ភាសាខ្មែរ 
English 
អ្នកជំនាញក្នុងវិស័យអចលនទ្រព្យបានលើកឡើងថា ខេត្តកំពត ជាទិសដៅឈានមុខគេ ក្នុងចំណោមទីតាំងសក្តានុពលទាំងបួនសម្រាប់ការទាក់ទាញវិនិយោគផ្ទះសម្រាកលម្ហែកាយ ឬផ្ទះទីពីរ ដែលកំពុងពេញនិយមក្នុងចំណោមអ្នកមានជីវភាពធូធារ និងជនជាតិបរទេសកំពុងប្រកបការងារ និងរស់នៅកម្ពុជា។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់បណ្តាញព័ត៌មានអចលនទ្រព្យ Z1 News កាលពីថ្មីៗនេះថា ខេត្តព្រះសីហនុ ខេត្តកំពត ខេត្តមណ្ឌលគិរី និងស្រុកវាលវែងនៃខេត្តពោធិ៍សាត់ នឹងក្លាយជាទីតាំងដ៏ពេញនិយមជាងគេសម្រាប់ការវិនិយោគផ្ទះសម្រាកលម្ហែកាយ ដោយសារទីតាំងទាំងនេះមានអំណោយផលអាកាសធាតុ និងសម្រស់ធម្មជាតិស្រស់ស្អាត។
តំបន់ខាងលើនេះមានសក្តានុពលពិសេសផ្សេងៗគ្នា។ ខេត្តព្រះសីហនុ និងខេត្តកំពត មានទីតាំងស្ថិតនៅជាប់មាត់សមុទ្រ ចំណែកឯខេត្តមណ្ឌលគិរី និងស្រុកវាលវែង នៃខេត្តពោធិ៍សាត់ជាតំបន់ដែលមានអំណោយផលសម្រស់ធម្មជាតិ។ យ៉ាងក៍ដោយ អ្នកជំនាញរូបនេះយល់ឃើញថា កំពតបានក្លាយជាទីតាំងនាំមុខគេមួយសម្រាប់ការអភិវឌ្ឍគម្រោងបែបនេះ ហើយកំពុងក្លាយជាឧទាហរណ៍គម្រូក្នុងចំណោមតំបន់សក្តានុពលខាងលើ។
លោកថ្លែងថា៖ «កំពតជាខេត្តដែលមានសក្តានុពលពិសេសជាងគេ ព្រោះនៅទីនេះមានទាំងមាត់សមុទ្រ សម្រស់ធម្មជាតិព្រៃភ្នំ រួមទាំងតំបន់ទេសចរណ៍ជាច្រើនផ្សេងទៀត។» ម្យ៉ាងវិញទៀត លោកថាការធ្វើដំណើរវិលត្រលប់រវាងរាជធានីភ្នំពេញ និងខេត្តកំពតកាន់តែឆាប់រហ័សជាងមុន ដោយសារផ្លូវតភ្ជាប់ទៅខេត្តនេះត្រូវបានស្ថាបនាកាន់តែប្រសើរ (អានបន្ថែម) ស្របពេលដែលផែទេសចរណ៍អន្តរជាតិកំពតត្រៀមបើកដំណើរការនាពេលខាងមុខផងដែរ។
លោកសុខនីម បញ្ជាក់បន្ថែមថា៖ «ខ្ញុំគិតថារយៈពេលប្រាំឆ្នាំទៀត ខេត្តកំពតនឹងមានការរីកចម្រើនខ្លាំងលើវិស័យអចលនទ្រព្យ ជាពិសេសការវិនិយោគផ្ទះលម្ហែកាយ ព្រោះថានៅទីនេះនៅមានទីតាំងដីទូលំទូលាយដែលអាចសាងសង់ផ្ទះលម្ហែបានច្រើន។»
ក្រុមហ៊ុន Forest Harmony Co.,Ltd ដែលជាក្រុមហ៊ុនអភិវឌ្ឍនក្នុងស្រុកដំបូងគេ កំពុងអភិវឌ្ឍន៍គម្រោងផ្ទះវីឡាលម្ហែកាយខ្នាតធំក្នុងខេត្តកំពត និងហ៊ុំព័ទ្ធដោយទេសភាពបៃតងដ៏ស្រស់ស្អាត ដែលគម្រោងនេះមានឈ្មោះថា Harmony Valley។ គម្រោង Harmony Valley រចនាឡើងតាមបែបអ៊ឺរ៉ុប មានទីតាំងស្ថិតនៅឃុំព្រៃថ្នង ស្រុកទឹកឈូ និងមានចម្ងាយប្រហែល ១៨ គីឡូម៉ែត្រពីក្រុងកំពត ដោយសម្រេចបានការលក់ដំណាក់កាលទីមួយស្ទើរទាំងស្រុង ហើយតែងទទួលបានអតិថិជនទាំងក្នុងស្រុក និងបរទេសទៅទស្សនាស្វែងយល់ពីគម្រោងនេះជារៀងរាល់សប្តាហ៍។
ទស្សនាវដ្តី Emigrate UK កាលពីឆ្នាំមុនបានដាក់ចំណាត់ថ្នាក់ប្រទេសកម្ពុជា ជាប្រទេសដែលល្អវិសេសវិសាលជាងគេដោយសារការចំណាយរស់នៅថ្លៃទាប ហើយជាប្រទេសសម្បូរដោយសម្រស់ធម្មជាតិស្រស់ស្អាត និងតំបន់ទេសចរណ៍ប្រវត្តិសាស្រ្ត សម្រាប់ជនបរទេស ជាពិសេសអ្នកចូលនិវត្តន៍ ដែលត្រូវការផ្ទះសម្រាកលម្ហែកាយ។ ស្របពេលក្រសួងទេសចរណ៍កម្ពុជាធ្លាប់បានបញ្ជាក់ថា ខ្លូនកំពុងរៀបចំគោលនយោបាយផ្ទះទីពីរនេះ ដើម្បីបង្កើនភាពទាក់ទាញភ្ញៀវទេសចរណ៍ និងជនបរទេសចូលនិវត្តន៍មកស្នាក់នៅ និងទស្សនាកំសាន្តនៅកម្ពុជា។
លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា ធ្លាប់បានបញ្ជាក់ថា គោលនយោបាយស្រដៀងគ្នាដែលក្រសួងទេសចរណ៍កំពុងរៀបចំនេះ ត្រូវបានអនុវត្តន៍ជោគជ័យរួចទៅហើយនៅប្រទេសថៃ សិង្ហបុរី និងប្រទេសឥណ្ឌូនេស៊ីជាដើម ហើយបានទាក់ទាញវិនិយោគិន ភ្ញៀវទេសចរណ៍ និងអ្នកចូលនិវត្តន៍ជាច្រើន៕
