គម្រោងក្រុងរណបធំៗពីរកំពុងក្លាយជាកម្លាំងជំរុញការវិនិយោគនៅខណ្ឌជ្រោយចង្វារ

Bunthoeun Chhut 01/July/2021 17:36

ចែករំលែក

គម្រោងអភិវឌ្ឍន៍ទីក្រុងរណបធំៗចំំនួនពីរក្នុងខណ្ឌជ្រោយចង្វារកំពុងក្លាយជាកត្តាជំរុញកំណើនវិនិយោគ និងសកម្មភាពពាណិជ្ជកម្មផ្សេងៗ ដែលជួយបង្កើនតម្លៃអចលនទ្រព្យនៅតំបន់ជុំវិញក្រុងរណបថ្មីក្នុងខណ្ឌនេះ។ នេះបើតាមអ្នកឯកទេសដីធ្លីប្រចាំខណ្ឌជ្រោយចង្វារ។

លោក ម៉ែន វិជ្ជាការ ប្រធានសាខាក្រុមហ៊ុន Century 21 Zillion Holding ប្រចាំខណ្ឌជ្រោយចង្វារ បានឱ្យដឹងថា វត្តមាននៃការអភិវឌ្ឍក្រុងរណបពីរគឺ ក្រុងរណបជ្រោយចង្វារ និងគម្រោងក្រុងរណប Garden City បានបង្កើតឱ្យមានហេដ្ឋារចនាសម្ព័ន្ធផ្លូវថ្នល់ជាច្រើនដែលបង្កភាពងាយស្រួលក្នុងការធ្វើដំណើរ និងការប្រកអាជីវកម្ម។

លោកបញ្ជាក់ថា កត្តានេះបានបង្កើតនូវសក្តានុពលធំមួយក្នុងការទាក់ទាញគម្រោងលំនៅដ្ឋានជាច្រើន ដែលបច្ចុប្បន្នខណ្ឌជ្រោយចង្វារមានបុរីលំនៅដ្ឋានបែបស្តង់ដារជាង ២០ គម្រោង។

លោក វិជ្ជាការ បានបន្ថែមថា៖ «វត្តមានក្រុងរណបទាំងពីរនេះនឹងជះឥទ្ធិពលក្នុងការបង្កើនតម្លៃអចលនទ្រព្យនៅតំបន់ក្បែរៗគម្រោងក្រុងរណប ជាពិសេសក្រុមហ៊ុនអភិវឌ្ឍន៍គម្រោងបុរីលំនៅដ្ឋាន អគារខុនដូ ឬអគារការិយាល័យក្តី មានឱកាសខ្ពស់ក្នុងការលក់គម្រោងរបស់ពួកគេឆាប់រហ័ស ព្រោះក្រុងរណបជាបណ្តុំសេវាកម្ម និងពាណិជ្ជកម្ម ហើយមានហេដ្ឋារចនាសម្ព័ន្ធច្រើនងាយស្រួលសម្រាប់ការធ្វើដំណើរ និងការរស់នៅ»។

ជ្រុងមួយនៃទីតាំងអភិវឌ្ឍន៍ក្រុងរណបជ្រោយចង្វារ របស់ក្រុមហ៊ុន OCIC

គម្រោងអភិវឌ្ឍន៍ក្រុងរណប«ទីក្រុងរណបជ្រោយចង្វារ» អភិវឌ្ឍន៍ដោយក្រុមហ៊ុនវិនិយោគទុនអាណិកជនកម្ពុជា ឬហៅកាត់ថា (OCIC) របស់អ្នកឧកញ៉ា ពុង ឃាវសែ។ គម្រោងក្រុងរណបនេះ កំពុងអភិវឌ្ឍន៍លើផ្ទៃដីប្រមាណ ៣៨៧ ហិកតា ដោយគ្រប់បណ្តប់លើ សង្កាត់ជ្រោយចង្វារ សង្កាត់ព្រែកលៀប និងសង្កាត់ព្រែកតាសេក នៃខណ្ឌជ្រោយចង្វារ។ ក្រុងរណបជ្រោយចង្វារនេះ នឹងមានការសាងសង់អគារពាណិជ្ជកម្មធំៗ ផ្សារទំនើប លំនៅដ្ឋាន អគារស្នាក់នៅរួម និង កន្លែងកំសាន្តជាដើម។ តាមការរំពឹងទុក គម្រោងដ៏ធំនេះគ្រោងបញ្ចប់ការសាងសង់នៅឆ្នាំ ២០២៦ ខាងមុខ។

ចំណែកឯទីក្រុងរណប Garden City អភិវឌ្ឍន៍ដោយក្រុមហ៊ុន LYP Group របស់អ្នកឧកញ៉ាលី យ៉ុងផាត់។ តាមផែនការមេរបស់ក្រុមហ៊ុន LYP Group ទីក្រុងរណបនេះអភិវឌ្ឍន៍លើផ្ទៃដីប្រមាណ១ពាន់ហិកតា ដែលបណ្តុំដោយតំបន់ពាណិជ្ជកម្ម លំនៅដ្ឋាន តំបន់កម្សាន្តនិងសម្រាកលម្ហែកាយ។ ទីតាំងគម្រោងក្រុងរណបនេះឆ្លងកាត់ផ្លូវជាតិលេខ ៥ និងផ្លូវជាតិលេខ ៦៕