគេសម្រាប់វិនិយោគិនបរទេសនៅកម្ពុជា

ភ្នំពេញ៖ ដីធ្លី​គឺជាប្រភេទអចលនទ្រព្យដែលទទួលបានការ​ពេញវិនិយម​វិនិយោគ​ជាងគេក្នុង​​ចំណោមវិនិយោគិនបរទេសមក​កម្ពុជា ធៀបនឹងប្រភេទអចលនទ្រព្យផ្សេងទៀត។ នេះបើយោងតាម​ការ​បញ្ជាក់ពីអ្នកជំនាញក្នុងវិស័យអចលនទ្រព្យ។

ថ្លែងក្នុងកិច្ចពិភាក្សាប្រចាំសប្តាហ៍​ទាក់ទងនឹង «វិនិយោគិនបរទេសនៅកម្ពុជា​ក្នុងវិស័យអចលនទ្រព្យ»​ ដែលរៀបចំដោយព័ត៌មានអចលនទ្រព្យ Z1News កាលពីថ្ងៃទី ១៩ កក្កដា​ អ្នកស្រី ហ្គ្រេស រចនី អគ្គនាយិកាក្រុមហ៊ុន Century 21 Cambodia បានបញ្ជាក់ថា វិនិយោគិន​បរទេសមកបណ្តាក់ទុនក្នុងវិស័យអចលនទ្រព្យ​នៅកម្ពុជា​ មានទម្រង់ផ្សេងៗគ្នា ហើយជាទូទៅ​​ពួកគេ​ចាប់អារម្មណ៍ការវិនិយោគលើដីធ្លី ដោយសារ​មានឱកាសទទួលចំណេញច្រើន​ ធៀបនឹងអចលនទ្រព្យពាណិជ្ជកម្ម។ អ្នកស្រីបន្តថា ប្រភេទផ្សេងទៀតដែលវិនិយោគិនបរទេស​វិនិយោគក្នុងវិស័យអចលនទ្រព្យមាន​ដូចជាការវិនិយោគសម្រាប់អភិវឌ្ឍន៍ជាសំណង់លំនៅឋាន ​ខុនដូ បុរី ឬជាអគារពាណិជ្ជកម្ម។

អ្នកស្រីថ្លែងថា៖ «យើងសង្កេតឃើញថា ការវិនិយោគពីក្រៅប្រទេស​ដែលមកវិនិយោគនៅកម្ពុជា​ភាគច្រើនគាត់ទិញ​ដី ដោយសារការវិនិយោគលើដី [តាមទីតាំងសំខាន់ៗ] មានឱកាសទទួលផលចំណេញច្រើនជាង ប្រភេទអចលនទ្រព្យពាណិជ្ជកម្មខ្លះទៀតផង។»

អ្នកស្រី ហ្គ្រេស រចនី និងលោក ច្រឹក សុខនីម ដែលបានចូលរួមក្នុងកិច្ចពិភាក្សាកាលពីថ្ងៃចន្ទ

អ្នកស្រីបានលើកយកឧទារហ៍ជាក់ស្តែង ពីទីតាំងដីស្ថិតនៅតាមបណ្តោយមហាវីថី ៦០ម៉ែត្រ ដែលមានតម្លៃក្រោម​ ១ ០០០​ ដុល្លារក្នុងមួយម៉ែត្រការ៉េកាលពីអំឡុងឆ្នាំ ២០១៧។ បច្ចុប្បន្នតំបន់ផ្លូវ ៦០ ម៉ែត្រ កំពុងក្លាយជាតំបន់ពាណិជ្ជកម្មថ្មីក្នុងរាជធានីភ្នំពេញ ហើយតម្លៃដីវិញបានកើនដល់ប្រមាណ ១ ៨០០ ដុល្លារក្នុងមួយម៉ែត្រការ៉េ។

អ្នកជំនាញរូបនេះក៏បានលើកឡើងដែរថា​ តំបន់ទួលគោកជាទីតាំងដែលការវិនិយោគ នឹងទទួលផលចំណេញខ្ពស់ ដោយសារ​តំបន់នេះនឹងក្លាយជាបឹងកេងកងទី ២ នៅរយៈពេលប្រាំឆ្នាំខាងមុខ។ បឹងកេងកង​ ជាតំបន់ពាណិជ្ជកម្ម (CBD) ក្នុងរាជធានីភ្នំពេញ។ ការវិឌ្ឍដ៏ឆាប់​រហ័សនៃតំបន់ទួលគោកនេះ អ្នកស្រីមើលឃើញថា នឹងធ្វើឱ្យតម្លៃដីកើនពី ៣ ២០០ ដុល្លារ ក្នុងមួយម៉ែត្រការ៉េបច្ចុប្បន្ន ដល់ ៦ ៥០០ ទៅ ៧ ៥០០ ដុល្លារក្នុងមួយម៉ែត្រការ៉េនៅប្រាំឆ្នាំខាងមុខ។

យោងតាមរបាយការណ៍ធនាគារជាតិនៃកម្ពុជា ទំហំទុន​វិនិយោគផ្ទាល់ពីបរទេស (FDIs) នៅកម្ពុជាកាលពីឆ្នាំ ២០២០ មានចំនួនសរុប ៣ពាន់លានដុល្លារ។  ក្នុងចំណោមទុនវិនិយោគសរុប ទុនវិនិយោគ​ទៅក្នុងវិស័យសំណង់ និងអចលនទ្រព្យ មានចំណែកដល់ទៅ ១៧ ភាគរយ, វិស័យកម្មន្តសាលមានចំណែក ១៦,២ ភាគរយ ស្របពេលដែលវិស័យហិរញ្ញវត្ថុ​មានចំណែកដល់ទៅ ១/៣ នៃទុនវិនិយោគសរុប។

លោកច្រឹក សុខនីម ប្រធាន​សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលបានចូលរួមក្នុងកិច្ចពិភាក្សានេះដែរ​ បានថ្លែង​​​ថា វិនិយោគិនបរទេសដែលមកវិនិយោគនៅកម្ពុជាបែងចែកជាពីរប្រភេទ គឺ​ការវិនិយោគជាលក្ខណៈបុគ្គល និងការវិនិយោគតាមរយៈការបង្កើតជាក្រុមហ៊ុនសាជីវកម្ម (corporation)។

តាមរយៈបទពិសោធន៍ដែលលោកធ្លាប់បានទំនាក់ទំនងជា​មួយវិនិយោគិនបរទេសជាច្រើននៅកម្ពុជាកន្លងមក លោក សុខនីម បានបញ្ជាក់ថា៖ «វិនិយោគិនបរទេស​ដែលវិនិយោគជាលក្ខណៈបុគ្គលភាគច្រើនផ្តោតលើការទិញអលនទ្រព្យលំនៅឋាន និងទីតាំងដីធ្លីតូចល្មម។ ចំណែកឯវិនិយោគិនបរទេសដែលវិនិយោគជាលក្ខណៈក្រុមហ៊ុនវិញ ផ្តោតលើទីតាំងដីធំៗ សម្រាប់ទុកអភិវឌ្ឍន៍ទៅតាមស្ថានភាពទីផ្សារជាក់ស្តែង»៕