ក្រុមហ៊ុនអភិវឌ្ឍន៍ខ្នាតយក្សនៅហុង កុង បង្កើនការវិនិយោគអចលនទ្រព្យនៅចិនដីគោក

ប៊ុនធឿន 05/April/2021 17:56
ទស្សនា
ចែករំលែក

ក្រុមហ៊ុនអភិវឌ្ឍន៍អចលនទ្រព្យធំៗនៅ ហុង កុង ដែលរួមមានទាំងក្រុមហ៊ុនរបស់លោក Li Ka-shing មហាសេដ្ឋីទី១ នៅហុង កុង កំពុងពង្រីកការវិនិយោគរបស់ខ្លួនក្នុងទឹកដីចិនដីគោក ស្របពេលដែលទីផ្សារអចលនទ្រព្យនៅហុង កុង មានការថមថយ​។​

យោងតាមសេចក្តីរាយការណ៍របស់សារព័ត៌មានជប៉ុន Nikkei Asia ចេញផ្សាយនៅថ្ងៃទី ៣ ខែមេសា ឆ្នាំ២០២១ ក្រុមហ៊ុនអភិវឌ្ឍន៍អចលនទ្រព្យ Henderson បង្កើតឡើងដោយលោក Lee Shau-kee មហាសេដ្ឋីទី២ នៅហុងកុង កំពុងពង្រីកការវិនិយោគអចលនទ្រព្យនៅចិនដីគោក។

កាលពីឆ្នាំមុន  ក្រុមហ៊ុន Henderson បានបើកដំណើរការគម្រោងធំៗបីនៅចិនដីគោកមានដូ​ចជាអគារការិយាល័យអគារភ្លោះមួយនៅក្រុងក្វាងចូវ, អគារពាណិជ្ជកម្មនៅក្រុង សៀង ហៃ និងផ្សារទំនើបនៅក្រុងឈឹងទូ។ បន្ថែមពីនេះ ក្រុមហ៊ុនក៏បានទិញយកគម្រោង​អចលនទ្រព្យ ៥ កន្លែងទៀតដែលស្ថិតនៅក្រុង ក្វាងចូវ ឈឹងទូ ស៊ូចូវ និងក្រុងស៊ាមិន។ គម្រោងទាំង៥ មានផ្ទៃក្រឡាបូកបញ្ចូលគ្នាជាង ៤ សែន ២ម៉ឺន ម៉ែត្រការ៉េ បន្ថែមលើធនាគារដីដែលក្រុមហ៊ុនវិនិយោគក្នុងប្រទេសចិន ដែលបច្ចុប្បន្នមានទំហំផ្ទៃដីលើសពី ២លាន ៧ សែន​ ម៉ែត្រការ៉េ។

ក្នុងឆ្នាំ២០២០ ប្រាក់ចំណូលដុល (consolidated revenue) របស់ក្រុមហ៊ុន បានកើនដល់ប្រមាណ ៣,២ ពាន់លានដុល្លារ កើនឡើង​ ៣,៥ ភាគរយធៀបនឹងឆ្នាំ២០១៩។  ក្នុងនោះប្រាក់ចំណូលដុលជាង ១,១ ពាន់លានដុល្លារ បានមកពីគម្រោងអចលនទ្រព្យនៅចិនដីគោក​។

ស្របគ្នានេះដែរ ក្រុមហ៊ុន CK Asset របស់មហាសេដ្ឋីទី១ហុង កុង គឺលោក Li Ka-shing ក៏ទទួលបាន​ចំណូលពីការលក់គម្រោងអចលនទ្រព្យក្នុងប្រទេសចិនកើនឡើងយ៉ាងគំហុករហូតដល់ទៅ ៩៣ ភាគរយ ស្រ​បពេលដែលចំណូលពីការលក់គម្រោងអចលនទ្រព្យនៅហុង កុង ធ្លាក់ចុះ (-៧២ ភាគរយ)។

លោក Victor Li អគ្គនាយកក្រុមហ៊ុន CK Asset ដែលកូនប្រុសច្បងរបស់លោក Li Ka-shing បានលើកឡើងថា ប្រាក់ចំណូលបានមកពីការលក់គម្រោងអចលនទ្រព្យនៅចិនដីគោក ស្របគ្នានឹងការរំពឹងទុករបស់ក្រុមហ៊ុន ដែលជួយយឺតយោងពីការធ្លាក់ចុះនៃការលក់អចលនទ្រព្យនៅហុងកុង។

ចំណែកឯក្រុមហ៊ុន Hang Lung Properties​ ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំមួយផងដែរនៅហុង កុង  បាន​បើកដំណើរការផ្សារទំនើបធំមួយកាលពីសប្តាហ៍មុន ដែលជា​គម្រោងអគារពាណិជ្ជកម្មចម្រុះរបស់ខ្លួនឈ្មោះថា Heartland 66 ស្ថិតក្នុងក្រុងទីក្រុងវ៉ូហាន ដែលមានកម្ពស់ដល់ទៅ ៦០ ជាន់។

នេះជាគម្រោងទី១០ ហើយដែលក្រុមហ៊ុនអភិវឌ្ឍន៍អចលនទ្រព្យនេះ បានពង្រីក​ការវិនិយោគគ​ម្រោងអចលនទ្រព្យផ្សេងៗនៅលើទឹកដីចិនដីគោក បន្ទាប់ពីទឹកដីកំណើតរបស់ខ្លួន ហើយនៅរយៈពេលបីឆ្នាំខាង​មុខ ក្រុមហ៊ុននេះគ្រោងនឹងបើកដំណើរការគម្រោងលំនៅឋានក្នុង​ទីក្រុងវ៉ូហានផងដែរ។

លោក Ronnie Chan Chi-chung អគ្គនាយកក្រុមហ៊ុន Hang Lung Properties បានថ្លែងថា៖ «យើងនឹងបន្តស្វែង​រក​ទីតាំងដីនៅលើទឹកដីចិនដីគោកនេះ សម្រាប់ការវិនិយោគរបស់យើងបន្ថែមទៀត។» លោកបញ្ជាក់ថា ក្រុមហ៊ុនក៏នឹងដាក់ដំណើរការ​អគារអាផាតមិនមួយកន្លែងក្នុងទីក្រុងវ៉ូហាន នៅឆ្នាំ  ២០២៣ ដែលនឹងក្លាយជាគម្រោងលំនៅឋានក្នុងទឹកដីចិនទីពីរ​បន្ទាប់ពីក្រុង សៀងហៃ។

លោកបន្តថា៖ «យើងមើលឃើញថាចិនដីគោក ជាទិសដៅដ៏ទាក់ទាញសម្រាប់ការវិនិយោគលើផ្សារទំនើបលំដាប់ផ្កាយបួន និងជាពិសេសផ្សារទំនើបលំដាប់ផ្កាយប្រាំ។»

ការពង្រីកគម្រោងវិនិយោគនៅក្នុងទឹកដីចិនដីគោក បានជួយទប់លំនឹងនៃការធ្លាក់ចុះនៃចំណូលប្រតិបត្តិការអាជីវកម្មរបស់ក្រុមហ៊ុន Hang Lung Properties ក្នុងទីក្រុង ហុង កុង ដែលទីផ្សារអចលនទ្រព្យ ជាពិសេសលំនៅឋានកំពុងរងផលប៉ះពាល់ដោយសារបញ្ហាកូវីដ ១៩ និងបញ្ហាប្រទាញប្រទង់ផ្នែកនយោបាយ។ ជាក់ស្តែង ប្រាក់ចំណូលរបស់ក្រុមហ៊ុន Hang Lung Properties ក្នុងឆ្នាំ២០២០  ដែលបានគម្រោងអចលនទ្រព្យក្នុងទឹកដីចិនដីគោកសម្រេចបាន ៦៧៩,៣ លានដុល្លារ កើនឡើង ១៦​ ភាគរយធៀ​​បនឹងឆ្នាំ ២០១៩។ ទំហំប្រាក់ចំណូលនេះស្មើនឹង  ៥៩ ភាគរយនៃចំណូលសរុបរបស់ក្រុមហ៊ុន។

យ៉ាងណាមិញ ចំណូលរបស់ក្រុមហ៊ុននៅក្រុង ហុង កុង ធ្លាក់ចុះប្រមាណ ១៤  ភាគរយ ឬស្មើនឹង ៤៧៤,៥ លានដុល្លារ ធៀបនឹងឆ្នាំ២០១៩៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង