ខណ្ឌពីរនេះនឹងទទួលផលប្រយោជន៍ច្រើនជាងគេពីគម្រោងផ្សារទំនើបធំៗនៅតំបន់ផ្លូវ៦០ ម៉ែត្រ

គម្រោងផ្សារទំនើបធំៗ​តាមបណ្តោយវិថីសម្តេចហ៊ុន សែន ដែលនឹងដាក់ឲ្យដំណើរការនាពេល​ខាងមុខ នឹងបង្កើន​សក្តានុពលដីធ្លីក្នុង​​ខណ្ឌមានជ័យ និងខណ្ឌដង្កោ មួយកម្រិតទៀត ស្របពេល​តំបន់នេះកំពុងមានកំណើន​​គម្រោង​លំនៅដ្ឋាន និងអគារពាណិជ្ជកម្មស្រាប់។

គម្រោងធំៗ​ទាំងនេះកំពុងអភិវឌ្ឍន៍ក្នុងតំបន់មហាវិថីសម្តេចហ៊ុន សែន ឬផ្លូវ ៦០ម៉ែត្រដែលបាន បើកឱ្យចរាចរណ៍កាលពីខែ មេសា ឆ្នាំ ២០១៧  ដោយ​ឆ្លងកាត់​សង្កាត់​ចំនួន​បី គឺ​សង្កាត់​ចាក់អង្រែលើ និង​ចាក់អង្រែ​ក្រោម​ក្នុង​ខណ្ឌមានជ័យ និង​សង្កាត់​ជើងឯក​ក្នុង​ខណ្ឌដង្កោ។ ខាងក្រោមនេះជាផ្សារទំនើបធំៗបី នឹងត្រៀមបើកដំណើរក្នុងតំបន់ផ្លូវ ៦០ម៉ែត្រនាពេលខាងមុខ៖

[ បម្រែបម្រួលទីផ្សារដីធ្លីផ្លូវ៦០ម៉ែត្រ ៣ឆ្នាំមុន និងក្រោយការសាងសង់ផ្សារទំនើប AEON III ]

ផ្សារទំនើប AEON Mall Mean Chey 

គម្រោងអភិវឌ្ឍន៍ផ្សារទំនើប AEON Mall III ឬផ្សារទំនើប AEON Mall Mean Chey មានទីតាំងស្ថិតនៅចាក់អង្រែក្រោម តាមបណ្តោយមហាវិថីសម្តេចហ៊ុន សែន (ឬផ្លូវ៦០ម៉ែត្រ)។ ផ្សារទំនើបរបស់ក្រុមហ៊ុនជប៉ុននេះ បានបើកការដ្ឋានសាងសង់កាលពីខែតុលា ឆ្នាំ២០២០ ហើយរំពឹងបើកដំណើរការនៅឆ្នាំ២០២២ ។

ផ្សារ​ទំនើបនេះគ្របដណ្តប់លើទំ​ហំផ្ទៃ​ដី 174,000 ម៉ែ​ត្រការ៉េ ដែលទំហំនេះធំជាងផ្សារទំនើបអ៊ីអនម៉លទី១ ពីរដង (68,000 ម៉ែត្រការ៉េ បើកដំណើរការឆ្នាំ២០១៤) និងធំជាងផ្សារទំនើបអ៊ីអនម៉ល សែន សុខ បន្តិច (151,000​ម៉ែត្រការ៉េ)។ តាមការបញ្ជាក់ពីក្រុមហ៊ុន ផ្សារទំនើប AEON Mall III នឹងក្លាយជាផ្សារទំនើបធំជាងគេ ធៀបនឹងផ្សារ AEON Mall នៅក្នុងតំបន់អាស៊ាន។

តារាងផ្សារទំនើប AEON Mall នៅប្រទេសក្នុងតំបន់អាសា៊ន។ ប្រភពទិន្ន័យ៖ Aeon Mall

ផ្សារ​ទំនើប Chipmong 271 Mega Mall

ផ្សារទំនើបនេះអភិវឌ្ឍន៍ដោយក្រុមហ៊ុនក្នុងស្រុក Chip Mong Group ស្ថិតតាមបណ្តោយផ្លូវ ២៧១ ដែលតភ្ជាប់ជាមួយនឹងផ្លូវ ៦០ ម៉ែត្រ។ ផ្សារទំនើប Chipmong 271 Megamall មានទំហំផ្ទៃក្រឡា ១៥០ ០០០ ម៉ែត្រការ៉េ ជា​ផ្នែកមួយនៃគម្រោងបុរី Landmark 271 របស់ក្រុមហ៊ុន Chip Mong ដែលមានផ្ទៃដីអភិវឌ្ឍន៍សរុប​ ៤៣ ហិកតា។ តាមការគ្រោង​ទុកផ្សារទំនើប នឹងបើកដំណើរការដំណាលគ្នាជាមួយនឹងផ្សារ AEON Mall III ក្នុងឆ្នាំ២០២២។

ផ្សារ​ទំនើប PH Diamond Place Mall

ផ្សារទំនើបនេះអភិវឌ្ឍន៍ដោយក្រុមហ៊ុន Peng Huouth ដែលជាក្រុមហ៊ុនក្នុងស្រុកល្បីឈ្មោះមួយ​ផងដែរក្នុងការអភិវឌ្ឍន៍បុរីលំនៅដ្ឋាន។ ផ្សារទំនើប PH Diamond Place Mall ស្ថិតនៅក្នុងគម្រោងអភិវឌ្ឍន៍ចម្រុះរបស់ក្រុមហ៊ុនមានឈ្មោះថា The Star Diamond ដែលមានផ្ទៃដីប្រមាណ ៤០ ហិកតា។​ ក្នុងនោះផ្សារទំនើប PH Diamond Place Mall មានផ្ទៃក្រឡាប្រមាណ ៦ម៉ឺនម៉ែត្រការ៉េ។​

អ្នកឯកទេសខាងវិស័យដីធ្លីរបស់ក្រុមហ៊ុន Century 21 Zillion Holding ប្រចាំខណ្ឌទាំងពីរខាងលើ បានបញ្ជាក់ថា ការអភិវឌ្ឍផ្សារ​ទំនើបទាំងនេះ រួមទាំងគម្រោងអភិវឌ្ឍន៍ជាច្រើនផ្សេងទៀត នឹង​ជួយ​អភិវឌ្ឍន៍ប៉ែ​កខាងត្បូងនៃរាជធានីភ្នំពេញឱ្យកាន់លេចធ្លោ ហើយថែមទាំងបង្កើន​សក្តានុពលវិនិយោគលើវិស័យអចលនទ្រព្យផងដែរ។

រូបភាពគំរូនៃផ្សារ​ទំនើប PH Diamond Place Mall