អ្វីទៅជាការកំណត់តម្លៃអចលនទ្រព្យតាម CMA?

ប៊ុនធឿន 08/June/2021 18:13
ទស្សនា
ចែករំលែក

មុនពេលដែលភ្នាក់ងារអចលនទ្រព្យអាជីពទទួលយកទ្រព្យណាមួយមកដាក់លក់ ការងារចំាបាច់ដំបូងគេដែលពួកគាត់ចរចាជាមួយម្ចាស់ទ្រព្យគឺការកំណត់ថ្លៃលក់។ ជាទូទៅ ​អ្នកជំនាញអចលនទ្រព្យ​តែង​អនុវត្តន៍តាម​វិធីសាស្រ្ត​ស្តង់ដារ ៣ ដើម្បីកំណត់ថ្លៃដែល​រួមមានដូចជា​ កំណត់ថ្លៃដោយ​ការប្រៀបធៀបតម្លៃទីផ្សារ​ (CMA), វិធីសាស្រ្តថ្លៃដើម, និងវីធីសាស្រ្តប្រាក់ចំណូល។

ក្នុងចំណោម​វិធីសាស្រ្តទាំងបី CMA ជាវិធីសាស្រ្តដែលពេញនិយមជាងគេមួយក្នុងចំណោមភ្នាក់ងារអចលនទ្រព្យអាជីព។ អ្វីទៅជា CMA?

យោងតាម​សៀវភៅ «ការវិនិយោគអចលនទ្រព្យ (Real Estate Investing)» ដែលជាការនិពន្ធរួមគ្នាពី​លោក Eric Tyson និងលោក Robert S.Grisworld, CMA គឺជាវីធីសាស្រ្តដែលគេ (ភ្នាក់ងារអចលនទ្រព្យ ឬក្រុមហ៊ុនវាយតម្លៃ) ប្រើប្រាស់ដើម្បីប៉ាន់ប្រមាណពីតម្លៃអចលនទ្រព្យដាក់​ដាក់​លក់​ ដោយផ្អែកលើអចលនទ្រព្យទើបសម្រេចការលក់បានថ្មីៗ ហើយអចលនទ្រព្យនោះមានលក្ខណៈប្រហាក់ប្រហែលគ្នាដូចជា​ ទំហំ រូបរាង និងមានទីតាំងក្បែរៗគ្នាស្ថិតក្នុងតំបន់តែមួយ។

[តិចនិកដូចគ្នាមួយ​ដែលភ្នាក់ងារអចលនទ្រព្យអាជីពតែងអនុវត្តន៍ដើម្បី​សម្រេចការលក់]

តាមអ្នកជំនាញខាងលើ ជាទូទៅគេជ្រើសយកអចលនទ្រព្យប្រហាក់ប្រហែល និងមានទីតាំងក្បែរៗគ្នា យ៉ាងហោចណាស់ចំនួនបីអចលនទ្រព្យឡើងទៅ ដើម្បីធ្វើការ​​ប្រៀបធៀប​ក្នុងការកំណត់តម្លៃលក់។

ខាងក្រោមនេះគឺជាបទពិសោធន៍ជាក់ស្តែងរបស់ភ្នាក់ងារអចលនទ្រព្យដែលជាប្រធានសាខាប្រចាំតំបន់របស់ក្រុមហ៊ុន Century 21 Zillion Holding ដែលពួកគាត់តែងតែអនុវត្តន៍ និងប្រើប្រាស់វីធីសាស្រ្ត CMA នេះជាជំហានបឋមក្នុងការស្នើដាក់តម្លៃលក់ដល់ម្ចាស់ទ្រព្យ​។

លោក ធាង វ៉ាន់ដា ប្រធានសាខាក្រុមហ៊ុន Century 21 Zillion Holding ប្រចាំខណ្ឌសែនសុខ បាន​បញ្ជាក់ថា លោកតែងជ្រើសរើសអចលនទ្រព្យ ៣ ទៅ​៥កន្លែង ដែលមានទំហំប្រហាក់ប្រហែលគ្នា និងស្ថិតលើទីតាំងតែមួយ ហើយអចលនទ្រព្យនោះត្រូវបានលក់ចេញក្នុងរយៈពេលយ៉ាងហោចណាស់ ៦ខែចុះក្រោម ដើម្បីធ្វើការប្រៀបធៀបតាម CMA។  ​

