អង្គការសហគ្រិនអន្តរជាតិប្រចាំកម្ពុជាបង្កើតឱកាស និងដៃគូពាណិជ្ជកម្មកម្រិតអន្តរជាតិ

ហ៊ គីមសាយ 15/June/2021 19:18
ទស្សនា
ចែករំលែក

ភ្នំពេញ៖ អង្គការសហគ្រិន​​​អន្តរ​ជាតិប្រចាំកម្ពុជា EO Cambodia ​នៅថ្ងៃអង្គារ៍នេះ​បានផ្សព្វផ្សាយ​កម្មវិធីសហគ្រិនភាព​របស់ខ្លួនដោយ​លើកយក​ប្រធានបទ «ឱកាសសម្រាប់សហគ្រិនកម្ពុជាពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP)» មកពិភាក្សាតាមរយៈការពន្យល់បកស្រាយពីឯកឧត្តមបណ្ឌិត សុក ស៊ីផាណា។

សិក្ខាសាលានេះក៏មានការចូលរួមពីសមាជិក EO Cambodia និងពាណិជ្ជករសក្តានុពលជាច្រើនរូប ព្រមទាំងមានការចែក​​​រំលែកបទពិសោធន៍ជាក់ស្តែង​​​​ពីសារៈសំខាន់នៃការក្លាយខ្លួនជាសមាជិករបស់ EO ផងដែរ។

ឯកឧត្តមបណ្ឌិត សុក ស៊ីផាណា ជាស្ថាបនិក SokSiphana&associates និងជាទីប្រឹក្សាជាន់ខ្ពស់រដ្ឋាភិបាលកម្ពុជា បានថ្លែងនៅក្នុងសិក្ខាសាលាថា ពាណិជ្ជករកម្ពុជាដែលចូលរួមជាសមាជិករបស់ EO Cambodia នឹងមានឱកាសរីកចម្រើនពីកិច្ចព្រមព្រៀង RCEP ដោយសារ​ហេតុផលសំខាន់៣ គឺ​ទី១ភាពខ្លាំងនៃ​ធនធានមនុស្ស ទី២ ការ​មានបទពិសោធន៍គ្រប់គ្រាន់ និងទី៣ បណ្តាញដ៏ធំទូលាយជាមួយពាណិជ្ជករធំៗ។

យោងតាមឯកឧត្តមបណ្ឌិត សុក ស៊ីផាណា, កិច្ចព្រមព្រៀង RCEP នឹងមិនយកពន្ធគយលើ​មុខទំនិញដល់ទៅ ៩២ ភាគរយ ព្រមទាំងបើកទីផ្សារសម្រាប់ពាណិជ្ជកម្មសេវាកម្មដល់ទៅ ៦៥ ភាគរយ ដើម្បីសម្របសម្រួល និងជំរុញការ​ធ្វើពាណិជ្ជកម្ម និងការវិនិយោគនៅក្នុងតំបន់។

 ស្ថាបនិក SokSiphana&associates និងជាទីប្រឹក្សាជាន់ខ្ពស់រដ្ឋាភិបាលកម្ពុជា

ឯកឧត្តមថ្លែងថា៖​«ឱកាសល្អមួយដែលកម្ពុជានឹងទទួលបានប្រយោជន៍​នៅពេលដែល RCEP ចូលជាធរមាន គឺ​យើងនឹងទទួលបានគម្រោង​វិនិយោគពី​ក្រៅប្រទេសកាន់តែច្រើនឡើង»។ ឯកឧត្តម​បញ្ជាក់ថា៖«​ទាក់ទងនឹងផ្នែក​វិស័យសេវាកម្មវិញ ខ្ញុំរំពឹងថាក្រុមហ៊ុនជប៉ុនកាន់តែច្រើនឡើងនឹងមកកម្ពុជា សម្លឹងមើលឱកាសទិញភាគហ៊ុនចូលវិនិយោគក្នុងវិស័យសេវាកម្មនេះ​​»។

ឯកឧត្តមបណ្ឌិតបញ្ជាក់ថា កិច្ចព្រមព្រៀង RCEP នឹងផ្តល់ដល់ក្រុមហ៊ុនកម្ពុជា និងពាណិជ្ជករកម្ពុជានូវឱកាសពាណិជ្ជកម្ម និងភាពជាដៃគូកាន់តែច្រើន​ ដែលអាចឲ្យពាណិជ្ជករកម្ពុជាចូលរួមក្នុងខ្សែចង្វាក់ថ្មីនៅក្នុងតំបន់ព្រមទាំងបង្កើនការវិនិយោគបរទេសនៅកម្ពុជាផងដែរ។ RCEP មានប្រទេសជាសមាជិកសរុបចំនួន ១៥ ប្រទេស ដែលរួមមានសមាជិកអាស៊ានទាំង ១០ ប្រទេស និងប្រទេស​ជាដៃគូអាស៊ាន​៥ទៀត​គឺចិន អូស្ត្រាលី ជប៉ុន ណូវែលសេឡង់ និងកូរ៉េខាងត្បូង។

[អ្វីដែលអ្នកគួរដឹងពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP)?]

កិច្ចព្រមព្រៀងពាណិជ្ជកម្ម​សេរីជាលក្ខណៈតំបន់ដូចជា RCEP នេះនឹងធ្វើឲ្យភាពជាសមាជិករបស់ពាណិជ្ជករកម្ពុជាជាមួយបណ្តាញអ្នកជំនួញធំៗដូចជា EO កាន់តែមានសារៈសំខាន់។

លោក Hanky Lee សមាជិក EO ប្រចាំប្រទេសហ្វ៊ីលីពីន (EO Philippines) បានលើកឡើងថាភាពជាសមាជិករបស់បណ្តាញអ្នកជំនួញដ៏ធំនេះបានជួយអាជីវកម្មរបស់លោកយ៉ាងច្រើន ដោយលោក​មានឱកាសចូលរួមវេទិកាធំៗ សិក្ខាសាលាអភិវឌ្ឍន៍ខ្លួនទាំងក្នុងប្រទេសនិងអន្តរជាតិ កម្មវិធីអប់រំ​ជាយុទ្ធសាស្រ្តសម្រាប់បុគ្គល​ជា​ថ្នាក់ដឹកនាំ និងការភ្ជាប់ទំនាក់ទំនងជាមួយ​សមាជិកដែលមានចំណាប់អារម្មណ៍ដូចគ្នា។

លោក Hanky Lee សមាជិក EO ប្រចាំប្រទេសហ្វ៊ីលីពីន

លោកថ្លែងថា៖«ចំណុចទាំងនេះគឺជាអ្វីដែល EO បានជួយឲ្យ​ខ្ញុំមើលឃើញពីឱកាសជុំវិញដើម្បីរីកចម្រើន ហើយទស្សនៈរបស់ខ្ញុំគឺថាខ្ញុំត្រូវចាប់យកឱកាសទាំងនោះ។ ដោយហេតុដូច្នេះហើយ សម្រាប់ខ្ញុំការចូលរួមជាមួយ EO គឺជាកាដូរ​ដ៏ធំ។ ខ្ញុំ​គិតថា អ្នកទាំងអស់គ្នាក៏អាចទទួលបានកាដូរនេះដែរ ដោយគ្រាន់តែអ្នកចូលជាសមាជិករបស់ EO»។

លោក គុយ វ៉ាត ប្រធាន EO Cambodia

លោក គុយ វ៉ាត ប្រធាន EO Cambodia បានលើកឡើង​នៅក្នុងពិធីបិទសិក្ខាសាលាស្តីពី «ឱកាសសម្រាប់សហគ្រិនកម្ពុជាពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP)» ដោយរំឭកពីសារៈសំខាន់នៃការចែករំលែករបស់អ្នកជំនាញដូចជាឯកឧត្តមបណ្ឌិត សុក ស៊ីផាណា ហើយបញ្ជាក់ថាសមាជិក EO Cambodia នឹងខិតខំសហការនិងពង្រឹងបណ្តាញទំនាក់ទំនងដើម្បីចាប់យកប្រយោជន៍ឲ្យបានកាន់តែច្រើនពីកិច្ចព្រមព្រៀង RCEP ដើម្បីជំរុញកំណើនវិស័យឯកជន និងសេដ្ឋកិច្ចកម្ពុជា។

EO គឺ​​​ជា​បណ្តាញ​នៃ​ក្រុម​អ្នក​ជំនួញ​ធំ​ៗ​​លើ​ពិភព​លោក ដែល​ត្រូវ​បាន​​​បង្កើត​ឡើង​នៅ​សហរដ្ឋ​អាមេរិក​ក្នុង​​​ឆ្នាំ ​១៩៨៧ ហើយ​ស្ថា​ប័ន​នេះ​​កំពុង​មាន​វត្តមាន​​​ក្នុង​ប្រទេស​ចំនួន​ ៦១ ទូទាំង​ពិភព​លោក​​​ ដោយ​បច្ចុប្បន្ន​មាន​​ម្ចាស់​អាជីវកម្ម​​ និង​វិនិយោគិន​​ជាង​ ១៤ ០០០ ​នាក់​ទូទាំង​ពិភព​លោក​ជា​សមាជិក​។​ EO Cambodia ត្រូវ​បាន​បើក​ដំណើរ​ការ​ជា​ផ្លូវ​ការ​កាល​ពី​ថ្ងៃ​ទី ១៨ ខែកញ្ញា ឆ្នាំ ២០១៩ ដោយ​មាន​សមាជិក​ស្ថាបនិក​ជាម្ចាស់​អាជីវ​កម្ម​ធំ​ៗ​​ និង​ថ្នាក់​ដឹក​នាំ​ស្ថាប័ន​អាជីវ​កម្មធំ​ៗ​ប្រ​​ចាំ​កម្ពុជា៕

សម្រាប់ព័ត៌មានបន្ថែមទាក់ទងនឹងភាពជាសមាជិក EO Cambodia សូមទាក់ទង៖

កញ្ញា Thul Sreyta ប្រធានរដ្ឋបាល EO Cambodia

Tel: 085 768 889

Mr. Om Pharin, incoming President’s EO Cambodia

Mr. Siet Sisopheak, Membership Chair of EO Cambodia

 Mr.Heng Chamroeun, Forum Chair of EO Cambodia

Mr. Takeshi Izuka, GSEA Champions of EO Cambodia

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង