តំបន់ពីរក្នុងខណ្ឌជ្រោយចង្វារដែលមានតម្លៃដីទាប សម្រាប់វិនិយោគិនដីធ្លីពិចារណា

ប៊ុនធឿន 14/July/2021 16:53
ទស្សនា
ចែករំលែក

ភ្នំពេញ៖ សង្កាត់បាក់ខែង​ និងសង្កាត់​កោះដាច់ ជាតំបន់ដែលមានតម្លៃដីទាបជាងគេ ធៀ​បនឹងសង្កាត់ផ្សេងទៀតក្នុងខណ្ឌជ្រោយចង្វារ​ ដែលអ្នកវិនិយោគអាចទិញចូលក្នុងតម្លៃទាប លក់ចេញក្នុងតម្លៃខ្ពស់។ នេះបើតាមអ្នកឯកទេសដីធ្លីប្រចាំខណ្ឌជ្រោយចង្វារ។

លោក ម៉ែន វិជ្ជាការ ប្រធានសាខាក្រុមហ៊ុន Century 21 Zillion Holding ប្រចាំ​ខណ្ឌជ្រោយចង្វារ បានបញ្ជាក់ថា តម្លៃដីក្នុងសង្កាត់ទាំងពីរបន្តកើនរៀងរាល់​ឆ្នាំតាមរយៈការអភិវឌ្ឍហេដ្ឋារចនាសម្ព័ន្ធ និងគម្រោង​ផ្សេងៗទៀតដូចជាសំណង់ផ្ទះល្វែង និងបុរី របស់ក្រុមហ៊ុនឯកជន។

បើតាមលោក វិជ្ជាការ ទីតាំងបណ្តោយផ្លូវធំក្នុងសង្កាត់បាក់ខែង អាចរកទិញបានក្នុងតម្លៃចាប់ពី ២០០ ទៅ ៨០០ ដុល្លារក្នុងមួយម៉ែត្រការ៉េ ចំណែកទីតាំងដីតាមផ្លូវតូចៗ អាចរកទិញបាន​​ចាប់ពី ៨០​ ទៅ ៣០០ ដុល្លារក្នុងមួយម៉ែត្រការ៉េ។ សង្កាត់កោះដាច់វិញ អាចរកទិញបានក្នុងតម្លៃចាប់ពី ៥០ ទៅ ៣០០ ដុល្លារក្នុងមួយម៉ែត្រការ៉េ ដោយអាស្រ័យទីតាំងដែលស្ថិតនៅតាមបណ្តោយផ្លូវតូច ឬផ្លូវធំ។

លោកបញ្ជាក់ថា៖ «សង្កាត់ទាំងពីរនេះនៅ​មានតម្លៃដីទាបជាងគេ តែ​អាចមានអាត្រាកំណើនខ្ពស់ពីមួយឆ្នាំទៅមួយឆ្នាំ ដែលខុសពី​​សង្កាត់បីផ្សេងទៀតមានតម្លៃដីខ្ពស់ស្រាប់ តែអាច​មានកំណើនតិចតួច»។

សង្កាត់បាក់ខែង​ និងសង្កាត់​កោះដាច់ ស្ថិតក្នុងចំណោមសង្កាត់បីផ្សេងទៀតក្នុងខណ្ឌជ្រោយចង្វារមានដូចជា សង្កាត់ជ្រោយចង្វារ ព្រែកលៀប និងសង្កាត់ព្រែកតាសេក។

សង្កាត់ជ្រោយចង្វារមានតម្លៃដីចាប់ពី ៨០០ ទៅ ៣ ៥០០ ដុល្លារក្នុងមួយម៉ែត្រការ៉េ។ សង្កាត់ព្រែកលៀបមានតម្លៃដីចាប់ពី ២០០ ទៅ ២ ៥០០ ដុល្លារក្នុងមួយម៉ែត្រការ៉េ ស្របពេលដែលសង្កាត់ព្រែកតាសេកមានតម្លៃដីចាប់ពី ៨០ ដល់ទៅ ៨០០ ដុល្លារក្នុងមួយម៉ែត្រការ៉េ។​ តម្លៃ​នេះគឺអាស្រ័យលើសក្តានុពលទីតាំងដី​ក្នុងសង្កាត់នីមួយៗ។

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង