ប្រជាជនថៃអាចប្រើប្រាស់លុយឌីជីថលដើម្បីទិញផ្ទះបានពីគម្រោងធំៗមួយចំនួន

ក្រុមហ៊ុនអភិវឌ្ឍន៍អចលនទ្រព្យធំៗចំនួនបីនៅក្នុងប្រទេសថៃកាលពីពេលថ្មីៗនេះ បានអនុញ្ញាតឱ្យអតិថិជនប្រើប្រាស់​លុយឌីជីថល Crypto ដើម្បីទូទាត់ក្នុងការទិញផ្ទះ ដែលជាការសម្របខ្លួនថ្មីមួយ​ក្នុងការប្រើប្រាស់រូបិយប័ណ្ណឌីជីថល។

យោងតាមសេចក្តីរាយការណ៍ការសែត Bangkok Post ក្រុមហ៊ុនអភិវឌ្ឍន៍អចលនទ្រព្យ​ទាំងបីនេះមានដូចជាក្រុមហ៊ុន​ AssetWise, SC Asset Corporation Plc និងក្រុមហ៊ុនអភិវឌ្ឍន៍អចលនទ្រព្យ Sansiri Plc។

ប្រភពដែលបានបញ្ជាក់ថា​ ក្រុមហ៊ុន AssetWise ដែលជាក្រុមហ៊ុនចុះបញ្ជីនៅផ្សារហ៊ុនប្រទេសថៃ បានសហការជាមួយក្រុមហ៊ុនរូបិយបណ្ណឌីជីថលក្នុងស្រុករបស់ថៃឈ្មោះ Bitkub Capital Group Holdings ដើម្បីឱ្យអតិថិជនអាចប្រើប្រាស់លុយឌីជីថល Crypto ក្នុងការ​ទិញផ្ទះនៅក្នុងគម្រោងរបស់ក្រុមហ៊ុននេះ។

លោក Kromchet Vipanpong នាយកប្រតិបត្តិក្រុមហ៊ុន AssetWise បានថ្លែងប្រាប់ការសែត Bangkok Post ថា ការដាក់ឱ្យប្រើប្រាស់​លុយឌីជីថល Crypto នេះ​នឹងផ្តល់ជម្រើសកាន់តែប្រសើរ បន្ថែមលើការទូទាត់ជា​សាច់ប្រាក់ និងតាមរយៈបណ្ណធនាគារ (credit card) ដល់អតិថិជន។

លោកបញ្ជាក់ថា៖ «ការទូទាត់តាមរយៈលុយឌីជីថល Crypto នេះ  អតិថិជនចំណាយថ្លៃសេវាទាបមែនទែនត្រឹមតែ ០,២៥ ភាគរយ ធៀបជាមួយនឹងការទូទាត់តាមបណ្ណធនាគារវិញគឺ ២ ទៅ ៣ ភាគរយឯណោះ។​» លោកបន្ថែមថា ភ្លាមៗបន្ទាប់ពីដាក់ឱ្យប្រើប្រាស់ជាផ្លូវការ មានអតិថិជនពីររូបបានសម្រេចចុះឈ្មោះបង់ប្រាក់ប្រចាំខែ ដោយប្រើប្រាស់រូបិយបណ្ណឌីជីថល Ethereum (ប្រភេទលុយ Crypto) ក្នុងការទិញ​ខុនដូ។

រូបិយបណ្ណឌីជីថល Crypto  គឺជារូបិយបណ្ណថ្មី​ដែលអ្នកប្រើប្រាស់អាចទូទាត់ក្នុងការទិញទំនិញ ឬបង់ថ្លៃសេវាកម្មផ្សេង​ៗ តាមប្រព័ន្ធអនឡាញ។ ​រូបិយបណ្ណ Crypto  មានច្រើនប្រភេទផ្សេងគ្នា​ដូចជា Bitcoin, Ethereum, USDC និងUSDT ជាដើម ដែលរូបិយឌីជីថលទាំងនេះកំពុង​ពេញនិយមក្នុងការជួញដូរលើទីផ្សារអន្តរជាតិ។ បើគិតជាមូលធនទីផ្សារ (market cap) ការជួញដូរ Bitcoin មានទំហំទឹកប្រាក់ច្រើនជាងគេដល់ទៅ ៦១៦ ពាន់លាន​ដុល្លារ គិតត្រឹមពាក់កណ្តាលខែកក្កដា ឆ្នាំ២០២១។

SC Asset Corporation Plc ក៏បានសហការជាមួយក្រុមហ៊ុន Bitkub Capital Group Holdings ដើម្បីឱ្យអតិថិជនប្រើប្រាស់លុយឌីជីថល Crypto អាចទិញផ្ទះនៅក្នុងគម្រោងរបស់ក្រុមហ៊ុននេះផងដែរ។

កាលពីដើមខែ កក្កដា​ នេះ​ក្រុមហ៊ុន Sansiri Plc ក៏បានសហការជាមួយក្រុមហ៊ុន  XSpring Digital ដើម្បីដាក់ឱ្យប្រើប្រាស់ការទូទាត់តាមលុយឌីជីថល Crypto ដែលក្រុមហ៊ុនអចលនទ្រព្យនេះរំពឹងថា នឹងជួយបង្កើនចំណូល ដោយ​សារថា​ការប្រើប្រាស់ Crypto កំពុងពេញនិយមក្នុងចំណោមយុវជន។

ទោះយ៉ាងណាលោក  Srettha Thavisin ប្រធានក្រុមហ៊ុន Sansiri Plc បានបញ្ជាក់ថាការទូទាត់តាម Crypto នេះអនុញ្ញាតតែអតិថិជនក្នុងស្រុកប៉ុណ្ណោះនាពេលបច្ចុប្បន្ន។ លោកបញ្ជាក់ថា៖ «ប្រសិនបើនិយ័តករផ្សារហ៊ុន និងអាជ្ញាធរ អនុញ្ញាតជនបរទេសប្រើប្រាស់ Crypto ដើម្បីទិញគម្រោងលំនៅឋាន  នោះជារឿងល្អដោយសារតែជនបរទេសមានចំណែកទីផ្សារដ៏ធំនៅក្នុងគម្រោងរបស់យើង។»