លោក ធាង វ៉ាន់ដា ប្រធានសាខាក្រុមហ៊ុន Century 21 Zillion Holding ប្រចាំខណ្ឌសែនសុខ

លោកថ្លែថា៖ «ជាឧទារហ៍ជាក់ស្តែង ដីដាក់លក់មួយកន្លែងនៅតាមបណ្តោយផ្លូវ ១៩៨២ ដែលតម្លៃទីផ្សារដីធ្លីក្នុងតំបន់នេះ ជាទូទៅមានតម្លៃចន្លោះពី ១​ ១០០ ទៅ ១ ៣០០ ដុល្លារ​ក្នុងមួយម៉ែត្រការ៉េ។ ក៏ប៉ុន្តែ​ម្ចាស់ទ្រព្យគាត់ដាក់លក់ក្នុងតម្លៃ​ ១ ៥០០ ដុល្លារក្នុងមួយម៉ែត្រការ៉េ។ ហើយតាមការប្រៀបធៀប CMA យើងរកឃើញថាតម្លៃដីរបស់ភ្ញៀវដែលគាត់ដាក់លក់ហ្នឹងអាចលក់បាន​ក្នុងតម្លៃ​ជាមធ្យម​ ១ ២០០ ដុល្លារក្នុងមួយម៉ែត្រការ៉េ»។

[៤ យ៉ាងគួរដឹងពីសារៈសំខាន់នៃការតភ្ជាប់សេវាវាយតម្លៃអចលនទ្រព្យ និងប្រព័ន្ធវាយតម្លៃឥណទាន ]

អ្នកនាង ម៉ាន់ កណិកា ប្រធានសាខាក្រុមហ៊ុន Century 21 Zillion Holding ប្រចាំខណ្ឌដង្កោ បាន​ឱ្យដឹងថា អ្នកនាង​តែងចុះស្រាវជ្រាវដោយផ្ទាល់នឹងប្រឹក្សាយោបល់ជាមួយម្ចាស់ទ្រព្យ​តាម​ការ​​ប្រៀបធៀបតម្លៃ​ទីផ្សារ CMA មុននឹងឈានដល់ការកំណត់ថ្លៃលក់។

តាមបទពិសោធន៍អនុវត្តន៍នាពេលកន្លង អ្នកនាងកណិការ បានបញ្ជាក់ថា អ្នកនាងតែងតែជ្រើសរើសអចលនទ្រព្យក្នុងតំបន់តែមួយឲ្យបាន ៣ ទៅ​៥កន្លែង ដែលបានលក់ចេញចន្លោះពី៣ ទៅ៦ខែមុន ដើម្បីជាមូលដ្ឋានក្នុងការប្រៀបធៀប និងវិភាគតម្លៃទីផ្សារ។

អ្នកនាងថ្លែងថា៖ «​ចុះទៅតំបន់ជុំវិញដីរបស់គាត់ដោយសាកសួរផ្ទាល់ពីប្រជាជន ឬអាជ្ញាធរនៅតំបន់ហ្នឹង ដើម្បីអាចដឹងពីតម្លៃដែលគេដាក់លក់ចេញនៅជិតដីនោះ។​ អញ្ចឹងតាមរយៈនេះ យើងជ្រើសរើសទីតាំងដីធ្លី ចន្លោះពី៣ទៅ៥កន្លែង ដែលត្រូវបានលក់ចេញក្នុងរយៈពេល ៣ ទៅ ៦ ខែមុន ដើម្បីធ្វើការប្រៀបធៀប។ វិធីសាស្រ្តនេះអាចធ្វើឱ្យយើងដឹង​ពីតម្លៃថាដីដែលភ្ញៀវគាត់ដាក់លក់ហ្នឹង ទាបជាង ឬខ្ពស់ជាងទីផ្សារ​»៕

ការវាយតម្លៃពីភ្នាក់ងារអាជីពគឺជាការវាយតម្លៃសម្រាប់ជាមូលដ្ឋានបឋមមួយប៉ុណ្ណោះ។ ដើម្បីបានតម្លៃត្រឹមត្រូវនិងអព្យាក្រឹត្យ ភ្នាក់ងារអចលនទ្រព្យអាជីពខាងលើតែងពឹងលើការវាយតម្លៃអចលនទ្រព្យពីក្រុមហ៊ុនវាយតម្លៃអចលនទ្រព្យឯករាជ្យ ដែលជាទូទៅពួកគាត់ទុកចិត្តលើសេវាវាយតម្លៃពីក្រុមហ៊ុន VTrust Appraisal Co., Ltd ដែលទើបបង្កើតកម្មវិធីវាយតម្លៃតាមបច្ចេកវិទ្យាទំនើបមួយឈ្មោះថា Indication Plus។

អ្នកនាង ម៉ាន់ កណិកា ប្រធានសាខាក្រុមហ៊ុន Century 21 Zillion Holding ប្រចាំខណ្ឌដង្កោ

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង