លំហូរវិនិយោគពីបរទេសមកកម្ពុជារក្សាជំហរល្អជាងគេធៀបនឹងបណ្តាប្រទេសក្នុងតំបន់

ភ្នំពេញ៖ លំហូរវិនិយោគផ្ទាល់​ពីបរទេសមក​កម្ពុជា (FDIs) បង្ហាញពី​លំនឹងល្អកាលពីឆ្នាំ២០​២០ ដោយមានភាគ​រយធ្លាក់ចុះទាបជាងគេបង្អស់ធៀបនឹងលំហូរ​ FDIs នៅបណ្តាប្រទេសក្នុងតំបន់អាស៊ីអាគ្នេយ៍។​​ នេះបើតាមរបាយការណ៍វិនិយោគសកលប្រចាំឆ្នាំ២០២១របស់អង្គការសហប្រជាជាតិ។​

សន្និសីទអង្គការសហប្រជាជាតិស្តីពីពាណិជ្ជកម្មនិងការអភិវឌ្ឍ (UNCTAD) ចេញផ្សាយរបាយការណ៍ទាក់ទងនឹងការវិនិយោគសកលឆ្នាំ២០២១ កាលពីថ្ងៃច័ន្ទសប្តាហ៍មុន បានបង្ហាញថា​ FDIs ដែលចាក់បញ្ជូលទៅក្នុងសេដ្ឋកិច្ចកម្ពុជាមានទុនវិនិយោគប្រមាណ ៣,៦ ពាន់លានដុល្លារអាមេរិក ធ្លាក់ចុះ (-១) ភាគរយធៀបនឹងឆ្នាំ២០១៩។

របាយការណ៍បញ្ជាក់ថា៖ «ការវិនិយោគលើវិស័យហិរញ្ញវត្ថុមានចំណែកធំ ដែលបានជួយទប់លំនឹងពីការធ្លាក់ចុះយ៉ាងគំហុកនៃ FDIs នៅកម្ពុជា ព្រោះការវិនិយោគក្នុងវិស័យហិរញ្ញវត្ថុនេះមានទុនវិនិយោគដល់ទៅ ១,៤ ពាន់លានដុល្លារ កើន១៣ ភាគរយ​ធៀបនឹងឆ្នាំ២០១៩»។​

បើតាមរបាយការណ៍ ប្រទេស​សមាជិកអាស៊ានទាំង១០ បូកនឹងប្រទេសទីម័រខាងកើត ទទួលបាន​ទុនវិនិយោគ FDIs សរុប ១៣៦ ពាន់ដុល្លារកាលពីឆ្នាំ ២០២០ គឹ​ធ្លាក់ចុះ ២៥ ភាគរយ។​ ប្រភពដដែលបញ្ជក់ថា សិង្ហបុរី, វៀតណាម និងប្រទេសឥណ្ឌូនេស៊ី ជាប្រទេសដែលទទួលបាន FDIs ច្រើនជាងគេក្នុងតំបន់។ ប៉ុន្តែ ទំហំ FDIs មានការ​ធ្លាក់ចុះធៀបនឹងឆ្នាំ២០១៩។

ក្នុងឆ្នាំ២០២០ ប្រទេសវៀតណាមទទួលបានទុនវិនិយោគពី FDIs មានប្រមាណ ១៦ ពាន់លានដុល្លារ ធ្លាក់ចុះ(-២) ភាគរយ ស្របពេលដែលFDIs នៅក្នុងប្រទេសថៃ និងម៉ាឡេស៊ី​ ធ្លាក់ចុះយ៉ាងគំហុកក្នុងរង្វង់ជាង (-៥០)ភាគរយ ។ (មើលតារាងទិន្ន័យ FDIs ប្រទេសមួយចំនួននៅអាស៊ាន)

ក្រុមអ្ន្នកជំនាញ UNCTAD បានបញ្ជាក់នៅក្នុងរបាយការណ៍នេះថា បញ្ហាជំងឺ១៩ បានបង្កើតឱ្យមានវិធានការបិទខ្ទប់,ភាពរអាក់រអួលនៃការផ្គត់ផ្គង់ចង្វាក់ផលិតកម្ម, ការធ្លាក់ចុះនៃចំណូលរបស់ក្រុមហ៊ុនសាជីវកម្ម, ភាពមិនច្បាស់លាស់នៃសេដ្ឋកិច្ច និងការពន្យាផែនការវិនិយោគ ដែលទាំងអស់នេះសុទ្ធតែជាបញ្ហាចម្បងធ្វើឱ្យ FDIs មានការធ្លាក់ចុះ។​

ក៏ប៉ុន្តែអ្នកជំនាញរបស់ UNCTAD មើលឃើញថា FDIs នៅក្នុងតំបន់នេះអាចនឹងមានកំណើនល្អវិញ ដោយអាស្រ័យលើចំណាត់ការ និងការគ្រប់គ្រង​រលកថ្មីនៃជំងឺកូវីដ១៩ ក្នុងឆ្នាំ២០២១។ បន្ថែមពីនេះ កំណើនសេដ្ឋកិច្ចដែលបង្ហាញពីភាពល្អប្រសើរទាំងក្នុងតំបន់ និងពិភពលោកក្នុងឆ្នាំ២០២១ ព្រមទាំងវិធានការបញេ្ចញកញ្ចប់ថវិការជំរុញកំណើនសេដ្ឋកិច្ច​របស់ប្រទេសសមាជិកអាស៊ាន ជាកត្តាដែលនឹងជំរុញការវិនិយោគក្នុងតំបន់នេះផងដែរ៕