កត្តាសំខាន់ៗ៤បង្ហាញពីចំណុចខ្លាំងនៃទីផ្សារអចលនទ្រព្យខណ្ឌជ្រោយចង្វារ

ខណ្ឌជ្រោយចង្វារបានក្លាយជាទីតាំងវិនិយោគដ៏លេចធ្លោមួយ ដោយសារ​ខណ្ឌនេះបណ្តុំដោយគម្រោងវិនិយោគធំៗ ដែលភាគច្រើនជាគម្រោងអភិវឌ្ឍន៍ពាណិជ្ជកម្ម និងលំនៅដ្ឋាន។​

កត្តាសំខាន់ៗទាំង ៤ ខាងក្រោមនេះបង្ហាញពីសក្តានុពលរបស់ខណ្ឌជ្រោយចង្វារ​ ដែលលោកអ្នកគួរស្វែងយល់ ដើម្បីចាប់យកឱកាសវិនិយោគអចលនទ្រព្យក្នុងខណ្ឌនេះ៖

1 – ក្រុងរណបធំៗពីរ

គម្រោងអភិវឌ្ឍន៍ក្រុងរណបទី១ មានឈ្មោះថា «ទីក្រុងរណបជ្រោយចង្វារ» អភិវឌ្ឍន៍ដោយក្រុមហ៊ុន​វិនិយោគទុន​​អាណិកជន​កម្ពុជា ឬហៅកាត់ថា (OCIC) របស់អ្នកឧកញ៉ា ពុង ឃាវសែ។ គម្រោងក្រុងរណបនេះ កំពុងអភិវឌ្ឍន៍លើផ្ទៃដីប្រមាណ ៣៨៧ ហិកតា ដោយគ្រប់បណ្តប់លើ សង្កាត់ជ្រោយចង្វារ សង្កាត់ព្រែកលៀប និងសង្កាត់ព្រែកតាសេក នៃខណ្ឌជ្រោយចង្វារ។ ក្រុងរណបជ្រោយចង្វារ មានទុនចុះបញ្ចីប្រមាណ ១ ៦០០ លានដុល្លារអាមេរិក ដែលនឹង​មាន​ការ​សាងសង់​អគារ​ពាណិជ្ជ​កម្ម​ធំៗ ផ្សារ​ទំនើប លំនៅដ្ឋាន​ អគារ​ស្នាក់​នៅ​រួម និង កន្លែងកំសាន្តជាដើម។ តាមការរំពឹងទុកគម្រោងដ៏ធំនេះ គ្រោងបញ្ចប់ការសាងសង់នៅឆ្នាំ ២០២៦ ខាងមុខ។

គម្រោងអភិវឌ្ឍន៍មួយទៀត ក៏កំពុងស្ថិតក្នុងដំណើរការសាងសង់ក្នុងខណ្ឌជ្រោយ​ចង្វារផងដែរ មានឈ្មោះថាទីក្រុងរណប Garden City អភិវឌ្ឍន៍ដោយក្រុមហ៊ុន LYP Group របស់អ្នកឧកញ៉ាលី យ៉ុងផាត់។ តាមផែនការមេរបស់ក្រុមហ៊ុន LYP Group ទីក្រុងរណបនេះអភិវឌ្ឍន៍លើផ្ទៃដីប្រមាណ១ពាន់ហិកតា ដែលបណ្តុំដោយតំបន់ពាណិជ្ជកម្ម លំនៅដ្ឋាន តំបន់កម្សាន្តនិងសម្រាកលម្ហែកាយ។ ទីតាំងគម្រោងក្រុងរណបនេះឆ្លងកាត់ផ្លូវជាតិលេខ ៥ និងផ្លូវជាតិលេខ ៦។

ប្លង់ 3D គំរូ របស់គម្រោងក្រុងរណប Garden City។ រូបភាព៖ LYP GROUP

2 – បណ្តុំដោយគម្រោងលំនៅដ្ឋានលំដាប់ខ្ពស់  

ក្រៅពីគម្រោងអភិវឌ្ឍន៍ក្រុងរណប ខណ្ឌជ្រោយចង្វារក៏ជាទីតាំងដ៏ទាក់ទាញ និងលេចធ្លោក្នុងចំណោមក្រុមហ៊ុនអភិវឌ្ឍន៍លំនៅឋានធំៗជាច្រើន។ បច្ចុប្បន្នខណ្ឌជ្រោយចង្វារមានគម្រោងបុរីលំនៅឋានចំនួន ២០ គម្រោង។ នេះបើតាមការសិក្សា​របស់លោក ម៉ែន វិជ្ជាការ ប្រធានសាខាក្រុមហ៊ុន Century 21 Zillion Holding ប្រចាំ​ខណ្ឌជ្រោយចង្វារ។

ក្នុងចំណោមគម្រោងសរុប លោក វិជ្ជាការ បានឲ្យដឹងថា​​មាន៣គម្រោង​​ ទើបប្រកាស​អភិវឌ្ឍន៍ក្នុងខណ្ឌមានដូចជាគម្រោង Chip Mong Park Land 6A, គម្រោង NADI និងគម្រោង Golden Park 6A។ ចំណែកខុនដូវិញ មានចំនួន ២០ គម្រោង​ ក្នុងនោះមាន ១២ គម្រោងបានបញ្ចប់ការសាងសង់រួចរាល់។

លោក ម៉ែន វិជ្ជាការ ប្រធានសាខាក្រុមហ៊ុន Century 21 Zillion Holding ប្រចាំ​ខណ្ឌជ្រោយចង្វារ។ រូបភាព៖ សហការី

3 – ទីតាំងភូមិសាស្រ្តពិសេសជាងគេ​៖ ខណ្ឌជ្រោយចង្វារមានអា​កាសធាតុល្អដោយសារមានទន្លេ២អមសងខាង និងមានការអភិ​​វឌ្ឍហេដ្ឋារចនាសម័ន្ធជាច្រើនដូចជា ស្ពាន និងផ្លូវធំៗខ្វាត់ខ្វែងជាច្រើន ដែលសម្រួលដល់ការធ្វើដំណើរចេញចូលពីខេត្តមក​រាជធានីភ្នំពេញ។ ផ្លូវជាតិលេខ ៦A ជាបណ្តាញគមនាគមន៍ដ៏សំខាន់​ក្នុងខណ្ឌជ្រោយចង្វារ ដែលតភ្ជាប់ជាមួយបណ្តាខេត្តសំខាន់ៗ​ដូចជាខេត្ត  កំពង់ចាម កំពង់ធំ និងសៀមរាប សម្រាប់ការដឹងជញ្ជូនទំនិញ និងការធ្វើពាណិជ្ជកម្មផ្សេងៗ។

4 – កត្តាប្រជាសាស្រ្ត

ខណ្ឌជ្រោយចង្វារមានសង្កាត់ចំនួន ៥ រួមមានសង្កាត់ ជ្រោយចង្វារ សង្កាត់ព្រែកតាសេក សង្កាត់កោះដាច់ សង្កាត់ព្រែកលៀប និងសង្កាត់បាក់ខែង។ បច្ចុប្បន្នខណ្ឌនេះមានប្រជាជនចំនួន ៧០ ២៩០ នាក់ ហើយក្នុងចំណោមនោះ ៤៨ ភាគរយ ជាបុរស។   នេះបើតាមទិន្ន័យពីក្រុមហ៊ុន Century 21 Zillion Holding ប្រចាំសាខាខណ្ឌជ្រោយចង្វារ។

សម្រាប់អ្នកវិនិយោគអចលនទ្រព្យគេប្រើទិន្នន័យប្រជាសាស្រ្តនេះ ដើម្បីថ្លឹងថ្លែងក្នុង​ការវិនិយោគ ថា​តើប្រភេទអចលនទ្រព្យ និងទីតាំងភូមិសាស្រ្តមួយណាដែលគួរវិនិយោគ ហើយនឹងមានមនុស្សចូលចិត្តទៅរស់នៅច្រើននាពេលខាងមុខ៕