បម្រែបម្រួលទីផ្សារដីធ្លីតាមផ្លូវក្រវ៉ាត់ក្រុងទី៣មុនពេលសាងសង់ និងពេលបច្ចុប្បន្ន

ប៊ុនធឿន 11/June/2021 19:06
ទស្សនា
ចែករំលែក

ដីធ្លីតាមបណ្តោយផ្លូវក្រវ៉ាត់ក្រុងទី៣ (គិតតែទីតាំងឆ្លងកាត់ខេត្តកណ្តាល) មានតម្លៃ​កើនឡើងយ៉ាងខ្លាំង​គិតមកទល់ពេលនេះ ​ធៀបនឹង​កាលពីចុងឆ្នាំ២០១៨​​ដែលផ្លូវក្រវ៉ាត់ក្រុងនេះមិនទាន់​ចាប់ផ្តើមសាងសង់។ នេះបើតាមអ្នកជំនាញទីផ្សារដីធ្លី។

ផ្លូវក្រវ៉ាត់ក្រុងទី៣ មានប្រវែងប្រមាណ ៥៣ គីឡូម៉ែត្រ ដោយ​ឆ្លងកាត់រាជធានីភ្នំពេញប្រវែង ១៥ គីឡូម៉ែត្រ និងភូមិសាស្រ្តខេត្តកណ្តាល ៣៨ គីឡូម៉ែត្រ។​ គម្រោងអភិវឌ្ឍន៍ផ្លូវក្រវ៉ាត់ក្រុងទី ៣ បានបើកការដ្ឋានសាងសង់កាលពីខែមករា ឆ្នាំ២០១៩ ហើយគិតមកទល់ពេលនេះសម្រេចបានប្រមាណ ៥០ ភាគរយហើយ។

លោក ស៊ូ ប៊ុនសុង ប្រធានសាខាក្រុមហ៊ុន Century 21 Zillion Holding ប្រចាំខេត្តកណ្តាល ដែលចុះស្រាវជ្រាវទីផ្សារដីធ្លីតាមបណ្តោយផ្លូវក្រវ៉ាត់ក្រុងទី៣ ក្នុងភូមិសាស្រ្តខេត្តនេះ បានឱ្យដឹងថា ផ្លូវក្រវ៉ាត់ក្រុងទី៣ បានអភិវឌ្ឍន៍ដោយឆ្លងកាត់ផ្នែកសំខាន់ៗជាច្រើននៃភូមិសាស្រ្តខេត្តកណ្តាលរួមមានដូចជា ឃុំជើងកើប ក្នុងស្រុកកណ្តាលស្ទឹង, សង្កាត់សង្កាត់ព្រែកហូ និង​សង្កាត់​ស្វាយរលំ ក្នុងក្រុងតាខ្មៅ។

លោក ស៊ូ ប៊ុនសុង ប្រធានសាខាក្រុមហ៊ុន Century 21 Zillion Holding ប្រចាំខេត្តកណ្តាល

លោកបញ្ជាក់ថា ដីនៅតាម​តំបន់ខាងលើ មានតម្លៃដាក់​លក់ជាមធ្យម ២០ ដុល្លារ​ក្នុងមួយម៉ែត្រការ៉េកាលពីអំឡុងចុងឆ្នាំ ២០១៨ តែគិតមកទល់ពេលនេះ តម្លៃដីដាក់លក់នៅទីតាំងដដែល​បានកើនដល់ជាមធ្យមចន្លោះពី ២៥០ ទៅ៣០០ ដុល្លារ​ក្នុងមួយម៉ែត្រការ៉េ។ (តម្លៃដីនេះគឺសម្រាប់តែទីតាំងដីដែលជាប់នឹងផ្លូវក្រវ៉ាត់ក្រុងទី៣)។

ដូចដែលបានបញ្ជាក់ខាងលើ គម្រោងអភិវឌ្ឍន៍ផ្លូវក្រវ៉ាត់ក្រុង​ទី៣នេះ មានប្រវែងប្រមាណ ៥៣ គីឡូម៉ែត្រ ដែលឆ្លងកាត់រាជធានីភ្នំពេញប្រវែង ១៥ គីឡូម៉ែត្រ និងភូមិសាស្រ្តខេត្តកណ្តាល ៣៨ គីឡូម៉ែត្រ។ ការអភិវឌ្ឍន៍គម្រោងនេះ ចាប់ផ្តើមពីចំនុចផ្លូវជាតិលេខ ៤ (ឆ្លងកាត់ផ្លូវជាតិលេខ ៣ ផ្លូវជាតិលេខ ២ ផ្លូវជាតិលេខ ២១ ផ្លូវជាតិលេខ ២១A និងផ្លូវលេខ ១១០) ឆ្ពោះទៅផ្លូវជាតិលេខ ១ ក្នុងស្រុកកៀនស្វាយ (ឃុំឈើទាល និងឃុំដីឥដ្ឋ) ខេត្តកណ្តាល។

បើតាមលោក ប៊ុនសុង តម្លៃដីក្នុងឃុំឈើទាល និងឃុំដីឥដ្ឋ ដែលឆ្លងកាត់ផ្លូវក្រវ៉ាត់ក្រុងទី៣ ក្នុងស្រុកកៀនស្វាយនេះ មានតម្លៃដីដាក់លក់ចន្លោះពី ១៥០ ទៅ ២០០ ដុល្លារក្នុងមួយម៉ែត្រការ៉េ៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង